АНДИЖОНДА ҲАР БИР ТИЗИМ СИНЧКОВЛИК БИЛАН ТАҲЛИЛ ҚИЛИНАДИ
www.andijan.uz
Андижон вилоятида 2020 йил 1 январь ҳолатига рўйхатдан ўтган тадбиркорлик субъектлари сони жами 36 минг 321 та (17 минг 657 та юридик шахс ва 18 минг 664 та якка тартибдаги тадбиркор) бўлиб, ўтган январ ойида 645 та янги тадбиркорлик субъектлари давлат рўйхатидан ўтказилди.
Бу борада 2020 йил 4 январь куни вилоят ҳокими Шуҳратбек Абдураҳмонов томонидан берилган топшириққа асосан жойларда давлат рўйхатидан ўтмасдан фаолият кўрсатаётган корхоналарни аниқлаш ҳамда корхоналарда ноқонуний ишлаётган ишчи-ходимларни қонунийлаштириш мақсадида вилоятдаги 881 та маҳалла фуқаролар йиғинларига вилоят ҳокимлиги иқтисодий комплексида фаолият кўрсатаётган 1002 нафар раҳбар-ходимлар бириктирилди. Бундан ташқари, 2020 йилдан янги ташкил қилинган юридик корхоналарни фаолият кўрсатмаётганлиги учун давлат ресстридан чиқариш бўйича хулоса берувчи ҳамда фаолият кўрсатмаётган корхоналарни фаолиятини тиклаш бўйича вилоят ишчи гуруҳи ташкил қилинди.
Ҳар бир маҳаллага бириктирилган иқтисодий блок ходимлари томонидан
ноқонуний 1476 та (10-15 февраль кунлари 563 та) давлат рўйхатидан ўтмасдан фаолият кўрсатаётган субъектлар аниқланиб, рўйхатдан ўтказилди.
Бунинг натижасида 6 минг 409 та янги иш ўринлари ташкил қилиниб, ҳудудларда фуқаролар қонуний доимий иш билан таъминланди.
Шу ўринда 973 та фаолият кўрсатаётган корхоналар хатлов қилинганда уларнинг ҳисоботларида 15 минг 43 нафар ишчилар сони қайд этилган бўлиб, ҳақиқатда эса ундан ташқари яна 2 минг 670 нафар ходимларга конверт усулида иш ҳақи тўланиб келинган, уларга меҳнат дафтарчалари очилмагани ва ҳисоботларда акс эттирилмагани аниқланди. Натижада яна 2 минг 670 нафар ишчи- ходимларга белгиланган тартибда меҳнат дафтарчаси очилиб, фуқароларнинг ижтимоий ҳимояси кафолатланди.
Андижон вилояти ҳокимлиги
МАТБУОТ ХИЗМАТИ
Facebook | Twitter | Instagram | YouTube | Telegram