⏺A8及16法律代表 #鄭凱霖大律師 盤問PW32 警員 16732 林卓賢
辯：上星期四喺你嘅主問初段作供嘅時候呢，主控官就問你啦，喺當日晚上大約1955嘅時候，警察防線去到德輔道西近高陞街位置嘅時候，呢個階段進行推進行動嘅時候有咩事發生，記唔記得？
PW32：記得
辯：當時呢你就答咗一個好長嘅答案。我就唔會讀返出嚟，不過就有幾個重點嘅。第一點，你提到雙方距離大概一百米，前方有二百個示威者，佔據咗德輔道西嘅馬路、行人路，呢個係一個重點啦。第二點，你形容咗呢啲人手持啲咩嘢啦，同埋佢哋嘅衣著裝備。第三點，你話呢啲人鬧你地黑警同埋講粗口鬧你地。第四點，你話有一啲人用雷射光照向你地警方防線。第五點，你話亦都有一啲雜物例如水樽喺人群掟向警方防線。記得呢部分證供嗎？
PW32：記得
辯：主控就再問你，呢啲你所講嘅行為係咪高陞街嗰陣發生，你話係。跟住呢，都隔咗一啲問題之後呢，主控官播放一系列嘅影片比你睇之前，佢再問你，你所講嘅呢一啲示威者嘅行為會否喺你身處過嘅三道防線，即係西區警署外啦、東邊街同埋高陞街，呢三次嘅停頓係咪大致相同，你話係。跟住法官閣下就問對於你講一啲投擲物品嘅行為、說話嘅內容，呢啲嘅先後次序、細節、投擲物品嘅內容，你係咪每一次喺防線停頓嗰陣好仔細咁講出黎，唔只係大致內容，咁你當時就話係大致內容，記得嗎？
PW32：記得
辯：想你睇返你喺2019年7月29日0500回嘅一份口供，唔好意思等一等...等緊個時候都問一問你，當時你回呢份口供嘅時候記憶猶新嘅，啱唔啱？
PW32：係
辯：有將你當晚行動嘅所見所聞全部仔細、重要嘅事項係準確咁記低嘅？
PW32：係
-展示口供-
辯：想你淨係睇第二頁第八段，你同唔同意我頭先同你總結嗰幾點你作供嘅內容？根據你口供所紀錄，喺1940喺東邊街所發生嘅事。
PW32：係
辯：確認啊嘛？你要答出聲。
PW32：係
辯：大約1955時，你地警方防線推進到去近高陞街位置嘅時候呢，你書面口供係從來冇提及過前方有任何人掉任何物品向你地警方防線，啱唔啱？
PW32：書面口供冇紀錄
辯：即係同意啦？
PW32：同意。我想補充，我喺東邊街見到前面示威者嘅若干嘅描述啦，喺口供紙上面有提及到。咁我就係一路推進去到近修打蘭街，口供紙上面講到，咁喺我眼前呢一班示威者嘅描述，都係同一班示威者，啲描述都係相同嘅。所以我就冇再刻意寫落去。因為一路掃蕩，眼前都係同一班示威者。
辯：你剛才嘅答案就係一啲好概括嘅答案，首先你話係同一班示威者，喺東邊街去到修打蘭街，我諗你會同意當中呢個路段裡面都有好多橫街。
PW32：係，有橫街
辯：隨時都可以有人嚟，有人走嘅，同意阿嘛？
PW32：同意
辯：咁所以只係你主觀地覺得係同一班人啊嘛？
PW32：唔同意。因為我見到呢一群示威者係一路向後退，咁我地一路推進。唔係我個人覺得係同一班示威者，事實就係同一班示威者，佢哋一路向後退，因為就係警方嘅推進，所以佢哋向後退。
辯：咁但係無論如何，你頭先都同意啲人隨時可以嚟、隨時可以走啦係咪？
PW32：係
辯：我想集中喺最後一個對峙位置嘅，高陞街上面。你地係由嗰度起步推進㗎嘛？最後一次。
PW32：一路推進
官：佢嘅意思係最後一次推進係咪喺高陞街口嘅位置開始推進。
辯：喺呢個高陞街口位置停頓咗都有十分、八分鐘嘅時間？
PW32：我唔記得有幾耐
辯：大概呢？大概講唔講到？
PW32：真係講唔到
辯咁或者我直接比片段妳睇。
官：如果片段睇到咁你唔洗播比佢睇，你可以直接比個時間法庭。你而家係問佢停頓咗幾耐，佢話唔記得阿嘛？
辯：係嘅閣下，或者等我問埋呢條問題再睇下是否需要播放片段...
辯：咁喺呢個高陞街位置停頓嘅呢段時間裡面，直到最尾推進，呢段時間係冇人向你地警方防線掟任何嘢嘅，同唔同意？
PW32：唔同意
辯咁我諗我需要播放片段。
📌播放NTS M049片段
片段由11223 馮煒康 拍攝
由19:51:23至20:00:50
辯：證人見到呢個位置嗎？
PW32：見到
辯：可以確認呢個係德輔道西近高陞街嘅位置嗎？
PW32：可唔可以俾張地圖我睇？
辯：可以
-展示P61A地圖-
-PW32在要求查看街道圖P61A後，同意片段拍攝德輔道西近高陞街防線情況-
-播放器時間0128時暫停-
辯：睇完剛才嘅片段，你會否同意啱啱呢十分、八分鐘對峙嘅階段，冇人向警方掟嘢？
PW32：唔同意。因為我見到有人。我身處嘅位置見到有物件掟向警方防線。鏡頭影唔到只係鏡頭影唔到，佢唔係長時間影住，佢會向左向右、zoom近zoom遠，或者比一啲人、一啲物件遮擋咗。
辯：你知唔知道當時雙方各距離有幾遠？
PW32：口供紙提及過大概一百米，目測
辯：你口供提及嗰個係東邊街，我地而家講緊高陞街
PW32：因為警方推進咗一段小嘅距離，示威者都會相若褪(tan3)後，同埋都係目測，大約呢個距離
辯：高陞街呢個大約你話目測一百米嘅距離，你嘅說法係話你...總之鏡頭影唔到，但係你現場見到有人掟嘢，係咪你嘅說法？
PW32：係
辯：我向你指出係冇咁嘅情況嘅，你同唔同意啊？
PW32：唔同意
辯：喺呢個階段亦都冇人不斷講粗口鬧你地。
PW32：我唔同意