⏺A4及A22法律代表 #石書銘大律師 盤問PW29警員52775 葉廣泉

辯：嗱警長，你捉第十二被告嗰陣時候，第十二被告係背向你嘅，啱唔啱？

PW29：係

辯：你就話過你一隻手捉住第十二被告嘅背囊？

PW29：係

辯：另外一隻手就捉住佢隻腳？

PW29：係

辯：第十二被告嘅雙手當時係沒有被任何嘢捉住嘅，啱唔啱？

PW29：啱

辯：跟住第十二被告就向前跌嘅，係咪啊？

PW29：係

辯：你當時亦都係希望將第十二被告向前㧬(ung2)低喺地下？

PW29：將佢壓落地下

辯：換句話講，第十二被告就係俾你壓低，之後就向前仆啦？

PW29：係

辯：你將佢向前壓之前，第十二被告同你之間係冇眼神接觸或者面對面嘅情況嘅，係咪？

PW29：一段時間冇

官：我唔明咩叫一段時間冇。

PW29：即係我第一眼見到佢嗰陣都冇眼神接觸嘅。第一眼見到佢嘅時候，見到佢個樣啦，佢轉身。咁其實，眼神大家係冇接觸到嘅，只不過係我望到佢，之後呢，佢就冇再轉過身

辯：喺第十二被告嘅角度嚟講，佢就係突然從後俾你捉住壓咗落地下？

PW29：係

辯：你當時有冇留意第十二被告伸出隻手拉住周圍嘅嘢？

PW29：佢有伸出隻手

辯：會唔會形容可以話係突如其來俾人捉住，然後想伸出隻手捉住啲嘢，保持返平衡嘅感覺啊？

PW29：呢個我唔肯定

辯：咁佢伸出隻手之後佢有咩動作呢？

PW29：伸出隻手之後，有另一個人亦都係用一隻手捉住第十二被告嘅手，將第十二被告拉扯。