⏺A14法律代表 #曾藹琪大律師 盤問PW35偵緝警員 6314 楊立隆

辯：頭先主問嘅時候就俾咗你之前證人供詞嘅第五十二段你啦，我另外比多一段你，係方便我一陣問問題嘅。呢兩頁紙呈堂為D14-6，就係證人供詞嘅第22同埋52段。

辯：第二十二段先下，7月29日2052時，響嗰個醫院裡面，你呢就檢取咗十一項物品，但其實當時已經有三個背囊喺你嘅保管之中㗎啦？

PW35：不同意。當時，除咗我檢取咗嗰十一項證物之外，其他嘢都係第十四被告自行保管

官：咁講緊嗰三個背囊呢？

PW35：包括嗰三個背囊都係第十四被告自行保管

辯：主問最尾比你睇嗰個片段，NOW嗰個片段，同唔同意見到你係攞住三個背囊？

PW35：同意

官：同埋枝行山杖？

PW35：冇錯

辯：你係被委派做處理第十四被告有關嘅證物嘅警員。

PW35：係

辯：同你直接指出啦，所以呢，響醫院嘅時候，三個背囊都係由你保管嘅。

PW35：不同意

辯：你響0200時，7月29日，同第十四被告離開醫院，對嗎？

PW35：對

辯：離開醫院嘅時候，三個背囊連同裡面嘅物品都係由你保管嘅。

PW35：不同意

辯：然之後，返到差館處理一啲事項啦，主控都問左你㗎啦，你呢就係響最後嗰朝早要處理嘅事，就係0823時就將第十四被告交俾值日官處理。然之後你就下班去到當天嘅黃昏先至在上班，對嗎？

PW35：對

辯：所以呢，你係去到2019年7月30日，即係第二十二段講緊嘅0218時呢，你先至有時間處理有關第十四被告嘅案件嘅證物嘅，所以分開咗兩個環節嚟處理嘅其實，簡單嚟講。

PW35：你想講邊兩個環節？

辯：第一個環節就係響醫院裡面啦，呢個係第一個環節。但由於第十四被告睇完醫生你地就會離開醫院㗎喇嘛，對嗎？

PW35：對

辯：所以呢，響第一個環節裡面，只係處理到而家證人供詞第二十二段嘅物品，而由於你亦都有中間落過班嘅關係，所以你就去到第二天凌晨0218時先至處理餘下嘅物品啦，

先至檢取。

辯：如果我地睇返第五十二段有出現過「XXX(不是A14)」呢個名，包括中文或者英文，總共有六張卡嘅，我想比你睇一睇嗰六張卡，我亦都希望將佢哋一併呈堂。係響第五十二段嘅5號、6號、11號、12號、24號同埋26號裡面嘅。

-六張卡片呈堂為D14-7-

辯：呢六張卡當中呢，有三張卡都有相片喺上面？

PW35：係

辯：包括一張身分證、學生證同埋另外一張會員證嘅。

PW35：係

辯：你同第十四被告響佢被捕之後都相處咗一段長時間，以小時去計啦，對嗎？

PW35：一至兩日到啦

辯：你都會同意頭先我所講三張卡上面嘅相，並非第十四被告嘅樣嚟，對嗎？

PW35：對

辯：另外呢，響你證人供詞第五十二段第二十三號物品，五張相，麻煩都俾證人睇一睇。

PW35：睇咗

辯：同樣嘅問題，呢五張相當中，你見唔到有第十四被告在照片上，對嗎？

PW35：對

-五張照片呈堂為D14-8-

辯：頭先俾你睇嘅D14-7、8，佢哋都係連同證人供詞第五十二段第4-29嘅項目一同響黑色背囊(P14-14)裡面搵到嘅。

PW35：冇錯

辯：7月28日，2019年，當值當天，著住一件寫著警放police嘅背心當值？

PW35：警察嘅背心

辯：我地得知寫住警察police嘅範圍係可以攝咗入件衫嘅一個位，令到睇唔到呢啲字嘅，同唔同意？

PW35：同意

辯：我嘅問題係，響當值嘅時候，如果警察係著住呢一件背心，有咩情況係需要將印有警察police呢一部分收起佢？

PW35：冇正式嘅指引

辯：你自己有冇試過咁做？

PW35：有

辯：喺咩情況？

PW35：例如我自己喺寫字樓工作嘅時候，著住呢件背心，我就會冇展示出嚟

辯：有冇試過響公眾地方執勤嘅時候，你本人要收起有關部分嘅字樣？

PW35：有試過

辯：喺咩情況啊？

PW35：我認為毋須展示警察身分嘅時候就會咁做

辯：有咩時候響公眾地方執勤，係你認為會毋須展示警察嘅身分？

PW35：例如我需要做一啲埋伏、唔想俾人發現我嘅時候，咁我咪會隱藏我嘅身分