⏺A11法律代表 #傅昶生大律師 盤問PW63警署警長51296 丘健良

辯：頭先主控官問你警方人員5969展示嗰啲物品嘅時候，紀錄*A11姓名*係冇作出任何投訴嘅，對嗎？

PW63：冇錯

辯：我想個畫面相近啲。即係5869唔係向你展示三樣嘢，係好多樣嘢？

PW63：係

辯：一個黑色頭盔、一個黑色嘅面巾、一部白色嘅手機、一對白色嘅手袖、一個白色嘅3M口罩、一個藍色嘅背包。你記唔記得呢幾樣嘢係喺擺曬落一個好大嘅膠袋，佢逐樣、逐樣拎出嚟㗎？

PW63：係

辯：當時你工作地點係張枱，5869就喺嗰個好大嘅塑膠袋拎啲嘢出嚟，你當時就問A11佢有冇投訴，係咪？

PW63：冇錯

辯：佢當時同你講，佢話，當佢被拉嗰陣時候俾人打傷隻腳，記得嗎？

PW63：冇咁嘅事

辯：跟住你呢，就有叫佢俾佢隻腳你睇嘅，記得嗎？

PW63：兩樣嘢喎，佢話佢有俾人打呢，我相信冇發生到嘅，印象中。如果每個被捕人有傷勢我都會要求佢地俾我睇嘅，同埋紀錄低。

辯：你紀錄傷勢呢，你寫咗四個字：左腳擦傷，對嗎？

PW63：正確

辯：咁點解無端端佢會話你聽佢左腳受傷嘅？你又要睇隻腳有冇受傷嘅？喺咩環境底下你睇到佢傷勢同埋紀錄呢？

PW63：其實我嘅工作係要查問所有被捕人呢個問題，唔單止係A11。當晚嘅所有被捕人我都有問呢個問題。呢個係值日官嘅責任

辯：你問佢有冇受傷，佢點回應你啊？

PW63：有，就係話受咗傷囉左腳

辯：你有冇問佢點解受傷啊？

PW63：有

辯：佢有回覆，個回覆係點樣啊？

PW63：其實每個被捕人我覺得都係不太合作嘅，佢都唔會話俾我聽因乜事會受傷。我冇記錯佢就係冇回覆我囉

辯：你有問過佢，佢冇回覆，你係咪咁嘅意思啊？

PW63：冇錯

辯：你有冇咁樣寫返喺你嘅記事冊到？「我問過佢，佢拒絕回答」，有冇咁紀錄低啊？

PW63：冇

辯：過咗咁多個月，你記得佢當時表示唔回答你個問題？

PW63：因為當晚每一個被捕人都係同一個反應

辯：你嘅意思係，每一個被告人都有話你聽有受傷、有俾你睇嘅傷勢，但係都唔會回答你點解受傷啊？

PW63：唔係每一個被捕人都有受傷，除咗傷勢之外，我問佢，當然佢唔會答我啦。基本上問佢嘅所有問題佢都唔會回答嘅

辯：作為一個警務人員，作為一個DO，有個咁嘅答案，你唔覺得你應該寫低落occurrence book裡面咩？

PW63：冇咁嘅必要

辯：我向你指出佢當時係有話你聽佢被捕嘅時候係俾人打嘅，你特登唔寫落去，對不對？

PW63：不對

辯：你記唔記得A11被帶到你面前嘅時候，佢雙手係俾索帶鎖住咗㗎？

PW63：我印象中已經係放曬

辯：你唔肯定，因為印象中。抑或係肯定架？

PW63：我唔肯定，但係個指引係返到臨時羈留中心就會幫佢放曬