⏺A11法律代表 #傅昶生大律師 盤問PW28偵緝警員5869 邱偉濤
辯：沙展，我地今日講返呢，就係27049帶咗第十一被告去德輔道西個情況。你話去到之後，佢交咗第十一被告嘅背囊同埋黑色頭盔俾你。我想問，當時個女警點樣同你講、同埋有啲咩物品係實際交咗俾你嘅呢？
PW28：當時呢，女警佢將啊被告十一帶到埋嚟我身邊，咁佢就同我講交俾我啦。當時佢係用手俾個頭盔我嘅，我記得當時第十一被告係孭住個背囊。
辯：咁佢有冇同你講任何關於個頭盔、背囊嘅嘢，話交俾你啦？
PW28：冇
辯：咁點解你琴日主問同埋法官問你，關於交咗頭盔同埋藍色背囊俾你？佢都冇話交俾你
PW28：佢（第十一被告）孭住㗎嘛因為
官：即係佢交咗個孭住背囊嘅被告俾你，咁即係交埋啲嘢俾你啦？
PW28：合理推論，個背囊就係被告十一嘅
辯：答完㗎喇嘛？
PW28：答完
辯：咁佢有冇話交埋白手袖、防毒面罩同埋頸罩俾你？
官：有冇咁講？
PW28：冇。當時佢冇同我講佢交俾我。因為當時個防毒口罩、面巾同埋白色口罩都係被告十一持有嘅、戴住
辯：我琴日咪同你講過話你嘅記事冊...
官：（打斷）佢咪解釋咗囉？
辯：我唔係好滿意呢個解釋。你同意我琴日話你口供紙都話過背囊有七樣嘢，再加個頭盔，你搜到呢啲嘢啊嘛？咁你有冇確實好似口供或者記事冊咁搜過背囊裡面嗰七樣嘢？
PW28：我當時喺個藍色背囊發現，即係我琴日提及過嘅物品。包括係：黑色嘅噴漆、一束白色膠索帶、三隻黑灰色手套、一部白色SAMSUNG電話連套，而另外嗰啲證物包括係：防毒口罩、黑色面巾同埋一對白手袖，係喺被告十一嘅身上發現，佢係戴住。
辯：答完啦係咪？
PW28：係
辯：咁你即係話你口供紙同你嗰個記事冊話你摷過背囊嗰到嗰啲嘢係錯㗎啦喎？
官：佢琴日已經答咗，問下一條問題。
辯：閣下，呢條問題嘅意義係...
官：我睇唔到呢條問題有任何意義！（大聲）
辯：閣下我聽到你講嘢㗎
官：我想去睇我呢個係咪錯嘅寫法，我讀返琴日嘅答案俾你，如果你有興趣嘅話
辯：我有興趣
官：（讀）你有冇抄低？
辯：我有抄啊閣下
辯：你所講嘅手民之誤，即係你喺記事冊嗰度寫錯咗。你同意嗎？
PW28：我同意啊
辯：我琴日同你講咗，你記事冊係寫先過口供紙，係咪？
PW28：係啊
辯：寫口供紙嘅時候又再一次錯誤啦喎？
PW28：因為我係先錄取記事冊，之後再錄口供紙。咁我係因為對住記事冊錄口供，所以就重複犯錯。
辯：當你寫嗰個口供紙嘅時候，你冇回想返當時嘅情景而更正咩？
PW28：由於當時嗰段時期工作非常、非常繁忙，所以我承認我係出錯咗。
辯：你幾時第一次發現嗰到係出錯咗㗎？
PW28：我琴日喺證人室睇我記事冊嘅時候發現
辯：你喺未嚟俾口供之前，即係琴日之前，有冇任何時候睇過份口供紙或者記事冊？
PW28：我冇睇
辯：冇睇過嘅。咁有冇任何時間，琴日你口供之前，有睇過呢單案件嘅嗰啲片段呢？差人嘅片段又好、其他片段又好，關於呢件事件嘅片段有冇睇過啊？
PW28：冇
辯：我向你指出，你係講大話嘅。你係冇任何時間check過、搜查過第十一被告嘅背囊嘅，喺現場嗰陣時。
PW28：唔同意
辯：喺現場嗰度，即係德輔道西三十一號嗰度。你記唔記得大概2012-2020嘅時候，女警14537佢當時喺度嘅，係咪？
PW28：係
辯：你有冇見到女警14537搜查過第10、11、12被告呢三位女士啊？
PW28：有
辯：你有冇見過佢搜身之外，仲有搜查背囊啊？
PW28：我當時印象記得呢，啊女警14537，佢搜查我負責嘅被告十一嘅身姐，並冇搜查佢嘅財物、隨身嘅物品。
官：咁另外嗰兩位被告你講唔講到？
PW28：冇印象。有搜查身，但係我唔記得有冇搜查財物
辯：女警14537，當佢搜完每一個被告，佢都有話俾你知搜唔到任何攻擊性嘅武器，對嗎？
PW28：我睇到警員搜完被告十一身上冇攻擊性物品...
官：即係你見到佢搵唔到？
PW28：係，但係佢冇講出嚟，冇特別。
辯：冇特別係14537搜完講「冇特別」定係點樣冇特別？
PW28：我記得當時女警搜完身係講「冇特別」
辯：我向你指出，佢當時就講「冇攻擊性武器」而唔係「冇特別」，係咪啊？
PW28：我諗諗先...唔同意
辯：我地知道，之後你就帶D11去葵涌警署㗎啦，返去警署之前，你有冇喺D11個身到檢取任何證物啊？
官：包括背囊？
辯：包括背囊
PW28：喺現場上車前已經檢取咗
辯：上車前已經檢取咗，包括啲咩，你可唔可以講俾我聽啊？
PW28：我重複，我琴日已經答過大狀嘅問題。包括被告身上持有嘅防毒口罩、頸上嘅一條黑色面巾、雙手戴上一對白色手袖、孭住嘅藍色背囊、入面嘅一支黑色噴漆、白色嘅膠索帶一束、三隻黑灰色手套同埋一部白色SAMSUNG電話連套同一個黑色頭盔。
官：當時D11係咪仲係上住咗膠索帶㗎？
PW28：係
官：咁你檢取咗個手袖，咁佢有索帶你點檢取？
PW28：檢取唔一定要我拎住，因為當時環境特殊，只能一名人員處理一名被捕人。而我身上有多樣裝備，包括孭住一個圓盾、一支長警棍同其他嘅裝備，所以我並不能用我雙手去檢取佢身上嘅所有證物。
辯：咁你有冇話俾D11聽「我而家檢取你啲嘢，不過仍然喺你身上」，有冇講俾佢聽啊？
PW28：當時我有簡略同被告十一講會檢取佢嘅物品
辯：你離開嗰陣時就大約2138時上車離開，返去葵涌警署，對嗎？
PW28：2138時係上嗰架巴士，唔係開車時間