【8.5 七區開花.回眸「無大台」奇蹟】
【8.5 七區開花.回眸「無大台」奇蹟】
今日,民間集會團隊入紙師又又又又又出信將抗爭周年集會延期。政權打壓、疫情嚴竣、集會無期,唯有諗返舊時仲搞緊集會嘅情況。一年前嘅今日,對我哋嚟講可謂沒齒難忘。
2019年7月31日,熱帶風暴韋帕襲港,天文台喺下晝1點40分改發八號東北烈風或暴風信號。而一眾8.5 admin,就喺八號風球之下由3點45分開會開到8點15分。會議原訂夜晚8點開始,好彩(?)李氏力場失敗打風有得早收工,大家由點幾兩點開始冒雨陸續趕到大學校園嘅會議室,若然冇呢個會差啲搞唔成七區。
當日距離8.5正日尚有五日,全港三罷嘅活動宣傳周街都係,甚至乎職工盟都正式出聲明響應罷工。但當時進度係一團糟,冇人知道實際七區要點夾,只有兩區入咗紙。最大原因在於發起人:(i) 抛出七區集會嘅建議;(ii) 開公海招咗大量人出文宣;(iii) 因應公海討論慢慢衍生咗唔同分工嘅小組;(iv) 聯絡議員求救,然後就沒有然後了。
原本各區admin只係以為自己要「管理義工」,落水後發現原來成個集會都冇人孭,感想就係「伏已中」。好在有啲admin之前搞過地區遊行,亦有議員、政團幫手,唔完全係由零開始嘅素人。大家自發補位,出嚟見面都冇任何遲疑,一心就係做好件事。歷時四個半鐘嘅會,由重新分工、集會安排、法律責任、物資籌集、對外聯絡,傾到文宣點對外解釋活動因由,達成共識就馬上返去繼續各區開會。
由7月31號到8月2號,兩日時間內全力衝刺,入紙、訂場地、搵嘉賓、搵物資、搵音響、搵急救、搵義工、排節目、寫宣言,其實大量工作未準備好,至少唔係零,叫有望搞得成。七區都統一大方向同時各有特色,活動開始成型,終於可以有嘢講,開到記者會去宣傳集會詳情。開記招最大原因,係希望市民對呢個活動有信心,睇到係有人肯負責認真搞,出嚟參與推動運動再下一城。
去到8月5號正日,相信大家都記得,七區爆滿畫面畢生難以忘懷。
事後成班admin有再約出嚟重聚檢討、商議更多行動,亦散落唔同活動、組織,繼續為運動出一分力,部分人其後形成「民間集會團隊」嘅雛型。諗返轉頭,搞8.5嗰個星期,單係㩒telegram都㩒到手指抽筋;睇返當日嘅會議紀錄,仿如隔世。當日響應出嚟嘅各位市民,大概冇諗到一開始係有文宣冇統籌咁兒嬉,希望冇嚇親大家。8.5就係一個實證,話俾大家聽,真係要相信香港人自發嘅力量。(不過重申,「無大台」唔代表唔使有人負責,就係咁先有入紙師。)
一年前,公海招人一呼百應,真正「無大台」運作,就算唔知對方姓甚名誰,我哋都抱住互信完成咗8.5「全港三罷.七區開花」(係我哋度出嚟嘅正式活動名嚟,留為紀錄)。
一年後,開會嘅大學校園已經唔對外開放,公海都唔會隨便相認怕有鬼,出街多過兩個人都中限聚令,出篇文都隨時中国安法。但我哋依然喺度,繼續入緊紙,同香港人同行。時代洪流磨難甚多,互勉之。
延伸閱讀:
眾新聞 《申辦多個遊行集會 劉頴匡家遭淋紅油 細說無大台組織方式》
P.S. 坊間成日話「申請」不反對通知書,其實呢個係「通知」制度嚟,除非警方出反對通知書,否則佢唔覆都搞得集會,係唔需要佢批准。民集出嘅文宣都係寫「已通知警方,待發不反對通知書」。當然而家乜都反乜都拉就已經係變相申請制度。
P.P.S. 本文附圖係8.5 admin共同回憶,明嘅會明。
![](/file/35579c7e7dc8a45fa3778.png)