7 ой ичида йўлларда 139 та ҳолат бўйича қарийб 6 млрд. 132 млн. сўмлик қурилиш-монтаж ишлари сифатсиз бажарилган

Бу ҳақда АОКАда Транспорт вазирлиги ҳузуридаги Йўл-қурилиш ишлари сифатини назорат қилиш инспекцияси ахборот хизмати раҳбари Комилжон Шамсиддинов иштирокида ўтказилган брифингда маълум қилинди:

✔️ “Ўзйўлинспекция” томонидан жорий йилнинг январь-июль ойларида давомида – йўл қурилиши объектлари, сунъий иншоотлар (яъни кўприк ва йўл ўтказгичлар) ҳамда йўл-қурилиш материаллари ишлаб чиқаришда норматив ҳужжатлар талабларига риоя этилиши ўрганилиб, 3155 та объектда назорат ўтказилди.

Натижада 5846 та қоида бузилиш ҳолатлари аниқланиб, уларни бартараф этиш учун буюртмачи, пудратчи, лойиҳачи ва сақловчи ташкилотларга – 3590 та бажарилиши мажбурий бўлган кўрсатма берилди. 3026 та кўрсатмадаги қоида бузилишлар бартараф этилди. Қолган 564 та кўрсатманинг ижроси ҳам қатъий назоратга олинган.

Шуни алоҳида айтиш керакки, инспекция томонидан етти ой ичида 139 та ҳолат бўйича умумий суммаси қарийб 6 млрд. 132 млн. сўмлик сифатсиз бажарилган қурилиш-монтаж ишлари ҳажмини тўловдан чиқариш бўйича буюртмачиларга талабномалар киритилди. Шундан 4 млрд. 203 млн. сўмлик 92 та талабнома ижроси таъминланди. Содда қилиб айтганда, шунча миқдорга баҳоланган, лекин амалда сифатсиз бажарилган қурилиш ва таъмир ишлари пудратчилар томонидан ўз маблағлари ҳисобидан меъёрий ҳужжатлар талаблари асосида қайтадан бажарилди.

Дарвоқе, йўл қурилиш обектларида қўпол қоидабузилишларга йўл қўйган ва давлат инспекторлари томонидан берилган кўрсатмаларни муддатида бартараф этмаган мансабдор шахсларга нисбатан “Маъмурий жавобгарлик тўғрисида”ги Кодекснинг 99- ва 147-моддаларига кўра 134 та маъмурий баённома расмийлаштирилиб, суд органларига юборилди. 120 та баённома бўйича 175 млн. 410 минг сўмлик жарима қўлланди.

7 ой давомида буюртмачи корхоналар 133 та тугалланган объектни фойдаланишга қабул қилиш учун “Ўзйўлинспекция”га мурожаат қилган. Комиссияга тақдим этилган объектларнинг ярмидан кўпи (аниқроғи, 79 таси) “Ўзйўлинспекция”нинг ҳудудий давлат инспекторлари томонидан жойига чиқиб ўрганилганда, уларда лойиҳа-смета ҳужжатларида назарда тутилган ишлар тўлиқ бажарилмагани, кўплаб камчиликлар мавжудлиги, айрим ишлар умуман сифатсиз бажарилгани аниқланди. Улардан баъзи мисоллар келтирамиз.

“Умумий фойдаланишдаги автомобиль йўлларини қуриш ва реконструкция қилиш дирекцияси” буюртмаси бўйича:

Сурхондарё вилоятидаги “М-39 автойўлидан – Шеробод шаҳрига кириш” автомобиль йўлининг 0-6 км қисмини реконструкция қилиш, Наманган вилоятидаги 4Р-120 “Исковот–Косонсой–Туракурғон–Жомашуй–Сойбуйи–А373” автомобил йўлининг 49-55 км қисмини реконструкция қилиш объектларида;

“Хоразм минтақавий йўлларга буюртмачи хизмати” ДУК буюртмаси билан:

“Урганч шаҳар Ал-Беруний кўчасини – Шерозий кўчасидан Ғ.Ғулом кўчасигача – қарийб 1 км кисмини қайта қуриш” объектида, Паҳлавон Маҳмуд кўчасининг 0,9 км қисмини тўла таъмирлашда;

“Тошкент вилояти минтақавий йўлларга буюртмачи хизмати” ДУК буюртмаси билан:

Янгийўл шаҳридаги “Самарқанд” кўчасини мукаммал таъмирлаш объекти бўйича ва бошқа буюртмачиларнинг қатор объектларида ишлар сифатсиз бажарилиб, йўлсозлик қонун-қоидаларига риоя қилинмасдан, қўпол хатоларга йўл қўйилган.

“Ўзйўлинспекция” томонидан – ҳозир саналган ва бошқа ўнлаб объектлардаги камчиликлар тўлиқ бартараф этилгач, уларни фойдаланишга топшириш бўйича буюртмачи корхоналарга кўрсатмалар берилди.