31.03.2024 санасида қайтадан таҳрир қилинди.
Ассалому алайкум ва роҳматуллоҳи ва барокатуҳ!
Аллоҳ таолога ҳамдлар бўлсинким, мана 10 йил Истанбулда Ўрта Осиёдан келган толиби илмларга хизмат қилиш насиб қилиб келмоқда. Бу йўлнинг пасту баланди, иссиқ-совуғи, аччиқ-ширини бўлар экан. Қийинчиликлари билан бирга мусофирчилик деган бир юк алоҳида бир машаққат.
Аллоҳ таолога ҳамдлар бўлсинким, шу кунгача етиб келдик... Аммо, йўлнинг сўнги ҳам кўринишни бошлагандек гўё... Ёҳуд янги бир юксалиш аввали...
Нега йўлнинг сўнги:
1. Шу вақтгача талабаларимизга расмий тарзда икки йиллик иқомани ҳеч бир тўсиқсиз олар эдик. Харажати 100 долларга ҳам бормасди. Энди эса Туркия ҳукуматининг янги сиёсатига кўра иқома фақатгина университет талабаларига берилмоқда. Университет контракт тўловлари 2024-2025 йил учун 2300 га чиққани ҳақида хабар қилди. Сентябр бошида 750$ дан ҳал қилгам эдик. Эсласангиз керак. Энг охири 1350$га ҳал қилгандик.
2. Талабаларимиз турар жойи нархларини муаммосиз ҳал қилишга ҳаракат қилиб келар, бунинг учун нодавлат ўқув курслари жойларидан фойдаланар эдик. Уларга талаба керак, бизга эса хусусий бўлса ҳам давлат рўйхатидан ўтган қонуний жой керак. Ҳамкорлик қилиб, талабаларимиз билан у ерда фаолиятимизни бошлар эдик. Бир-икки йил ўтмасидан жойнинг таъмири тугатилгач, талабалар билан жонланиб бўлгач, жой эгалари: «Ёзги таътилгача сизларга рухсат»,- дер эди. Энди билсак улар вақтинчалик биздан фойдаланган, биз берган ижара пули ва ёрдамимиз билан жойларини обод қилиб олган экан. Биз келаси йил учун бошқа жойни ўзимиз билмаган ва сезмаган ҳолда «обод» қилиб берар эканмиз.
3. Бундан роса бир йил аввал 250 кишилик жой бизнинг ихтиёримизга топширилди. Биз ва талабаларимиз 10 йил деганда энди жойга ёлчидик дедик ва бутун кучимиз билан илм беришни бошладик. У ернинг таъмири тугаши яқинлашар экан уларнинг ҳам асл мақсади кўрина бошлади. Толиби илмларга нисбатан бўлган муносабатлари бизни ранжитар, таътилгача аранг сабр қила оламиз, қишнинг ўртасида бу ердан чиқишимиз таълимга қаттиқ салбий таъсир қилишига амин эдик. Таъмир тугади ҳамки, қишнинг қоқ чилласида талабаларимиз жойсиз қолдилар. 140 кишилик талабаларимизни саралашга ва улардан фақатгина 35-40тасига жой қилиб беришга мажбур бўлдик. Қолганларига узримизни айтдик. Ватанга қайтдилар.
Бу катта жойдан чиқарилар эканмиз, 3-синфга энди ўтган талабаларимизни йиғдим. Дардлашдик, иймонлашдик...
- «Бу нечинчи кўчишимиз, укалар», - деб сўрадим. Улардан бири табассум билан:
- «11 чиси, устоз», - дея жавоб берди. «Илоҳо сўнгиси бўлсинда»,- дея дуо қилдик.
4. Ўша 40 талабамиз ҳам қизларимиз учун очган «Бахтиёр Оила» мактабига жойлашди. Янги қабул қилинган 40 нафар толиба қизларимиздан 7 тасигина қолди. Қолганларига узр айтдик.
Талабаларимиз сиғмагани, тахоратхона етмагани учун мажбур бўлдик биринчи қаватга яна қўшимча 9 та тувалет-ҳаммом қурдик. Шунинг ўзига қурувчимиз 27000$ харажат смета чиқариб берди. 6-қават мансардамиздан сув ўтар, совуқ эди. Унинг таъмири учун ҳам 20000$ харажат қилдик.
Бу ҳам етмади, ҳар бир қаватда 3тадан балконими бор эди. Балконларимизни Акфа қилиб хоналарни яна ҳам кенгайтирдик. Шугина харажатга 5000$ харажат чиқди.
Подвалда масжид қилиш учун катта хонамиз бор. Ҳали унга навбат келмади. Сметасини ҳам чиқартирмадим. Чунки харажатларимиз шундоқ ҳам жуда катта бўлиб кетди.
5. Бугуннинг ўзида яна 3 та талаба уйга қайтишга Каминага мактуб ёзди:
- «Устоз, иқома олишга менда ва оиламда моддий имкон йўқ, йўқса сизни ташлаб кетмас эдик. Менга илм бердингиз, мендан рози бўлинг»...
6. «Энди нима бўлади»,- деган саволлар ҳар бир талабамизни қийнамоқда. Уларнинг ходимлари бўлган биз устозларини эса ундан ҳам қаттиқ қийнамоқда. Ҳақиқат ҳам шу:«Энди нима бўлади»?
7. Ўз ватанингизда бўлсангиз, кўчада қолмайсиз. Ҳимоясиз қолмайсиз. Таомсиз, пульсиз, жойсиз қийналмайсиз. Аммо мусофирчилик ундай эмас экан. Ёрдам бераман, деганлар ҳам сиздан нимадир кутади. Камида жамоатига қўшилишингизни шарт қилади. Бу эса биз асло қабул қилмайдиган нуқтамиздир.
8. Мени баъзи ота-оналарнинг жавоби шу даражада ранжитдики, айтмасам бўлмайди.
Улардан бири:
«50$ ўтиб беринг, йўқса боламни бошқа жойда ўқитаман.»
Азизлар! Мен тижорат қилиҳ илм сотяпманми? Менга 400$ га тушяптими, сизга 50$ ўтиб берсам? Наҳот фарзандингизга шунча йил холис хизмат қилганимизга шуми раҳматингиз?! Афсусдаман, фарзандингизни ўқитишдан олдин сизни ўқитишим керак эди. Агар бошида шундай эканингизни билганимда, одобсизлигингиз учун фарзандингизни қабул қилмаган бўлар эдим.
Яна бири:
«Мен 2йилдан бери бир тийин тўламасдан ўқитдим. Бундан кейин ҳам тўлай олмайман. Хоҳласангиз ўқитинг. Йўқса мен бошқа бепул жой топаман.»
Субҳаналлоҳ! Устозга ҳурмат шуми? Текин бўлгани учун бизда ўқитган бўлсангиз, сизни бизга боғлаган нарса пул эканда? Ахир устозларидек бўлиши учун, уларга ҳавас қилиб эмас, текин бўлгани учун ўқитиб келган экансизда!
9. Шу вақтгача имом домлаларимиз фарзандидан энг қийин ҳолатда ҳам пул олмас эдик. Сабаби уларга хизмат қилишни, фарзандларини ўқитиб беришни ўзимизнинг энг катта фарзимиз деб билар эдик. Ҳали ҳам шу фикрдаман. Менга қолса, уларнинг фарзандларига стипендия бериб, рағбатлантириб турсам дейман.
Ростини айтай, бизнинг ҳам имконларимиз чегараланган. Устозлар ойлиги учун январда Матизни сотиб, пулини ойликка ишлатдим. Энди эса Дорулулум устозларини тошийдиган мошинамни сотишга қўйдим. Сабаби қарзларимизни беришимиз, ойликларини ўз вақтида тўлашимиз шарт. Шундай экан, сиз азиз имом домлаларимиздан илтимос қиламанки, бизни ҳам тушунинг. Қийин кунларда ўз фарзандингиз ўқишига ёрдам беринг.
10. Бу кунлар доимий эмас албатта. Аллоҳ таоло бу қийинчилик кунларини ҳам осон қилиб қўяди. Бу кунлар ҳам ортда қолади. Биз яна талабаларимизни бир тийин олмасдан ўқитадиган кунларга келамиз. Бунга ишинчим комил. Фақат фарзандларингизга холис хизмат қилган устозларини қийин кунларда ташлаб қўйган, одобсизлик қилган, устозларнинг хизматини пачакилаган ота-оналарни унута олмасак керак. Ҳудди ёнимизда туриб, моддий имкони бўлмаса ҳам фарзанди таълими учун қарз олиб ёки закот топоб бериб ўқитишга тайёр эканини изҳор қилган ота-оналарни АСЛО УНУТМАЙМИЗ! Биз устозлар сиздек ота-оналар билан ФАХРЛАНАМИЗ!
