2023 йилнинг 10 ойи давомида 19 359 та географик объект номлари давлат реeстрига киритилди
Бу ҳақда АОКАда ўтказилган брифингда Кадастрлар палатаси ахборот хизмати раҳбари Муножат Йўлдошева маълум қилди.
Ўзбекистон Республикасининг “Географик объектларнинг номлари тўғрисида”ги қонунига мувофиқ географик объектларнинг номлари соҳасидаги махсус ваколатли давлат органи сифатида Кадастр агентлиги белгиланган бўлиб, унга географик объектлар номларини Давлат экспертизасидан ўтказиш ва тегишли хулоса бериш ҳамда географик объектлар номлари давлат реестрини юритиш юклатилган.
Шунингдек, Қорақалпоғистон Республикаси Вазирлар Кенгашининг Раиси, вилоятлар ва Тошкент шаҳар ҳамда туман (шаҳар) ҳокимлари – географик объектларга ном бериш ва уларнинг номларини ўзгартириш масалалари бўйича ҳудудий комиссия раиси этиб белгиланган.
Давлат кадастрлари палатаси Республика топонимика хизмати бошқармаси томонидан 2023 йилнинг 10 ойи давомида 19 359 та географик объектларнинг номларини давлат реeстрига киритилиши таъминланди.
Шунингдек, ўтган давр мобайнида географик обьектларга ном бериш ва уларни қайта номлаш тўғрисидаги таклифларни давлат экспертизасидан ўтказиш бўйича 46 330 та ном - эксперт комиссиясига тақдим этилган. Шундан, 22 970 та географик объект номларига қонунчилик ҳужжатларига мувофиқлиги юзасидан ижобий экспорт хулосалари берилган, 23 360 та ном қонунчилик ҳужжатлари талабларига номувофиқ деб топилиб, қайта кўриб чиқиш учун ҳудудий комиссияларга қайтарилган.
Бундан ташқари, вилоят, туман (шаҳар) халқ депутатлари Кенгашларининг тегишли қарорлари билан тасдиқланган 20 592 та ном ўрганиб чиқилган. Шундан, қонунчилик ҳужжатларига мувофиқ бўлган 19 359 та ном белгиланган тартибда Географик обьектлар номларининг давлат реестри базасига киритилган.
Шу билан бир қаторда, ҳудудий комиссиялар томонидан ўрганилган ва ҳудудда мавжуд бўлмаган 954 та географик обьект номларини давлат реестридан ўчириш, давлат реестрига киритилган 279 та географик обьектларнинг номларига тегишлича ўзгартиришлар киритиш ишлари амалга оширилди.
Ҳозирги кунда, давлат реестрида 178 174 та географик обьектларнинг номлари жамланган. Шундан:
– 2 818 та маъмурий-ҳудудий бирликларнинг номлари;
– 167 698 та аҳоли пунктлари ва улар таркибий қисмларининг номлари;
– 2 085 та транспорт ва муҳандислик-техника инфратузилмаси обьектларининг номлари;
– 5 573 та табиий обьектларнинг номларини ташкил қилади.
2023 йилнинг ўн ойида географик обьектларга ном бериш ва уларнинг номларини ўзгартиришга доир республика бўйича маҳаллий Кенгашларнинг 141 та қарорлари қабул қилинган.
Аҳоли пунктларининг таркибий қисмлари бўлган барча маҳаллаларнинг (9 457 та) номи давлат реестрига киритилди. Шунингдек, 163 та истироҳат боғи, 93 та хиёбон, 7 711 та қабристон, 346 та зиёратгоҳ номи давлат реестрида жамланди.
2023 йил 1 январ ҳолатида республика бўйича 140 432 та кўчадан (барча турдаги) 119 970 тасининг номи давлат реестрида жамланган бўлса, 2023 йил 1 ноябр ҳолатига 14 054 тага кўпайиши натижасида 134 024 тани яъни 95,4 фоизни ташкил этмоқда.
Маълумот учун: Географик обьектларнинг номлари тўғрисида"ги қонуннинг 4(1)-моддасига кўра Географик обьектларга ном бериш ва уларини номларини ўзгартириш тўғрисидаги таклифларни тайёрлаш жараёнида маҳаллий аҳолининг фикри албатта ҳисобга олинади.
Давлат ва хўжалик бошқаруви органлари, тегишли маҳаллий ижро этувчи ҳокимият органлари географик обьектларга ном бериш ва уларнинг номларини ўзгартириш тўғрисидаги таклифларни келиб тушганидан кейин муҳокама қилиш учун уларни беш иш кунидан кечиктирмай ўз расмий нашрларида, расмий веб-сайтларида, шунингдек оммавий ахборот воситаларида эълон қилишлари белгиланган. Ушбу жараёнда маҳаллий аҳоли географик обьектларга ном бериш ва уларни номини ўзгартириш тўғрисидаги фикрларини ўн беш кун муддатда беришлари мумкин бўлади.
Маҳаллий аҳоли географик обьектларга ном бериш ва уларнинг номларини ўзгартириш тўғрисидаги таклифларга нисбатан ўз фикрини оғзаки, ёзма ёхуд электрон шаклда, якка тартибда ёки жамоа бўлиб билдириши мумкин. Бунда шахснинг фамилияси, исми, отасининг исми, шунингдек унинг яшаш жойи тўғрисидаги маълумотлар кўрсатилади.