2021 йилда тотализатор ва букмекерлик фаолиятига оид 1,1 мингдан ортиқ реклама бартараф этилди. 30дан ортиқ сайтга кириш чекланди

Реклама муносабатлари Ўзбекистон Республикасининг “Реклама тўғрисида”ги Қонун ва бошқа 10 га яқин қонунчилик ҳужжатлари билан тартибга солинади.

Тадбиркорлик ва истеъмолчилик маданиятини такомиллаштириш, реклама соҳасида ноҳалол рақобатга ва нотўғри рекламанинг олдини олиш мақсадида Агентлик томонидан 2021йил мобайнида 27  мингга якин ўрганишлар ўтказилган бўлиб, шундан 15 минг 486 ҳолатда турли камчиликлар аниқланган ва уларни тезкор бартараф этиш чоралари кўрилди.

Агентлик томонидан  реклама қилиниши қонун билан тақиқланган ёки чекланган маҳсулотлар, хусусан тамаки, электрон сигареталар, энергетик ичимликлар, алкогол, пиво, қимор ва таваккалчиликка асосланган бошқа ўйинлар рекламаси бўйича аниқланган ҳолатлар бартараф этилиши таъминланди.

Мисол учун, оммалашиб бораётган тотализатор ва букмекерлик фаолияти рекламаси.

Маълумки, бугунги кунда республикамизда тотализатор ва букмекерлик фаолиятини амалга ошириш ва албатта, бундай хизматларни реклама қилиш ноқонуний ҳисобланади. Шу мақсадда ўтказилган 1 105  та ўрганишларда 102 та та ҳолатда бундай хизматлар рекламаси аниқланган ва уларнинг барчаси бартараф этилган.

Шуниндек, Ахборот ва оммавий коммуникациялар агентлиги билан ҳамкорликда 30 дан ортиқ тотализатор ва букмекерлик рекламасини ноқонуний равишда юритувчи сайтларга кириш чеклаб қўйилди. Бу соҳадаги ишлар давом этмоқда.

Савдо ва умумий овқатланиш объектлари ташқи ва ички қисмида реклама қилиниши тақиқланган маҳсулотларга, яйне тамаки, алкогол, электрон сигарет, пиво ва бошқа реклама-ахборотларини жойлаштириш ҳолатлари бўйича олиб борилган 2 611 та ўрганишлар давомида 1 минг 71 та ҳолатда аниқланган камчиликлар бартараф қилинган. Шуниндек дарахтларга ўрнатилган 3 416 та ноқонуний реклама ва эълонлар олиб ташланиши таъминланган.

Бундан ташқари, моддий маданий мероснинг 386 та кўчмас мулк объектларида ташқи рекламани жойлаштириш бўйича ўрганишлар олиб борилганда. Натижада 25 дан ортиқ ҳолатда рухсатсиз реклама жойлаштирилганлиги аниқланган ва уларга нисбатан тегишли чоралар кўрилган.

Сўнгги йилларда оммалашиб бораётган ахборот алмашиш ва тарқатиш манбаи ҳисобланган ижтимоий тармоқларда жойлаштирилган рекламаларнинг 4 387 та ҳолати юзасидан ўрганишлар ўтказилди ва аниқланган барча камчиликлар бартараф этилди. Агентлик томонидан доимий равишда дори воситалари, биологик фаол қўшимчалар ва бошқа даволаш препаратлари, рағбатлантирувчи тадбирлар, нодавлат таълим ва хорижда ўқиш хизматларини кўрсатиш, даволаш, тиббий хизмат ва диагностика хизматларини кўрсатиш билан боғлиқ рекламалар бўйича ҳам ўрганишлар ўтказиб борилмоқда.

Мисол учун, дори воситалари, биологик фаол қўшимчалар (БАД) ва бошқа (оздирувчи, семиртирувчи) препаратларга оид рекламаларни келтириб ўтсак. Ўтган йил давомида ўрганилган рекламаларнинг  395 тасида камчиликлар аниқланди ва бартараф этилди.

Шу билан биргаликда нотўғри реклама оқибатида сотиб олинган товар (иш, хизмат) туфайли истеъмолчига 146 млн сўм миқдорда етказилган зиён тўлиқ ҳажмда қопланиб берилди.