❌ 12月19日 「拒絕承認選舉」集會 ❌

國安法、「完善」選舉制度、愛國者治港等等，一個一個嘅terms正正反映住議會政治光譜單一化，代議士服務嘅再唔係民眾，而係政權；「被解決」嘅再唔係香港社會問題，而係暴政所視為眼中釘嘅香港人。今時今日，所謂香港政府仲係唔係香港人嘅政府，我相信大家心入面都有個好確實嘅答案。

我哋由8月21號發起杯葛選舉嘅聯署，到截稿呢一刻為止有超過1100人聯署，扣返會重複投票既人，喺約一千人當中有95%嘅人係認同要杯葛呢個選舉，而我哋今日就要直接同港共政府反映呢個結果。我哋亦希望同所有香港人用實際行動再行多一步，所以喺呢一刻、喺呢到我哋以投票，一個無操縱冇篩選嘅投票，向極權直接表達我哋嘅不滿。

——————————————————

作為香港公民，我哋有義務同責任去主宰香港前途、自決香港民族嘅未來。但港共為咗鞏固政權，不斷剝削我哋嘅權利 ，肅清所有反對聲音，連法治都為暴政服務。所以作為香港民族嘅一員，我哋絕對唔會承認呢個政權，呢個為咗權力而殘暴對待人民嘅政府。

而今日投票結果都反映到香港人嘅民意，喺73票當中有70票係不承認「中華人民共和國香港特別行政區政權喺香港嘅執政地位同其管治」，0票承認，2票白票，1票無效票。

——————————————————

後國安法時期，港共用各種揦鮓手段去打壓各個仍然堅持緊、對抗暴政嘅香港人。義士身困石牆，面對住港共每一次嘅打壓，可能好多香港人都覺得無力、無助。

而身在海外、自由之地嘅我哋內心都好清楚知道到呢到嘅自由同我所渴望、追求嘅並唔一樣，我哋想要嘅係喺香港到呼吸到真正嘅自由。

可惜我哋暫時都再無法重返我哋嘅屋企。依家身於海外，當我哋可以擁有返言論自由、人身自由同政治權利，我哋必須珍惜。一日係香港民族，一世都係，即使離開咗香港，我哋對香港事務同未來都責無旁貸，要企出嚟為香港人發聲。

有人可能會問將來可以做乜？我哋可以做啲乜？不妨可以望吓身邊嘅各位，大家都係仍然堅持緊，目標堅定一致嘅同路人。每次大家聚集都係一個重新定位、 反思呢機會。可能當大家傾計討論嘅過程，集思廣益，激發到大家搵到新嘅出路呢？

光復香港從來都無一條既定嘅formula去做，呢幾年嘅社會運動都同我哋講，路要由自己行出嚟。無錯歷史可以借鑑，但我哋嘅未來係唔會重演歷史，我哋嘅路亦注定同前人唔同。所以我哋更加要堅持尋找光復香港嘅所有可能性。

喺重光路上各位都仍然在探索當中，要每一條路都需要有人去嘗試。要堅持先可以見至𥌓光呢樣嘢大家都識講，所以：相信自己、相信手足、相信我哋可以光復到香港——就係我哋要做嘅嘢。

全民議政聽落好似好空泛，但今日在場嘅各位都係呢件事上行咗一步。香港嘅前途必須由香港民族自決，呢樣係無可否認嘅。所以今日好多謝大家岀席今次嘅集會，投低你神聖嘅一票，一齊構想同建立香港未來。

——————————————————

無論你嘅身份係乜，你嚟到嘅時間有幾耐都好，我相信我哋心入面嘅掙扎、心路歷程都係相似。我哋其實只係一班由手足組成嘅組織，同大家一樣都係被迫離開香港嘅一群。

可能大家嚟到呢到嗰時覺得好有罪疚感，但又好迷惘、唔知做乜好、唔知自己做到乜。不如就比呢種感覺推動你去做更多，你唔係自己一個人，我哋無一個人係孤獨一人。我哋LIBERKONG作為流亡組織，同所有在英組織一樣都希望我哋可以作為橋樑去連結大家。

要推翻呢個政權唔係一朝一夕嘅事，但時間係唔會令我哋忘記港共對香港人做過嘅種種。共抗暴政，團結、為香港未來奮鬥。

——————————————————

最後，再次多謝今日有份出席嘅嘉賓——英國港僑協會嘅鄭文傑先生、前區議員尤漢邦先生、英倫好鄰舍教會嘅Edward，以及在場嘅香港人。