Ҳар қандай маҳсулот ишлаб чиқарувчи компанияларнинг энг катта муаммоларидан бири, тайёр маҳсулотни сотиш ва мижозга етказиб бериш бўлганлиги сабабли биз сизга DoorDash компаниясининг муваффақият тарихи ҳақида ҳикоя қилишга қарор қилдик. Ушбу ҳикояни ўқиб сиз кенг кўламли лойиҳага асос солиниши ва уни амалга оширилиши ҳақида маълумотга эга бўласиз.
DoorDash Inc. -таом етказиб беришга онлайн- буюртма қабул қилувчи компания ҳисобланади. Компания бош офиси Сан-Францискода жойлашган. Компаниянинг АҚШда таом етказиб бериш бўйича улуши 56 фоизни ташкил этади.
Компания тарихи.
Компанияга Пало-Альто шаҳрида Стэнфорд университетининг тўрт нафар талабалари- Тони Сюй, Энди Фэн, Эван Мур ва Стэнли Тэн томонидан асос солинган.
Кунларнинг бирида тўртовлон кичик бир дўкон менежери билан суҳбатда тайёр маҳсулотни харидорга етказиб бериш катта муаммо эканлиги ҳақида маълумотга эга бўлишди. Шу шаҳарда фаолият олиб бораётган таом тайёрловчи кичик фирмалар ва савдо қилувчи дўконлар фаолиятида ҳам шундай муаммолар мавжуд эканлиги маълум бўлганидан кейин, улар таом етказиб берувчи компанияга асос солишга қарор қилишди. Умуман олганда ўша даврда Пало-Альто шаҳрида маҳсулот етказиб бериш хизмати қониқарсиз эди. Тўрт нафар дўст тез кунда маҳсулот етказиб бериш хизматини ташкил этиш бўйича янги сайтни ишга туширдилар.
Бизнесни ривожланиши.
2013 йилнинг 12 январь куни келажакда DoorDash номини олувчи– Palo Delivery компанияси ўз фаолиятини бошлади. Шу куннинг ўзида биринчи буюртма қабул қилинди.
Компания асосчилари Тони Сюй, Энди Фэн, Эван Мур ва Стэнли Тэн кундуз куни университетда таълим олишар, кечки вақтда эса буюртмаларни тарқатиш билан шуғулланишар эди. Аввалида компаниянинг асосий мижозлари Стэнфорд талабалари бўлишган.
Компаниянинг асосий вазифаси буюртмачиларга таом етказиб беришга таом тайёрловчи фирма ва дўкон менежерларига яқиндан ёрдам бериш бўлган. 2013 йилнинг июнь ойида Palo Delivery компанияси номи – DoorDash номига ўзгартирилди.
Компания жамоаси буюртмаларни етказиб бериш хизмати сифатини юқори даражага олиб чиқиш учун тинмасдан меҳнат қилдилар.
«Компанияда асос солинган вақтда биз таом етказиб бериш муаммосини ҳал этишга ҳаракат қилдик. Кейинчалик биз мижозларга таом билан бирга қулайлик ва бахт етказиб бераётганимизни тушундик», – дейди компания асосчиларидан бири.
Бир неча йилдан кейин компания интернетдаги ўзининг иловасини яратди. Бунинг натижасида на фақат АҚШ ҳудудида, балки Канада ва Австралия ҳудудларидаги 390 мингдан ортиқ ресторан, 1 миллион курьер ва 18 миллион нафардан кўп истеъмолчи бирлаштирилди.
2019 йилда компания даромади бир йил олдинги кўрсатгичдан 204 фоизга ошди ва 885 миллион долларга етди. 2020 йилнинг тўққиз ойи якунига кўра компания даромади 226 фоизга ошиб, 1,9 миллиард долларни ташкил этди.
2020 йилнинг учинчи чорагида қабул қилинган буюртмалар сони, 2019 йилнинг учинчи чорагига таққослаганда 237 фоизга ошиб 236 миллионни ташкил этди. 2020 йилнинг тўққиз ойи якунига кўра қабул қилинган буюртмалар 200 фоизга ошиб, 543 миллионга етди. Таҳлилчиларнинг фикрича компания бундай юқори кўрсатгичларга эришишига асосий сабаб коронавирус пандемияси бўлган. Чунки бу даврда ресторанлар ташриф этувчи мижозлар учун ёпилган, одамлар ўзини эҳтиёт қилиш учун кўчага камроқ чиқаётган эдилар. Аммо, нима бўлганда ҳам инсон таом билан тирик.
DoorDash таом етказиб бериш билан бошлаб, кейинчалик хизмат турларини кўпайтирди. Хусусан; компания мижозларга бир ойга 10 доллар эвазига DashPass дастурига аъзо бўлишни таклиф этди. Дастурга аъзо бўлган мижозлар бир ой мобайнида компанияга чексиз миқдорда таом етказиб беришга буюртма бериш имконига эга бўлдилар. Тез кунда DashPass дастури аъзолари сони 5 миллиондан ошиб кетди. Шунингдек компания ресторан ва қаҳвахоналардан ташқари озиқ- овқат ва гул билан савдо қилувчи дўконларининг мижозларига ҳам хизмат кўрсатишни йўлга қўйди.
Албатта, ҳозирги даврда маҳсулот етказиб бериш оддий бир хол. Ҳар бир инсон хоҳлаган вақтда, хоҳлаган маҳсулотга, хоҳлаган миқдорда буюртма бериши имконига эга ва шундан буюртмаларни етказиб бериш билан шуғулланувчи кўплаб фирмалар фаолият олиб бормоқда.
Умумий овқатланиш соҳасида бизнес бошлаб муваффақиятга эришишни ният қилган инсон, шуни унутмаслиги керакки бу соҳа катта имкониятларга эга, фақат ташаббус, ҳаракат ва ўзига ишонч хислатлари мужассам бўлиши керак бўлади.
Бошқалар аҳамият бермаган нарсани кўриш -муваффақият гарови. Роберт Кийосаки
