#1118理大 #審訊 [13/14]
D2作供- 主問部分1/2
🔸辯方主問
D2今年19歲，家人有媽媽及哥哥，爸爸早年離世。D2家住銅鑼灣，2021年應考DSE，現修讀文憑課程。案發時他16歲，讀中五，家庭情況一樣。2019年11月18日他在科學館連同另外16人被拘捕。
他在11月16日進入理大，大概1600-1700從住所出發，離開銅鑼灣。當日是星期六，不需要返學，16日的前兩天都唔需要返學，因為教育局話停課；16日他是獨自一人，只知道媽媽當天要上班，哥哥的去向則不清楚。
因為好奇理大的情況是否與新聞報道及社交媒體所指的一樣—他在NOW新聞、IG睇新聞見到有好兩極嘅立場，唔清楚報道上的係咪事實，所以決定入理大睇下。呢個決定無同屋企人講，因為他本來只係諗住睇下就走，唔會逗留好耐。報道講紅隧已經堵塞，所以他搭地鐵到油麻地站上地面步行到理大。他當時身穿深紅紫T、黑色運動外套、長色長褲、黑色波鞋，帶一個背囊。
他在油麻地地面行到一半就見到前面有一班人，唔係好清楚人數，著住便服、唔同顏色嘅衫，無裝備。他見到他們好似往同一個方向行緊，往理大方向，於是從後跟住佢哋進入理大。他由Z座落去行人隧道進入Y座嘅main campus。去到main campus他就見到著住反光衣（螢光黃色，身後有十字或FA字樣）的急救員、一啲著住反光衣的記者—背後有PRESS同掛名牌於胸口前。他亦有見到一啲比他年長的哥哥姐姐。啲哥哥姐姐無特別特徵，都係著住便服。他仲見到啲戴住保護裝備嘅人，如頭盔、防毒口罩等—唔係好記得多唔多呢類人，但有。
他入去時好平靜，人們都只是行嚟行去，當時大約1800-1900。他入去只係為咗視察環境，所以去咗各個出入口睇外面嘅情況。他去咗北橋（理大望出去的北橋）及正門出入口。他見到有啲示威者喺理大出面堆緊一啲障礙物，然後繼續睇校園裡面其他的情況。他見到示威者喺各個出入口駐守，坐喺到看守。當時他沒有做任何嘢，只係行同望，時間為1900左右。大概到2000-2100，現場附近嘅人傳嚟消息，同周圍嘅人講話喺外圍警方同示威者開始對峙。當時他覺得唔想牽涉其中，想離開，然後去返原本入嚟嘅入口，即Y座。
當時他見到Y座已被雜物堵塞，有再搵其他出口，去返去北橋嗰邊，見到警方同示威者對峙。見到咁嘅情況他就即刻離開該範圍，再去正門出入口。他由A座往外面看，見到同北橋的情況一樣，示威者與警方對峙，然後就返入較接近校園中心的位置。因為當時他都好驚，唔想牽涉喺入面，自己又無進行暴力行為。當時他尋找有無安全地方躲藏，亦有打電話比媽媽，先同佢講自己身處理大，但情況唔太好，亦離開唔到校園範圍；媽媽叫佢小心保護自己，搵安全地方躲藏。他有如媽媽所言，去咗T、U座之間嘅演講廳落一層，因為見嗰度係室內。
🎥播片
D2認得片中的地方為他躲藏的位置。當時他匿埋喺相冊第4頁第4張相，大概喺一個角落嘅位置。他一直留在該處用手機上網，當時唔知玻璃通向邊，亦望唔到外面。
附近嘅人會出去打聽消息，演講廳內有其他人，約10幾個，他不清楚是什麼人，沒有急救員和記者，沒有著黑色衫褲的示威者，只有著便服的哥哥姐姐，佢哋會去周圍睇附近的環境，然後返嚟同周圍嘅人講。D2聽到佢哋由對峙發展成衝突，所以當時睇網上的消息，當時聽到外面衝突聲音，聽到槍聲、爆炸聲同警車聲。
因為怕手機會無電，所以他只係好間斷地用手機上網；之後有再打電話搵媽咪，同媽咪講今晚返唔到屋企，媽咪叫佢情況好啲先離開。對話中有討論過媽咪去理大接他，但最終並無決定會嚟搵佢。呢通電話大概在2300左右發生。
他一直留在T、U座沒有離開，直至17日0700-0800，聽附近嘅人講話食堂有食物提供，因為前一晚無點瞓、食、飲水。著便服嘅哥哥告訴他食堂喺邊。到食堂他拎了兩包餅同水，當時見到有電視，可以睇新聞，但唔係即時。他睇到同前一晚喺網上睇到嘅一樣，好大火，好激烈。他又再聯絡媽媽，媽媽有嘗試過找他，但進入唔到理大範圍。自己唔係好清楚媽咪去到邊，媽咪繼續叫佢搵安全地方匿埋。因食堂太多人，D2不敢逗留太久，約0800-0900就先回到T、U座。他一直睇網上的消息，手機唔係好有電，遂向附近嘅人借了一次充電器。之後睇網上的消息，他睇到大概1400有警察中箭，好似有發射過水炮車。
他由一開始入去時平靜無事，無諗過情況會演變得咁快，可能當時真係低估咗個風險。之前他無親身去過示威現場，只有觀察過示威活動，無試過情況變得好壞。17日他繼續留在T、U座躲藏，上午和下午曾三度嘗試在各個出口（北橋、Y座和A座）找方法離開，當時見到外圍有警方的防線，亦見到警方已包圍校園範圍；他不想被警方誤以為係其中一分子，因為自己無參與暴動。
他有同媽咪講自己唔出去嘅決定—他同媽咪通電話3次，亦有用WhatsApp，媽咪都叫佢等情況好啲再搵方法離開。17日1630左右，現場的人傳出消息，話警方指現場人士正在參與暴動；D2當下認為如果自己行出去，會被警方當成示威者一份子，但自己其實咩都無做。之後他繼續留在校園，因為校園好大，有好多地方可以安全躲，都係T、U座。當晚1900-2000左右，他在T、U座聽到好嚴重嘅衝突聲，有槍聲、爆炸聲和警車聲，但比前一日更嚴重，他繼續躲藏、無離開，繼續睇網上消息。
他約2100收到警方指理大人士可以從Y座離開的消息，但同時亦夾雜其他消息。當時現場嘅人話曾經跟指示由Y座離開嘅人士都上索帶被捕，就連急救員同記者都被拘捕；亦有傳警方曾在Y座施放催淚彈，示威者有在Y座以汽油彈還擊。他當時無決定由Y座離開，因為覺得跟指示離開都會被捕，同埋出去就有危險，因為雙方有衝突發生緊。他有透過WhatsApp通知媽咪呢個決定，當時無即時收到回應，其後她有回應，都係叫佢睇情況好轉至離開。
當晚他有離開T、U座，因為T、U座的衝突聲好大聲，令他好不安，所以搵咗個校園中心嘅地方躲藏，大概係M座對出下方嘅花園，跟住有曾經再到食堂拎餅，沒有拿水。之後他回到M座對出的位置，凌晨時有小睡片刻。18日凌晨5點左右，他聽到火警鐘一直響，見到正門出入口好大煙。當時他覺得好唔舒服，皮膚刺痛，氣味好難聞。他無做任何嘢，仲係諗緊有無方法離開校園。他從現場的人口中得知，警方曾在正門衝入校園拘捕示威者；然後他聽到有人話去Y座一齊離開，當時他沒有跟隨，因為見到前一晚經驗，想睇下佢哋最終決定係咪從Y座離開。
其後他見到人們折返到M座向正門出入口，然後見到佢哋一大班人，其中有急救員和記者，當時就覺得應該係所有人一齊離開。他覺得跟住急救員同記者離開會安全過獨自留在校園內，於是決定跟佢哋走。入大隊行咗一陣就有一個陌生男人手抱住一啲裝備給他，叫他小心啲，然後就離開了。他之前無再見過呢個男人，唔清楚佢咩年紀；男子有戴住一啲保護裝備，如頭盔和豬咀。對方給了他一個頭盔、一個全新防毒面罩、一對手套、一條面巾及兩枝生理鹽水。當時他見到前面嘅人行得好快，又見呢啲只係保護裝備，所以就收下，隨後戴上頭盔、防毒面罩及手套，面巾同生理鹽水則放入背囊。因為現場氣味好難聞，煙令皮膚刺痛，所以戴上了防毒面罩同手套。他有著住長袖黑色運動外套，然後跟住前面嘅人行去正門出入口，見到一大班人沿紅磚樓梯跑落去，亦見到有急救員同記者從另一個方向（A座附近防火門落地面）離開，自己亦跟佢哋落去。
當時他跟住救護員同記者落到正門出入口，即圖片位置（控方開案陳詞附件9）。圖2-7係他跟住救護員到達暢運道，圖8-12係他見到正前方科學館無警方防線、平靜，咁就跟住著反光衣的人向前行。他看到地下有雜物和藍色水。行到科學館道，條路係轉彎嘅，行到一半視線愈嚟愈矇，當時聽到有槍聲，意識到警方施放咗催淚彈。當時行多幾步就見到有警方防線，見到警方用槍指向佢哋，然後見到前面的記者及急救員向佢哋嘅右手邊跨過咗一個停車場。當時時間好短，D2跟前面嘅人去一個無咁大煙嘅地方。圖13是他入咗停車場，見到班人打開咗道門，就跟佢哋入去，自己並無打開道門。
佢一直跟住前面嘅人，感覺室內嘅地方會安全，因為警方施放催淚彈，個身好唔舒服，同埋驚警方同示威者發生衝突。佢聽到一個保安員叫佢哋坐喺度休息，當時受催因淚煙影響同埋好熱，就想除咗件外套同埋換咗件衫。他有在電梯大堂角落位坐低休息。他有多一件衫喺背囊，因為本身做運動都會帶多一套衫去換，怕做完運動會濕曬或者污糟。衣服在16日之前已經喺背囊，自己帶了做運動用的背囊出去。他有在科學館換衫，換咗白T恤。
就控方指稱圖21起的相中人都是自己，D2予以否認，因為他已不太記得自己當時身處位置。第14頁的相片見到有一頂帽和面巾：帽應該係因為他冇執袋，連埋T留喺背囊入面，係屬於他嘅。18日當天他無戴過頂帽，面巾係陌生男人給他的。第17頁的兩對襪都是之前留了在背囊裡面，同T恤一樣放咗喺背囊無執出嚟。他案發時唯一見到藍色水的時候是離開理大時見到的小水塘，可能係當時濺到藍色水。電筒屬於他，放在背囊大格的內格、近背囊位置—因為好耐之前他同媽咪去行山會帶電筒，無執出嚟。生理鹽水放在背囊外面嘅細格。
換衫之後他有即時再WhatsApp搵媽咪，睇下佢可唔可以接自己走；但當時他未聯絡到媽咪就被警方拘捕。當時有一個保安員拎咗三個垃圾膠袋，叫他們將物品丟入去，唔好整到周圍都係。他聽從保安指示丟掉裝備是因為認為已經到達一個安全的地方，那些裝備已經不需要使用。紫紅T都丟咗，因為當時件衫好污糟同埋有好濃的催淚煙味。
-D2作供未完-