#1112上水 #審訊（7/5） 15/7/2021

================

8/8/2021 後補資料，下午進度

~D3律師show 4張DW3拍的照片，逐一詢問，DW3作答。

第一張 : 忘記在哪裡拍，時間是2017。相中右邊支架有索帶，將兩個帳篷索在一起。

第二張 : 典禮中的backdrop （banner）。圈圈是用索帶穿的，固定在鋁架上。DW3忘記拍攝時間。

第三張 : 黑色索帶是用來穩固電線。DW3忘記拍攝時間及地點。

第四張 : 一位工人戴住手套手揸磨機鐵板中。DW3稱因為鐵板爛了，要維修。DW3忘記拍攝時間。

~D3律師申請將此四張相做証物（D20）。

~D3律師 : YP3同YP3 Engineering係唔係同一樣嘢？

DW3 : 係。

~D3律師 : 你2019年11月初約咗D3，叫佢10:00-11:30pm返到倉庫開工。係唔係冇固定嘅上班時間？

DW3 : 係彈性嘅，就器材幾時返，可能再夜d。

~D3律師 : 嗰晚D3嘅工作係乜？

DW3 : 維修機械、機器、舞台板、喇叭同埋喇叭stand。

~D3律師 : 點解要維修？

DW3 : 因為早兩日，即係2019年11月10日，西貢有起步禮。出完節目，舞台、背板、音響同埋線材返咗倉，要跟返。

~D3律師 : 剛才証供有兩叠相，有冇相係嗰個活動嘅？

DW3 : D19，圖6。

~D3律師 : 2019年11月12日，D3要返工，嗰日你喺度嗎？

DW3 : 喺度。本來約咗10:00-11:30pm安排佢做事，去到幾夜，未見到佢上班。打比佢，電話又唔通。第二朝打比佢哥哥問乜嘢事，先至知佢比警察拘捕咗。

~D3律師主問完畢。

~D1及D2律師沒有盤問。

主控盤問

~主控 : 你係唔係YP3嘅僱員？

DW3 : 唔係。

~主控 : 你自己有公司？

DW3 : 冇

~主控 : 咭片？

DW3 : 冇

~主控 : 你同YP3有冇書面合約？

DW3 : 冇

~主控 : D3第一次幫你做散工係幾時？

DW3 : 約5年前，即2016年左右。

~主控 : 2019年11月，唔計12號嗰次，佢幫你做咗幾多次散工？

DW3 : 唔記得。

~主控 : 大約呢？

DW3 : 由2016年到而家，冇可能清楚佢做咗幾多次。

~主控 : 由2016年第一次幫你做散工，去到2019年11月12日呢？

DW3 : 唔記得。

~主控 : 出糧有冇記錄？

DW3 : 冇，全部現金交收。

~主控 : D3律師問你有幾經常見D3一次，你話個幾月，仲包括去飲茶。

DW3 : 真係唔記得。

~主控 : 2019年1至11月，D3做咗幾多次散工？

DW3 : 唔超過10次。

~主控 : 幾多次舞台？幾多次倉？

DW3 : 唔記得。

~主控 : D3嘅哥哥係長工定散工？

DW3 : 散工。

~主控 : 你話12號嗰晚叫D3返去返工，係因為涉及器材。你搵咗幾多人返去做？

DW3 : 計埋自己4個，即係3個散工。

~主控 : 嗰3個散工係計埋D3？

DW3 : 係。

~主控 : D3當晚被拉，另外兩位散工呢？

DW3 : 做緊嘢。

~主控 : 相呢？

DW3 : 冇必要一定要影嘅。

~主控 : YP3老細點知你搵咗幾多個人呢？

DW3 : 佢話搵4個，就4個人。

~主控 : 你要影相比老細，報出糧。

DW3 : 我冇咁講過要報出糧，只係影相比佢睇。

~陳官 : DW3係正確嘅，佢之前話影相係要1. 留記錄 2. 比老細知確實有人返工 3. 比老細知道工作進度。

~主控 : 咁d相喺邊度？

DW3 : 嗰日冇影到相。

~主控 : （展示相P27，黑色口罩）你可唔可以話比法官聽呢個口罩用乜嘢質料？

DW3 : 唔清楚。

~主控 : 防麈嘅功效連我而家戴緊嘅都不如。

DW3 : 唔同意。

~主控 : 向你指出，你指出嘅P27口罩唔能夠防塵。

DW3 : 唔同意。

~主控 : 你話喺舞台上換場景需要用面罩遮蓋身體，但換場景會熄燈，熄燈後，唔戴面罩亦都睇唔到。

DW3 : 唔同意，因為會有少少燈，如果唔係，工作人員點換場景？

~主控 : YP3嘅倉庫有幾大？

DW3 : 冇認真度過。

~主控 : 你做呢行對尺寸冇概念？

DW3 : 1000呎左右。

~主控 : 出去工作係用D19圖8嘅貨車運工作材料去場地。咁大嘅倉有冇急救箱？

DW3 : 冇，唔齊全。(諗咗一陣又補充) 有，但冇葯水膠布、生理鹽水。

~主控 : 咁有d乜嘢？

DW3 : 乜都冇，只有個箱。

~主控 : 有冇叫老細潻置急救用品？

DW3 : 冇叫老細補充，唔會知道佢會唔會補充急救用品入急救箱。

~主控 : 有冇問老闆？

DW3 : 冇。

~主控 : 點解唔問？

DW3 : 老闆唔會理。

~主控 : 點解冇問？

DW3 : 明知佢唔會做，問嚟冇意思。唔係長工，唔會問咁多，最實際係自己帶。

~主控 : 你喺佢場地工作，幫佢工作，就算見到急救箱係「吉」，亦從未問老細？

DW3 : 冇，因為自己有（急救用品）。

~主控 : 如果工人整損手，你會用生理鹽水做消毒？但鹽水冇消毒作用，只可以洗傷口。

DW3 : 通常用電線膠布止血，先倒鹽水沖，再加電線膠布紥住傷口，再開工。

~主控 : 電線膠布冇消毒？

DW3 : 知道係冇消毒，但經常咁樣做。

~主控 : 喺倉工作，冇膠索帶提供？

DW3 : 有嘅。

~主控 : 喺倉返工就用膠索帶？

DW3 : 係。若出外工作，要袋埋。

~主控 : 外出工作，要預埋膠索帶？

DW3 : 係。

~主控 : 既然倉有，出去做嘢又可以帶出去，咁唔使上班前帶幾十條膠索帶啦！

DW3 : 一pack有100條，要帶出去做嘢。如果忘記咗從倉帶，隨身都有。

~主控 : 照你咁講，去完場地，有用膠索帶，用剩嗰d會擺喺度？

DW3 : 係損耗品，只有預多，唔會預少。

~主控 : 安裝完之後，唔使交返？

DW3 : 係，散工更加要，就算下次唔係佢哋接佢工作。

~主控 : 索帶歸佢哋？

DW3 : 唔值錢，帶多無妨。

~主控 : 老細會問嗎？

DW3 : 唔會問呢d事，冇就買。

~主控 : 根據你嘅講法，眼罩、口罩、手袖、生理鹽水、手套係D3出錢買嘅？為咗做散工？

DW3 : 唔係專幫我，散工都係咁樣嘅裝備。

~主控 : (展示D19圖6)。

DW3 : 係一個慈善跑步嘅活動，係2019年11月10日7am開始，中午12pm結束。圖中影嘅已經完成咗，準備拆嘢搬返倉。

~主控 : 點解唔11月10日或者11日，要等12號先至處理？

DW3 : 因為亂，要call人做，唔係即刻返去就即刻可以處理。

~主控 : 你接呢個工作係一早知道係半日，點解唔預早搵人？

DW3 : 因為冇時間，要先check邊度壞。運作唔係咁樣嘅。

~主控 : 邊個檢查邊度壞？邊度要維修？

DW3 : 長工。由佢哋話比我聽。之前有話比我知有呢個節目，叫我返嚟後跟返d器材。

~主控 : 11月10日唔使跟？

DW3 : 嗰日只係拆嘢，返嚟先至跟。話11月10日有活動，叫我哋11月12日執埋倉，順便維修。

~主控 : 呢個長工用乜嘢途徑聯絡你？

DW3 : 電話。

~主控 : 乜嘢要維修？

DW3 : Backdrop 、喇叭。

~主控 : D3主問話當晚（12號）要維修喇叭架。係乜嘢機器要維修？

DW3 : 喇叭架開唔到閂唔到。如果click住郁唔到，要拆開維修。

~主控 : 當晚D3要維修喇叭d乜？

DW3 : 甩咗線、消咗嘅線、甩喇叭線。Fuse喺喇叭入面。

~主控 : D3識電工？

DW3 : 基本嘢，唔使電工。13A fuse，係一般家庭電器插蘇。

~主控 : 喇叭唔平嗎？

DW3 : 唔平，$20000幾一隻都有。

~主控 : 老闆知你用散工換fuse？

DW3 : 知。唔使特登用千幾二千蚊嘅人換fuse。

~主控 : 呢個喇叭fuse唔係家庭電器嘅fuse咁簡單。

DW3 : 就係咁簡單。只要揭開睇下就知，撬出嚟睇下就知。

~主控 : D19第三張相，行緊落舞台嘅係D3。點解公司叫散工代表領獎？

DW3 : 呢個獎冇預計頒比做嘢嘅公司。

~主控 : 所以唯有叫D3上去？點解唔係你？你高級過佢？

DW3 : 因為我要睇住個panel，睇住個收音mic。

~主控 : 呢個唔係歌唱節目？

DW3 : 呢個係合唱節目。

~主控 : 頒獎時完咗啦！

DW3 : 之前古箏，要set mic。

~主控 : 你出糧比散工有冇記錄？嗰個公司出糧比你比散工有冇記錄？

DW3 : 冇。

~主控 : 如果公司出4個散工嘅糧比你，都唔會有記錄？

DW3 : 公司點消條數，就唔清楚。

~主控 : 你唔使叫散工簽返張收據？

DW3 : 我做咗10年，係互信。下下憑據，複雜好多。

~主控 : 呢間YP3係有限公司？

DW3 : 係無限公司。

~主控 : 公司聽你報上去話搵咗幾多個散工，就出糧比你？你哋做咗幾多個鐘？

DW3 : 9個鐘為一工。OT : $80/hr。只做2小時亦為一工計。一工係＄600~$800，熟手就高d人工。

~主控 : 如果咁講，公司更加要知道有幾多人返工！

DW3 : 做咗10年，有互信機制。公司相信我老實，唔會呃錢。我唔會毁咗自己嘅名聲。

~主控 : 向你指出，你2019年11月12日並冇約D3返去貨倉工作。

DW3 : 唔同意。

~主控 : 你話你約咗佢返工，呢個講法係砌詞，幫佢脫罪。

DW3 : 唔同意。

~主控 : 佢當時身上所帶嘅物件（面罩、口罩、膠索帶、眼罩、手䄂、生理鹽水）唔係當晚返工用。

DW3 : 唔同意。

~主控盤問完畢。

~D3律師沒有覆問。

~D3律師申請DW3五日証人費。經陳官了解後，改為七日証人費，並且獲批。

~陳官問D3律師有沒有結案陳詞。D3律師稱未必有，因為陳官已經有詳細記錄。

~定於2021年8月11日上午十時於粉嶺裁判法院五號庭續審（結案陳詞）。

~裁決日期 : 2021年9月16日（時間未定）

~D1、D2、D3以原有條件轉擔保。