#1112上水 #審訊（7/5） 15/7/2021

================

8/8/2021 後補資料，上午進度

DW2作供 :

主控盤問

~主控 : D2離開公園時的裝束（手套+頭巾）係當時暴力示威者的裝束？

DW2 : 同意

~主控 : 點解唔提醒佢呢？

DW2 : 係慣常運動的衣飾，網上亦咁樣做，唔覺得有問題。

~控方 : 你話自己讀心理學，你覺得冇問題？當時的社會環境……D2的衣著……「夜媽媽」……易惹人誤會，冇想過會惹麻煩嗎？

DW2 : 唔會。只係做運動，行得正，企得正。當時冇刻意迴避深色衣服，裝束如常。

~主控 : 相信你歸家途中見到警員，唔會掉頭走卦？如果警察叫你停低，你會停低？

DW2 : 同意。

~主控 : 你話自己9:30pm做完運動，沿新運路行返屋企？

DW2 : 係

~主控 : 喺D10第18張截圖，照你講法，你係跟綠色箭咀，打星星的位置離開公園，去新運路？

DW2 : 係

~主控 : 你當晚去到路口附近，有冇發現啱啱有示威完的痕跡？

DW2 : 冇

~主控 : 馬路上冇垃圾桶、行人圍欄、磚塊？路邊都冇？

DW2 : 冇

~主控 : 交通燈運作正常？

DW2 : 係

~主控 : D10第18張圖見到掃管埔路。如果有一架車沿此路經過廻旋處，再喺新運路上面駛過，這車一係沿掃管埔路直去，一係沿半圓形分叉路駛去新運路 ; 嗰條半圓形分叉路，你所指的雙槓設施其實很近分叉路的彎頂……

（此時陳官表示唔明主控講乜🙄）

~主控努力解釋 : D10第18圖……用藍星標示雙槓、單車徑……在燈柱位，係支路……

（陳官仍然唔明）

~主控 : 即係雙槓設施近支路燈柱。

DW2 : 冇留意。如果睇地圖可能會知。

~主控 : 去咁多年都唔知？

DW2 : 唔清楚。

~主控 : 你話做運動做到9:30pm？

DW2 : 係

~主控 : 其間有冇聽見燈柱支路嗰邊有噪音、人聲？

DW2 : 冇

~主控 : 有冇聽到有人大聲叫 : 「唔好走」？

DW2 : 冇

~主控 : 你知唔知D2就喺嗰個位被捕？

DW2 : 唔清楚

~主控 : 你留到9:30pm，完全聽唔到任何人聲？

DW2 : 係

~主控 : 我向你指出 ，你當晚根本冇同D2一齊喺北區公園做雙槓運動，同意嗎？

DW2 : 唔同意

~主控 : 你喺法庭所作關於當晚你同D2喺8:30至9: 00喺公園做運動係大話，係為佢脫罪。

DW2 : 唔同意

~主控 : 如果你當晚在場，冇可能聽唔到新運路路口有人叫口號。

DW2 : 唔同意

~主控 : 如果你去上述公園，冇可能見唔到有示威堵路事件。

DW2 : 唔同意

~主控 : 如果你有去，冇可能見唔到有示威堵路的痕跡。

DW2 : 唔同意。當晚行返去，並冇異樣。

~主控 : 如果你當時喺D2離開公園，自己留喺公園做運動，冇可能聽唔到喺附近追捕人時所發出的噪音。

DW2 : 唔同意。我補充，單獨練習要好集中。我帶住AirPods聽音樂練習，好容易對周圍環境未必好注意到。同我一齊鍛鍊的朋友有時會打趣咁講，我單獨練習時，好似入咗異空間。

~主控 : 你挑選咗一系列相呈堂（証物D9）。冇一幅相顯示D2帶頭巾或者頭箍？

DW2 : 係

~主控 : 亦冇一幅相顯示D2帶任何形式手套？

DW2 : 係。補充 : D2有時教班會戴上，但影相時為咗美觀，佢通常會除低手套或者頭巾。其他學員其實都會咁做 ，例如P13圖20，做V手勢的男學員，佢幾乎每次鍛鍊會帶頭巾同手套，只喺訓練完畢，影相時會除落嚟。所以喺訓練完後，影相時將手套或者頭巾除低，係一個會出現喺我哋訓練班嘅行為，而D2亦有呢個習慣。

~主控 : 所以你搵唔到任何一張相顯示佢帶頭巾？

DW2 : 係，因為一般做運動時唔會影相留念。

~主控 : D9全部相都冇顯示任何人戴嗰對白色勞工手套？

DW2 : 係。

~主控 : 向你指出，當晚D2戴勞工手套同面巾並非你証供所講為做運動用。

DW2 : 唔同意 。

~主控 : 向你指出，D2當時戴白勞工手套同黑面巾係為咗參與非法集結時掩飾身份用。

DW2 : 唔同意。我重申我同D2當晚相約喺北區公園如常練習，而頭巾同埋手套都係D2慣常會穿上嘅裝束。

~主控 : 你話白手套係D2慣常用嘅裝備之一。之前問你手套顏色，你諗咗一段時間。

DW2 : 係。因為D2慣常用嘅勞工手套黑色同白色都有，而佢轉換手套速度頗快，所以本人好難記得，要諗先記得佢當晚用白色定黑色手套。

~主控 : 你當時要諗一諗先至勾起你嘅記憶？

DW2 : 係。

~主控 : 向你指出，如果你嘅講法係真，D2經常轉換手套，你冇可能喺2021年7月記起當晚佢用乜嘢顏色手套。

DW2 : 唔同意。因為翌日我知道D2被捕嘅消息，所以唔多唔少會對案發當日同D2練習嘅經歷，留有比較深刻嘅印象。

~主控 : 你記得主問時，你對D2律師講冇印象D2離開時有拎嘢？

DW2 : 當晚佢帶乜嘢，同佢離開時有冇戴手套係兩個問題。

本人答案都係一樣。D2當晚裝束同佢有冇手執任何東西係兩個問題。

而點解本人會記得一d details，例如 : 佢帶乜嘢顏色手套，或者遺漏其他記憶，例如 : 佢帶住乜嘢走，心理學都知人嘅記憶係幾咁神奇，我冇可能控制到本人事後會記得乜，唔記得乜。本人只係就腦海中當晚嘅記憶，喺法庭上如實相告。

~主控 : 所以喺D2被捕嘅第二日，你話比自己聽記住佢當晚戴d乜？

DW2 : 唔同意。

~主控 : D2走時冇揸住水樽？

DW2 : 冇印象 。做咗一個鐘頭運動，再去第二個地方做運動，係要補充水份。但據本人認知，D2甚少自行帶水樽，因為佢大多用場地嘅飲水機補充水份。

~主控 : 你影嘅相，睇唔到你所講嘅飲水機？

DW2 : 睇唔到。

~主控 : D10、D4係你影嘅？

DW2 : 係

~主控 : 可唔可以話比我哋聽相中邊個位置有飲水機供應？

DW2 : 唔清楚北區公園有冇飲水機。

~主控 : 向你指出你作供，特別涉及案發當晚事情，冇如實講，係講大話為D2脫罪。

DW2 : 唔同意。

~主控完成盤問。

D2律師覆問

~D2律師 : 你話當晚唔太凍，所以冇身水身汗？有冇印象當晚幾多度？

DW2 : 18~20度。當日冇帶更換衣物，因為習慣如果出門前判斷氣溫較高，同埋訓練完要更替衣服，當天晚上理經帶多一套衣物。

~D2律師 : 控方建議D2唔使戴頭箍，因為佢頭髮唔長，唔會拮眼。當時你答唔同意？澄清，係佢頭髮唔夠長，唔使帶頭巾防止拮眼，你唔同意？

DW2 : 本人唔同意控方指D2根本唔使帶頭巾，因為即使頭髮唔長，但汗會從「的水」或者「d陰」流入眼內。

若果汗水流入眼球係好唔舒服嘅，會大大影響運動表現。而根據本人所知，D2尤其討厭汗水沿「d陰」滴入眼球嘅情況。

其二，頭巾除咗箍頭髮外，仲有起到保護作用，例如D2做「側平板」（手踭掂地），會將頭巾墊喺手踭位，防止皮膚擦傷同屈得唔舒服。

此外，D2練習倒立前，有用「頭手倒立」做熱身嘅習慣，呢個時候D2會將頭巾墊喺頭髮上面完成「頭手倒立」，去防止整污糟個頭。

~D2律師 : 証物D10，第4圖，盤問時你話設施係「拉背」，主控指出係「練腹肌」，記得嗎？

DW2 : 記得。

~D2律師 : 你話呢個設施係「拉背」係自己理解？

DW2 : 印象中，康文處指引，對該項設施解釋係用作「伸展背肌」。

控方提及用該項設施鍛鍊腹部，本人未做過，亦未見其他人做過。

~D2律師 : （Show放大咗設施牌嘅圖片）有冇印象盤問時，控方指住凳下面嘅馬騮架設施？你話唔清楚。主控問如果有馬騮架，唔使去其他地方？唔使去維翰路？

係唔係所有馬騮架都適合做「……頭式」引體上升？

DW2 : 唔係。因為 :

1. 要睇馬騮架附近有冇兒童遊玩設施。如果有，馬騮架會有好多小朋友爭住用，例如 : 粉嶺站遊樂場就有一個紅色嘅馬騮架，但係附近有滑梯等嘅兒童遊樂設施，所以該地點長期有小朋友爭住用馬騮架。自己同D2會避免喺呢類比較多小朋友歡迎嘅地點做運動。

2. 視乎馬騮架嘅長度。做某d動作例如「潛水……」，需要一格一格咁前進。如先前提過，動作每組需要完成嘅次數係8~12下。馬騮架長度最少需要8格，先至適合做鍛鍊。

除咗長度，馬騮架高度亦同樣重要。若果太矮，伸展雙腳時會掂地，唔方便 ; 例如雍盛苑內有一個太矮嘅馬騮架，我哋亦唔會去做鍛鍊。

~D2律師 : 盤問時，解釋過勞工手套減少跣手同埋磨擦。主控問 : 「起繭同甩皮唔係因為皮膚同粗糙嘅嘢磨損受傷咩？」當時你答皮膚同粗糙面磨擦，與皮膚同單槓磨擦係兩個等級。可唔可以解釋係乜嘢原理？

DW2 : 當手套嘅粗糙面同皮膚接觸，相對上手掌同單槓產生嘅磨擦會變少咗。

~陳官 : 如果帶勞工手套，單槓嘅磨擦會變少咗？

DW2 : 係。勞工手套嘅粗糙面反而會卡住皮膚，唔會產生過多磨擦。

~D2律師 : 証物D9（圖33），主控問過粉紅色嘅女裝手套係$33。係截圖所寫？還是自己知道？

DW2 : 截圖所寫。係本人搜尋嘅美國網站，圖下有示大概係$20港幣。若加運費，手套至少需要$50以上。而據本人認知，一般門市若係冇牌子健身手套，價錢由$50~$100。

~D2律師 : D9係唔係你FB專頁上嘅圖片？

DW2 : 唔係。

~D2律師覆問完畢。沒有其他辯方証人。

~D2律師呈上一糸列文件（包括D2的驗身醫療報告、嶺大畢業証書、嶺大空手道教練証書、亞洲城市金杯獎獲獎証書、世界青年跆拳道出席証明、跆拳道黑帶一等級証明……），要求加入為証物。

~除D2的驗身醫療報告外（陳官說可稍後以書面陳詞呈上），其他獲接納為辯方証物（D12~D17）。

~D1及D3律師沒有盤問。

~DW2作供完畢。

DW3（梁生）作供 :

D3律師主問

~D3律師請DW3介紹自己及與D3的關係。

DW3 : 我係舞台音響判頭，因為D3哥哥幫我做嘢而認識，有五年。我同佢係判頭同散工嘅關係，搵佢幫手做舞台搭建、音響器材。

~D3律師 : 你同D3幾耐見一次？

DW3 : 冇定。去佢做嘢嘅茶餐廳時會見到佢，大概個幾月會見一次。D3正職係喺茶餐廳做水吧。

~D3律師 : 你哋見面時做d乜嘢？

DW3 : 我食嘢或者約佢開工。

~D3律師 : 幾耐一次？

DW3 : 冇一定。

~D3律師 : 2019年11月有冇見過D3？

DW3 : 有。11月初見過，去佢做水吧嗰間餐廳飲茶食嘢，順便叫佢11月12日開工，大概晚上十點至十一點。

~D3律師 : 可唔可以解釋「舞台工作」係做d乜？

DW3 : 搭建舞台、音響器材嘅set up、場地上嘅set up、排凳。

~D3律師 : 工作嘅地點呢？

DW3 : 舞台、場地。

~D3律師 : 其他地方？

DW3 : 喺倉庫做維修、後勤，放好器材，準備下一次出活動嘅器材。

~D3律師 : 倉庫地點呢？

DW3 : 葵涌

~D3律師 : 點解要搵散工？

DW3 : 因為音樂舞台唔穩定，長工只有幾人，需要判頭搵人開工。

~D3律師 : 每次要幾多個散工？

DW3 : 一般3、4個，取決於做d乜。

~D3律師 : 散工嘅職責係乜？

DW3 : 好廣泛。如果出活動，跟舞台變化工作。11月12日係叫D3喺倉內做維修嘅工作。

~D3律師 : D3知唔知道要做維修？

DW3 : 佢知要返倉，但唔知道要做乜，因為要返到去至安排到。

~D3律師 : 可唔可以詳細講下散工嘅工作？

DW3 : 維修backdrop掛banner 嘅板。好多塊舞台板做成一個大舞台，維修喇叭stand，維修線材。

~D3律師 : 即係準備下次用嘅器材，安置器材，維修？

DW3 : 係。

~D3律師 : 一般嘅上班時間係點？

DW3 : 晚上。由於同埋人少d，可以將器材拎出走廊做維修，比較方便。

~D3律師 : 舞台係點樣做？

DW3 : 安排所有器材數量，一批一批出。Standard d器材，做好安排，先至出場地裝嵌，喺倉內安排好先。

~D3律師 : 點樣由倉去到場地？

DW3 : 背景板標準尺寸係4呎x8呎，要喺倉內裁好（切割）先至出去。

~D3律師 : 背景板嘅物料係乜嘢？

DW3 : 木。用手提磨機去裁。

~D3律師 : 佢哋一般裝束係點？

DW3 : 黑衫、黑褲、口罩、眼罩、手袜、手袖、索帶。

~D3律師 : 點解要黑衫黑褲？

DW3 : 一般出活動（舞台上），盡量用布料遮蓋自己嘅身體，唔好喺舞台上暴露自己，因為轉場景時，工作人員喺黑暗中將場景轉變，唔好太「養眼」。

喺倉入面上班，亦都係呢d衫，因為用機械嘢，要眼罩、手套保護自己。

~D3律師 : 保護性裝備仲有d乜？

DW3 : 口罩、生理鹽水（消毒用）。

~D3律師 : 點解要用索帶？

DW3 : Banner要用索帶固定 ; 安排座椅時，最多15張一排，因為消防條例，要固定。

~D3律師 : 喺倉庫中亦都有需要？

DW3 : 係。喇叭線同訊號線亦都要用到索帶。

~D3律師 : 點解返倉庫亦都要黑衫黑褲？

DW3 : 一般返工都係咁著。

手䄂同口罩，由於要鐵同木，喺倉庫亦要用，可以防塵。

~D3律師 : 倉庫上班係唔係要用手袖？

DW3 : 唔需要，但會帶，全天候。

~D3律師 : (Show 相一叠，共8張)你有冇印象呢d相？

DW3 : 有，我影嘅。

~D3律師 : 點解會影？

DW3 : 因為要留記錄。老闆要confirm有冇人返工，同埋知道進度。

~D3律師 : 呢d相同証供有冇關係？

DW3 : 有。

第一張，喺倉庫度做維修，將d嘢放晒喺走廊。圖中嘅人維修緊，佢哋係散工。張相係2019年8月影嘅。

~D3律師 : 第二至第六張，同証供有關係嗎？

DW3 : 有，呢個係場地裝配。

第二張 : 係掛d燈上去，2019年12月初影嘅。第二同第四張相係同一個場地，第三、五、六張相係唔同場地。

第四張 : 用升降台掛燈，右下方兩個人喺度set場地，佢哋係YP3公司嘅人（DW3安排散工幫YP3做搭建）。

第三張 : 圖中係一個學校典禮。

舞台上嘅人係D3，佢代表YP3去收感謝狀，2017年影嘅。

第五張 : 係九龍灣展貿，2017年影，亦都係場地佈置。兩個員工掛燈上去，設置音響、鋪線。

第六張 : 西貢郊野公園，黃石嗰邊，2019年11月10日影。

~D3律師 : 與証供有關嗎？

DW3 : 係。係舞台仔，backdrop 係要搭建嘅。

第七張 : 馬灣一條村。正在搭建舞台板。相中見到D3用索帶穩固枱板嘅支架，令佢唔好鬆。2018年3月影嘅。

第八張 : 公司貨車。運載器材去場地搭建。忘記咗幾時影呢張相。

~D3律師申請將這些相片列為辯方相集D19。

~D3律師 : 之前提過一d工具，仲有冇其他呢？

DW3 : 面巾，上台時要用。

~D3律師 : 索帶係乜嘢顏色？

DW3 : 視乎乜嘢banner。深色banner 用黑色，淺色banner 用白色。索帶長短不一。

面巾一般係黑色，遮住眼以下嘅位置，圍住塊臉，遮蔽樣貌唔暴露喺舞台上。手袖亦都係黑色嘅。

眼罩係木同鐵嘅時候保護眼睛用。

眼罩一普通3M眼罩，用嚟避開木屑同埋鐵碎。

手套一操作磨石時保護手，因為鋒利會整損。一般係3M牌子，灰色。

磨機一係手提式。

~D3律師 : 以上工具由邊個供應？

DW3 : 除咗磨機外，係自備。

~D3律師 : 所以係一袋裝晒入去？

DW3 : 係。

~D3律師 show P23~P30証物比DW3睇。DW3逐一去認及回應 :

P23（面罩） : 遮蔽臉及上舞台時用。DW3示範如何用作包住臉部及下巴。

P27（口罩） : 係磨機木時防塵用。

P25（索帶） : 用嚟索實banner，固定圓圈，索住d凳，固定舞台下面嘅腳架。

P26（眼罩） : 防止木碎同紙碎彈上眼。

P28（手套） : 操作機械（手提磨機）及搬運帶用，以防整到手，有防滑作用，唔會跣手整親腳。

P29（生理鹽水） : 洗傷口，整親時用。

P30（手袖）: 上舞台時遮住手，做嘢時會除落嚟。

P24（袋） : 散工開工時將以上物品放喺一個袋中。