1-Practical General Epidemiology

عدنا والعود احمد

اول سكشن وبسم الله توكلت على الله ولا حول ولا قوة الا بالله وبسم الله نبدأ:

الصحة: بتقولك منظمة الصحة العالمية ان الصحة مش مجرد غياب المرض بل هي اكبر من كدا بكثير هي حالة من الكمال والكمال لله طبعاً الجسدي (physical) و العقلي (mental) والاجتماعي (social).

المرض: ده بقا عكسها مش الكمال لا المرض هو اي pathological condition (عوامل مرضية) بتتداخل مع وظائف الجسم وتتسبب في اضعافه يبقا كدا الجسم معدش كامل وكدا نقدر نقول حصل مرض.

وعشان احنا ناس كريتيف منظمة الصحة العالمية كانت حاطة درجات على اساسها نحدد الصحة بتاعت الانسان ده بومب ولا لا:

١-اولهم Ideal health: وده باختصار شديد الكمال المطلق حسب معايير حطتها WHO وعشان اطمنك الكمال المطلق ده غير موجود اصلا لان مفيش انسان ممكن يكون كامل نفسياً وجسدياً واجتماعياً دايماً الانسان ناقص وعشان كدا المستوى ده محدش واصله ومع ذلك هو لسه معنا في القائمة من باب التكريم.

٢-ثانيهم Positive health: دي بقا معقوله شوية حالة صحية يكون الجسم كويس الى حد ما وعقله تمام وعلاقته مع الناس كويسة ولو حصل اي تهديد للحاجات دي بيقدر يهزمه ويرجع الامور الى مجاريها.

٣-ثالثهم Negative or marginal health: وده بقا انسان ظاهرياً لا يشكي من اي مشكلة وتمام صحته وكل حاجة لكن مع اول دور برد ينام في البيت وده نوع تخاف عليه لانه الانسان لو امامك عجوز ولا حاجة انت هتخاف عليه وهتمنع تعرضه للخطر انما الشخص ده بيكون ظاهرياً صحته زي الحصان لكن ما اول حاجة تهدد الصحة دي ممكن يموت.

٤-رابعهم Unapparent (pre-clinical) disease: وده بقا شخص مريض بمرض لكن هو مش عارف وتلاقي المرض بينهش فيه من جوا تلاقي عنده ارتفاع ضغط الدم وهو مش عارف وبالصدفة كدا دخل يكشف عشان عنده صداع الدكتور يلاقيه عنده الضغط.

٥-خامسهم Apparent disease: وده بقا انت عندك مرض وباين عليك اعراض وانت عارف ان عندك مرض والناس شايفة ده وده لازم يتلحق ويتعالج والا هننتقل للمرحلة التالية.

٦-الموت 🤷‍♂️ صحتك زفت وبتقل وانت ولا داري طبيعي تموت.

Epidemiology:

زي ما قلت لكم في تفريغ المحاضرة الثانية ده لو كنتم فاكرين طبعاً الترجمة الحرفية علم دراسة الاوبئة لكن ده طبعاً مش دقيق لان مش كل مرض تحول لوباء ومع ذلك بندرسه في العلم ده، فهو على يهتم بدراسة الامراض وتوزيعها والعوامل المؤثرة على هذه الامراض (distribution and determinants) وعشان ندرس المرض والحاجات دي لازم تسأل نفسك خمس اسئلة:

 1-What ماذا؟

2-when متى؟

3-where اين؟

4-who من؟

5-why/how كيف ولماذا؟

(حاسس اني في درس قواعد سيكة)

المهم راح مسك لك الخمس اسئلة دول وقسمهم الى نصين نص سموه Descriptive epidemiology وده انت عايز وصف للحالة يعني مثلا 

-When was the population affected?

يعني متى تأثر السكان هنا هو عايز الزمن الي حدث فيه الوباء يعني وقت.

-Where was the population affected?

اين تأثر السكان هنا عايز موقع معين او مكان.

-Who was affected?

من تأثر وهنا هو طالب صنف معين تأثر او شخص معين المهم انه يكون يعني كائن.

والنص الثاني من الاسئلة Analytic epidemiology وده بقا أسئلته تحليلة انت طالب سبب عشان تعرف تحل المشكله زي:

-How was the population affected?

كيف تأثر السكان هو هنا طالب الطريقة الي تأثروا بيها عشان على اساسها يلاقي الحل.

-Why was the population affected?

لماذا تأثر السكان وهنا برضوا عايز السبب الي خلا المرض انتشر في الناس دي عشان على اساسه يعرف يلاقي الحل.

Infection

ومعناه بالعربي العدوى وده معناه دخول الكائن المعدي الى جسمك وتكاثره ولازم تفرق بين العدوى والمرض، العدوى دخول الكائن الى جسمك والتكاثر فيه انما المرض هو نتيجة تكاثر الكائن ده في جسمك كل ما تكاثر اكثر كل ما تمكن منك اكثر انما عارف لو مناعتك قوية والكائن ده دخل وقعد يتكاثر ايه الي يحصل؟؟ ولا اي حاجة مهو جهازك المناعي هيقضي عليه ويمنع تكاثره وبالتالي مش هتتصاب بالمرض.

Infectious Disease Process (infection cycle):

ودي لو كنت قاري التفريغ بتاع المحاضرة الثانية هتلاقي اني كاتبهم على هيئة قصة قصيرة حزينة ابقى روح شوفها المهم دي دورة حياة المرض في جسمك من اول ال Agent وهو الحاجة الي هتسبب المرض ثم يلاقي له Source of infection او (reservoir) ويستخدمه كمواصلة لحد ما يلاقي ضحية مناسبة ثم Exit of infection ودي الطريقة الي هيطلع بها من الخازن ثم Mode of transmission وده وسيلة النقل الي هيوصل للضحية بيها ثم Inlet of infection ودي طريقة الدخول الى الضحية المسكين ثم Host وده المضيف الضحية المسكين لحد ما يأخذ لفته في ويعدم امه العافية ثم يطلع الكائن الممرض ويروح لحد تاني يسبب المرض له.

شايف بقا اللفة دي علماء ال Epidemiologist's بيدوروا على اضعف نقطة في اللفة دي ويكسروا اللفة بيها بحيث لما تقطع ال cycle من النص هيطير شرها.

Natural immunity:

او المناعة الطبيعية وتقسيمات المايكرو المعتادة:

١-اولهم Defense mechanism ودي مناعة على الكل بتكون حاجات معينة في جسمك مش هتفرق كل شغلتها انها تمنع دخول اي حاجة الى جسمك زي :

-اولهم الجلد عبر العرق والإفرازات الدهنية بتاعته.

-ثانيهم تنفس عبر العطس والكحة الي بيطرد الحاجات لو دخلت او شعر انفك الي عامل زي مصفاة لو حاجة داخل من انفك يمسكها.

-الجهاز الهضمي عبر اللعاب الي مليان بيكربونات الي بتقتل البكتيريا او حمض المعدة الي بيموت اي حاجة تدخل المعدة او الانزيمات في المعدة والامعاء او حتى البكتيريا flora النافعه كلها حاجة.

-العين عبر الدموع الي بتحمي العين وترطبها.

٢-ثانيهم Systems of immunity ودي مناعة متخصصة يعني بتحمي من حاجات بينما حاجات تاني تسيبها تدخل الجسم 

-Humoral

-Cell mediated

Acquired immunity:

المناعة المكتسبة وهي ام تقسيمات المايكرو المقرفة:

١-اولهم Natural acquired: او مكتسبة من الطبيعة زي مثلا:

-انها تكون Passive يعني انت مش تعبان فيها زي اجسام مضادة بتأخذها من الام جاهز.

-او Active انت اتصبت ببكتيريا معينة او فيروس من الطبيعية نتج عن ده ان جهازك المناعي حاربه وعمل ضده اجسام مضادة وتخلي بالك انه الفيروس او البكتيريا جالك من الطبيعة.

٢-ثانيهم Artificially induced ودي بقا شغل معامل زي:

-يكون Active يعني جسمك يعمل اجسام مضادة زي التطعيمات او Toxoids دي بتكون جرعات مخففة من الحاجة الممرضة نديها للعيان عشان نحفز جهازه المناعي يعمل اجسام مضادة عشان في المستقبل لما يتعرض لنفس الحاجة الممرضة بس حقيقة بقا وبكامل قوتها يكون عامل اجسام مضادة فما تأثر فيه.

-او Passive ودي عبر بقا اديله الأجسام المضادة جاهز زي اني اديله عينة سيرم من الدم فيها Immunoglobulin بتاعت انسان مكون اجسام مضادة ضد المرض فهو يأخذ الأجسام المضادة المتكونة جاهز، او انه اديله Antitoxins وده بنأخذه من السيرم بتاع الحصان ونستخدمه Anti tetanic.

Ecology of infectious Diseases:

او اسم اخر Ecological Triangles ودي عبارة عن علاقة ثلاثية بين المضيف (host) الي هيتصاب وبين ال (agent) وده الحاجات الي هتصيبه وتمرضه وبين حاجات (environment) عوامل بيئية وهنعرف الحاجات دي الان:

host factors:

١-العمر يعني امراض تحب تصيب الاطفال وتلعب فيهم بينما الكبار لا مش بتقدر عليهم.

٢-الجنس يعني امراض تصيب النساء اكثر من الرجال او العكس.

٣-العِرق يعني امراض تحب تصيب السود اكثر من البيض والعكس كذلك.

٤-الوضع الاجتماعي والاقتصادي يعني واحد عايش في عزبة يعني اكيد نسبة اصابته تزيد عن حد عايش في مدينتي 😅.

٥-المهنة يعني مهن زي الطب دي بتحتم عليك تتعامل مع مرضى بالتالي نسبة اصابتك تزيد.

٦-الحالة الصحية يعني واحد مش مهتم بصحته مش هيتقارن بواحد لو كح بيروح يكشف يتطمن.

٧-السلوك الصحي واحد بيأكل من برا اكل مش كويس وهو اصلا تخين هل هتقارنه بحد رياضي؟.

٨-القابلية للاصابة يعني هل مثلا الشخص ده عنده جين معين بيزود نسبة اصابته بالمرض او عائلته منتشر فيها المرض او حتى موضوع السمنة فوق مهو كون انك سمين بيزود نسبة اصابتك بالسكر والضغط وتصلب الشرايين والى اخر القائمة الي اخرتها موتك.

Agent factors:

١-كمية الحاجات الممرضة الي انت اخذتها يعني بمعنى انا كيوسف عندي مرض وانت حضرتك جيت قعدت معايا خمس دقائق في الخمس دقائق دول انا عطست مرتين ثلاثة وانت مشيت بعديها ثم جه حد تاني من اصحابي وقعد معايا خمس ساعات شوف بقا انا عطست كام مرة في وشه وهو اخذ كام فيروس او كائن ممرض فيها. 

٢-الvirulence او الضراوة يعني الفيروس الفلاني مثلاً له اكثر من نوع ممكن حضرتك تكون اتصبت بنوع ضعيف ما عمل لك مرض بينما انا اتصبت بنوع قوي لعب فيا لعب ووراني نجوم الليل في عز الظهر.

environmental factors:

١-حاجات فيزيائية زي جغرافيا ومناغ المكان نفسه يساعد على انتشار المرض ولا لا.

٢-حاجات بيولوجية زي مكان مليان ذباب وحشرات وده يزود نسبة انتشار الagent.

٣-عوامل اجتماعية زي مثلا شخص مرتاح مادياً يعني بيروح الشغل بالعربية ومحدش معاه وساكن في شقة نضيفة فيها صرف صحي والخدمات الصحية على اعلى مستوى في المنطقة بتاعته، هل هتقارن ده بموظف طالع عين ابوه وكل يوم متمرمط في المترو والناس لازقين فيه من كل حته وساكن في عزبة الصرف فيها زي الزفت واقرب وحدة صحية لازم تمشي لها بالكيلو.

(انا جبت دول من تفريغة المحاضرات لاني شايف انهم احسن واشمل+ لو قلت عوامل هناك وبعدين اختصرتها هنا هكون بناقض نفسي فمشي دنيتك يا غالي).

Incubation period:

او فترة الحضانة ودي الفترة الزمنية الي بين التعرض الاول لمسبب المرض ولحد ما تظهر الاعراض.

Communicability period:

ودي هي الفترة الي ممكن تعدي الناس فيها سواء بقا كان ظاهر عليك اعراض او لا او كنت case وعندك المرض رسمي او مجرب carrier حامل او ناقل للكائن الممرض بدون ما يصيبك بالمرض.

هل الاثنين دول نفس بعض ؟ لا لاني زي ما قلت لك فترة الحضانة هي فترة ما بين دخول الكائن الممرض الى ظهور الاعراض هل بالضرورة انك ممكن تعدي حد في الفترة دي ؟ دي بتختلف على حسب المرض في امراض العدوى فيها من اول يوم دخل الكائن الممرض فيه الى جسمك بينما امراض اخرى لو فترة الحضانة بتاعته ١٠ ايام مثلاً تلاقيه ممكن يعديك في اخر ثلاث ايام بس انما الي فات لا مش هيعدي وفي امراض ممكن طول فترة الحضانة مش هيعديك لكن مع اول يوم من ظهور الاعراض يبدأ يعدي فدي زي ما قلت تختلف حسب كل مرض والاخر.

General Epidemiology

عشان تعرف المرض صح وتفرق اذا كان بقا وباء ولا لسه في حاجتين لازم تحددهم كويس:

أ-Epidemiological data بيانات بحته ولازم تتحرى الدقة في كل واحدة فيهم زي:

١-تعريف المرض.

٢-الكائن او العامل الي سبب المرض.

٣-الخازن بتاعه او Reservoir.

٤-الطريقة الي هينتقل بيها من شخص لشخص.

٥-فترة حضانته.

٦-الاعراض الي طالعة على العيان.

٧-مضاعفات المرض.

٨-عدد الوفيات وسبب وفاتها.

٩-عوامل تهيء حدوث المرض وانتشاره:

-عوامل بيئية زي المسكن تكون ساكن في مكان مليان تلوث او إمدادات المياه زي ما حصل في اسوان من كام اسبوع وفي الاخر طلع الصرف فاتح في المياه بتاعتهم.

-حسب المنطقة نفسها زي ان في امراض تنتشر في المناطق الزراعية او الريفية زي الشيستوزوما والديدان الي بتخترق الجلد والى اخر البارا بينما امراض تنتشر في المناطق الحضرية.

-كمان حته انه ف اغلب الامراض بتكون لها مواسم معينة في السنة زي الانفلونزا كدا بتكون العوامل الجوية زي الجو البارا وغياب ضوء الشمس بيدي الفيروس افضلية على الانتشار.

ب-Pattern of spread او نمط الانتشار وده الي على اساسه بنحدد المرض ده موجة عادية هتأخذ وقتها وتعدي ولا انه كبر وبقا وباء ولازم نأخذ الاحتياطات اللازمة:

-اول مصطلح Outbreak ومعناه التفشي بيكون انتشار سريع للمرض في مجموعة مغلقة زي لما ينتشر مرض في مدرسة بين الطلاب ده هيكون في الغالب طالب واحد مريض وعدى شوية والشوية يعدوا شوية وانتشر كالنار في الهشيم.

-ثانيهم Endemic او متواطن وده مرض بيكون موجود في منطقة جغرافية معينة زي منطقة سمالوط يكون منتشر فيها مرض او بشكل اوسع المنيا مثلا يكون منتشر فيها مرض وماشي بنفس الريتم كل سنة بيكون عندك عدد متشابه من الحالات يعني لو عندك الريتم ١٠٠ حالة و جيت في سنة قلت الحالات عن السنة الماضية يبقا انت ماشي صح وقربت تقضي عليه، انما لو زاادت!!!!.

-ثالثهم Epidemic وده بقا زيادة عدد الحالات كل فترة عن الي قبلها تزاااايد فقط مش يطلع وينزل لا ده بيزيد على طول ويكون واخذ منطقة معينة او محافظة معينة كدا.

-رابعهم Pandemic المرض انتشر من منطقة وراح الى اخرى وكل شوية عدد الحالات تزيد لحد ما المرض ينتشر في البلد كله وممكن كمان يروح البلدان المجاورة او يغزوا العالم زي ما حصل في Covid-19 كدا.

-خامسهم Sporadic cases وده ان صح التعبير غير منتظم مرة عدد الحالات يعلى مرة واحدة ومرة ينزل بدون ترتيب ولا تكرار لعدد الحالات كل احصاء.

-سادسهم Enzootic نفس تعريف الامراض المتواطن بس على حيوانات زي مرض brucellosis او البروسيلا بيكون متواطن في الماعز (بعد الشر على ميسي).

-سابعهم Epizootic نفس الي فاتت زيادة في عدد الحالات كل فترة ازيد من الي قبلها زي salmonellosis السالمونيلا في الفئران او rift valley في البهائم.

الان نحل الاسئلة:

1-Epidemiological cycle include the following except:

a. Agent

b. Reservoir

c. Exit of infection

d. Virulence

السؤال بيقول الدورة الوبائية لاااااااا تحتوي على وطبعاً هتكون Virulence او الضراوة لان لو الكائن المُمرض الي دخل لك لو ضراوته ضعيفة مش هيسبب مرض وهيموت جوا اصلا مش هينتقل.

2-A disease that is constantly present in a certain region or population is called?

a. Pandemic disease

b. Prodemic disease

c. Endemic disease

d. Epidemic disease

مرض متواطن وموجود بإستمرار في منطقة او مجموعة سكنية معينة وده طبعاً تعريف Endemic.

3-A propagated epidemic is usually the result of what type of exposure?

a. Point source

b. Continuous common source

c. Common exposure to reservoir

d. Person-to-person

قالك الوباء ايه اكثر طريقة لانتشاره طبعاً كلهم ضعفاء الا الاخيرة Person to person دي الاشمل.

اكتب نمط الانتشار في الاتي:

-22 cases of typhoid occurred within 2 weeks among resident of certain region (usually 0 or 1 per month)…….

بيقولك التيفود كان عدد اصابته واحد او مفيش كل شهر فجأة نط لحد ٢٢ حالة في اسبوعين فقط فده زيادة سريعة لمرض متواطن يبقا Epidemic.

- About 60 cases of gonorrhea are usually reported in certain area per week……..

يتم الإبلاغ عاااااادتاً عن حوالي ٦٠ حالة من gonorrhea في منطقة معينة أسبوعياً 

هنا تركز هو بيقول usually او عادتاً يعني الموضوع ده بيحصل كل اسبوع بنفس الريتم لو كان زاد مكنش قال usually فكدا الاجابة الصحيحة Endemic.

-Single case of histoplasmosis was diagnosed in a community………..

تم الابلاغ عن حالة واحدة من histoplasmosis في مجتمع ما دي بقا انا اخترت Sporadic لانها الانسب انت مش بتتكلم عن مرض متواطن كل احصاء بريتم محدد او مش مرض انتشر وتفشى بسرعة لا ده حالة واحدة في المجتمع كله وممكن عادي الاحصاء الي بعده ميكنش في حالات او تزيد ف Sporadic هي الانسب وهي الصح.

وبس خلص السكشن وفي الختام نسأل الله ان يرحم موتنا وموتا المسلمين ويرحم اخواننا في فلسطين والسودان ولبنان وسائر بلدان المسلمين يارب ويستودعكم الله الذي لاتضيع ودائعه والسلام عليكم ورحمة الله وبركاته.

اللهم انت ربي لا إله إلا أنت خلقتني وأنا عبدك وانا على عهدك ووعدك ما استطعت أعوذ بك من شر ما صنعت أبوء لك بنعمتك علي وابوء بذنبي فاغفر لي فإنه لا يغفر الذنوب الا انت.

اللهم علماً نافعاً تم 👍