1-30 июль кунлари ғўза зараркунандаларига қарши "Долзарб 30 кунлик" эълон қилинди

Маълумки, ғўзанинг заракунанда ҳашаротлари июль ойида оммавий купаяди. Шу сабабли Ўсимликлар карантини ва ҳимояси агентлиги тизимида ғўза зараркунандаларига қарши кураш бўйича “Долзарб ўттиз кунлик” эълон қилинди. 1-июлдан 30-июлга қадар давом этадиган мазкур “Долзарб ўттиз кунлик” мобайнида Ўсимликлар карантини ва ҳимояси агентлиги томонидан республикадаги агрокластерлар, фермер-деҳқон хўжаликлари ғўза майдонларида учрайдиган хавфли ва иқтисодий зарар келтирадиган зараркунандалар, касалликлар ва бегона ўтларга қарши уйғунлашган кураш тадбирлар олиб борилади.

Бу жараёнларда Қорақалпоғистон Республикаси Ўсимликлар карантини ва ҳимояси агентлиги ҳамда вилоят бошқармалари мутахассислари томонидан ғўза майдонларида фитосанитария мониторинги ва дала назоратлари кучайтирилади. Шунингдек, фермерлар дафтарининг юритилиши ҳамда ғўза экинларида зараркунандаларга қарши курашда биовоситалар, яъни фойдали  ҳашоротлар энтомофагларни қўллаш юзасидан ишлар олиб борилмоқда.  

Ғўза майдонларида ғўза тунлами капалакларини аниқлаш ва қарши кураш чораларини белгилаш мақсадида ҳар бир гектарга 1 донадан Ўзбекистон Республикасида ишлатилишига рухсат этилган рўйхатда мавжуд бўлган феромон тутқичлар ўрнатилади. 30 кунлик тадбир жараёнида ғўза майдонларида иқтисодий зарар етказадиган кўсак қурти, ўргимчаккана ва қандала каби зараркунандаларнинг кучли тарқалиш ўчоқлари аниқланса, Агентликка хабарнома юборилиши, фитосанитар талаблар ўз вақтида бажарилмаган тақдирда қонуний чоралар кўрилишининг таъминланиши назоратга олинади.

Бугунги кунда республика бўйича 1 миллион 34 минг 223 гектар майдонда ғўза парваришланмоқда. Ўсимликлар карантини ва ҳимояси тизими мутахассислари томонидан ғўза майдонларида доимий мониторинг олиб борилмоқда. Шунингдек, зарарли ҳашаротлар кенг тарқалиб иқтисодий зарар етказиши хавфини олдини олиш мақсадида кимёвий воситалар заҳираси ҳам шакллантирилди.

Биологик кураш мавсуми бошидан бугунги кунга қадар Қорақалпоғистон Республикаси ва вилоятларда 2022 йил ҳосили учун экилган ғўза майдонларида зараркунадаларга қарши 3 марта трихограмма чиқарилди. Шунингдек, зарарли ҳашоротларга қарши бракон ва отлтинкўз энтомофагларидан ҳам фойдаланилмоқда. Кимёвий воситалар қўлланилгани йўқ.