#016 基本地盤手工具講解

有好多巴打都講地盤用具有太多種，外行人好難分得清邊樣打邊樣。於是佢地都建議出番個教學，介紹下地盤佬基本工具，同埋講講每樣工具既唔同用法。

注意：本篇主要講解手工具，電工具同埋物料將會係後再整理。

1. 士巴拿 / 攝屎Spanner

士巴拿相信好多人都好熟，用途係專門用黎扭下d六角形螺絲，十幾蚊至幾十蚊有一把，普通五金鋪都揾到，就唔多講啦。不過記住：佢有分可調較同埋唔可以調較，個人建議用可調較。因為做地盤成日都會遇到唔同呎吋既螺絲嫁，買定個可以教既士巴拿就唔怕買錯啦。

2. 螺絲批

有好多種。一字批同十字批，仲有好多種。市面有d萬用批，姐係俾枝棍你，個頭就任你換果種，如果唔想買好多種批又成日用到既可以考慮。普通五金鋪可以揾到，價錢由十幾到幾十不等。

3. 拿鉗 / 大力鉗

呢個未必好多人識，但係係地盤一種極之有用既工具。當你需要好大力咁夾實一樣野既時候可以用佢。常見係用黎當士巴拿咁用，但因為佢夾得實D，無士巴拿咁易整到螺絲滑牙。(姐係令到D六角形螺絲壓到變做圓形)右下可以調較鬆緊度，跟住當佢係較剪咁夾落去你想夾既野到就得。都係一樣，普通五金鋪會有，價錢比較貴，要幾十蚊。有巴打話有D好靚既名牌可以去到成千蚊。

4. 賓子

用途主要係俾人MARK一點中心點。但因為佢夠晒尖同硬，所以引申到好多用途。詳細可以睇睇 #15 ，應該唔係間間五金鋪有，價錢唔清楚，等人補上。

5. 鎚仔

有分好多種。但一定會有一邊平頭，另一邊可能係開叉，都可能係圓頭。想買邊乎要視乎用途，咁呢個唔多講，因為用途太單一，無咩好講。照舊五金鋪有 十幾至幾十蚊不等。

6. 索帶 (當住手工具先)

有好多種。膠索帶、不銹鋼索帶等，亦都有唔同粗幼度，請自行選擇合適既索帶。價錢由十幾到幾十不等。

7. 手鋸

包括所有拎得係手既鋸，不過唔係好建議隨便拎出街，好易俾人當武器。五金鋪會揾到，價錢幾十蚊有交易。

8. 線鋸 / 弓形鋸

木工必用裝備。中間刀片可以拆落黎換既，係唔用既時候可以拆左佢落黎。同埋記住要帶多幾條後備鋸片，因為易爛。照舊五金鋪會揾到。

9. 界刀

文具鋪有，唔多講啦呢個，用途太多。

10. 勾刀

界膠板專用工具。文具鋪有，幾十鋪一把。同界刀一樣，中間刀片可以換。

11. 啦啦批

只需要不斷上下chok就能鬆開螺絲，唔洗好似士巴拿同拿鉗咁要扭半圈再鬆番出黎再扭。比較慳力同速度快，但如果螺絲太實，啦啦批係唔能夠扭開佢既。五金鋪會揾到，但價錢較貴，幾十至幾百蚊都有。同埋限制較多，要事先知道螺絲呎吋去配個頭先可以用到，否則會唔岩用。

12. 剪鉗

分好多種，有普通剪鉗，仲有圓頭剪鉗之類。下圖所示既係專用於剪電線既剪鉗，請自行選擇用途去揀剪鉗。五金鋪有，十幾蚊有把。

13. 鐵銼

磨野，可以將D野由圓磨到變尖。太危險啦都係唔多講。五金鋪會揾到，二三十蚊一把掛，呢個唔肯定。

14. 磅呎

試螺絲扭到有幾多磅力，用法自己上網睇，雖然好似對發夢無咩用，不過純粹諗到諗講下。呢樣野唔係間間五金鋪有，但記住要先知道你要度既螺絲有幾大，然後再配個頭去度。原理其實啦啦批一樣。價錢較貴，平既一百，貴既幾千，視乎你要度既力。