«»
-الو مساء الخير .. حضرتك عارضة عربيتك للبيع؟
=ايوه تمام
-فيها ايه؟
=مفيهاش حاجه! .. واحده عايزه تبيع عربيتها فيها ايه دي!
-يافندم العربيه العربيه فيها ايه؟
=ااه .. فيها اربع شبابيك ودركسيون و و …
-يافندم ايه اللي حضرتك بتقوليه ده؟ انا قصدي العربيه نفسها من جوا فيها حاجه؟
=كان فيها علبة عصير مرميه ورا شربتها الصبح .. بس هشيلها متخفش
-عصير ايه حضرتك متعصبنيش بقا .. هسألك السؤال بطريقه تانيه ؟ .. العربيه فابريكا؟
=لأ أوبل
-أوبل ايه يا استاذة قصدي فبريكا يعني عملت حادثة قبل كدة ؟؟؟
=ايه اللي انت بتقولو ده .. انت شايفني لسه بتعلم سواقه
-طب تمام حلو جدا
=بس للامانه مره كنت بركن عالكورنيش فنزلت بيها في النيل .. بس لما طلعت نشفتها كويس والله
-سبحان الله انها طلعت سليمة اساسا .. طب هي عامله كام كيلو؟
=معرفش والله موزنتهاش
-استغفر الله العظيم يارب
=حضرتك بتتعصب ليه انا اول مره اشوف حد بيسأل عن وزن عربية
-وزن ايه خلاص يا فندم مش عايز اعرف خالص ..
=احسن
-طب بصي عشان نخلص .. و مستعد اجي اخلص النهارده .. اخرك كام بما يرضي الله؟
=بما يرضي الله اخري عشرة بليل
-هو ايه اللي عشرة بليل؟!
= عندي شغل الصبح والله
-شغل ايييه يافندم هتجنني امي .. بقولك ايه اديني جوزك او اي حد
فاهم اكلمه
=اوي اوي استنى .. احمااااااد … خد كلم مشتري بس شكله ملوش في العربيات خالص
-يا استاذ احمد ارجوك انقذني المدام عندك جننتني
+مساء الخير.. معلش حضرتك عارف الستات بقى ملهمش في العربيات وكدة .. انا معاك اهو اتفضل
-حضرتك شكلك فاهم ياريت تقولي العربية فيها ايه؟
+فيها اربع شبابيك ودركسيون
…
*صوت مراته من بعيد: والله قولتله نفس الكلام*