【香港史觀——民族歷史】

香港地處依家嘅廣東，古稱叫做「粵」。咁係因為古時呢度係百越族嘅一枝南越嘅居住地。古代「粵」同「越」相通 ─ 《漢書‧高后紀》記載：「五年春，南粵王尉佗自稱南武帝」，而《史記‧南越列傳》就記載：「南越王尉佗者，真定人也，姓趙氏」。

用大中華史觀嘅香港歷史教科書並唔會提及百越族。喺傳疑時代嘅夏帝國開始到秦帝國版圖擴張到南方之前嘅時間，香港歷史教科書上對長江以南嘅地圖上係一片空白，好似喺嗰陣時嘅長江以南係無人居住嘅地域一樣。呢種做法，係故意隱瞞咗華夏族侵略百越族嘅史實，以及長江以南嘅地域根本唔係華夏帝國原有領土嘅史實。

古代居住喺長江以南嘅百越族，並唔係文明程度極低嘅部族，而係各有姓氏，更同北方嘅華夏族擁有唔同嘅習俗、語言同歌曲。晉帝國時，臣瓚考證註解斷代史書《漢書‧地理志》指：「自交趾至會稽七八千里，百越雜處，各有種姓」。可以見到百越並唔係無姓氏嘅低等文明，而係各有種姓。清帝國時期，文獻學家張澍(公元1776年至1847年）所著《姓氏尋源》亦經考證指出：「南海番禺多冼姓，蓋高涼夷酋姓也。」即係現今嘅冼姓其實係古代百越高涼部族嘅姓。

香港並唔係喺漢帝國佔領之後先有歷史。香港喺史前時期已經有先民留下嘅歷史遺蹟，包括依家被列為香港法定古蹟嘅港島大浪灣石刻、滘西洲石刻、東龍州石刻、大廟灣石刻、石壁石刻、蒲台島石刻、長州石刻同龍蝦灣石刻，同埋大嶼山分流石圓環。對於呢啲古蹟同百越族，香港大學歷史系教授 John M. Carroll 有以下嘅見解：

「香港地區的考古發現可以上溯至六千年前的新石器時代…百越人與馬來人、越南人、波里尼西亞人的淵源之深，更甚於中國的主要民族漢族。香港仍然保存的石刻，估計就是百越人所留下。」

漢帝國典籍都指出漢族同百越嘅區別。漢帝國劉安（前179年－前122年）所寫嘅《淮南子‧齊俗訓》記載：「故胡人彈骨，越人契臂，中國歃血也。所由各異，其於信一也。」指北方胡人、中原人同南方越人對結盟嘅儀式唔一樣。

漢帝國劉向（公元前77年至前6年）《說苑‧善說》中就記載咗《越人歌》，即係華夏族喺越地聽到越人所唱嘅歌，但就唔明白首歌嘅意思，而需要識華語嘅越人翻譯先明，可以見到華夏族同百越族各自擁有唔同嘅語言。

香港嘅歷史，其實應該由香港同鄰近地域嘅百越歷史開始，而唔係華夏族侵略者嘅歷史開始。