【香港史觀——歷史觀點】

喺科索窩獨立過程中，科索窩政府曾經向國際法院遞交陳述書，其中就包括大篇幅咁講科索窩有獨立嘅歷史。另一方面，如果香港無自己嘅歷史觀而係用外族嘅歷史觀，咁香港人都會傾向認為同外族係共同命運。唔醒覺本身同外族嘅歷史命運唔相同嘅事實會導致反對主權獨立嘅選項。

歷史觀同係唔係獨立息息相關，所以上世紀逃難到香港嘅大中華史觀者錢穆就係利用歷史去防止香港獨立。呢篇將會探討香港能唔能夠擁有自己嘅史觀。

香港學校嘅歷史教科書深受錢穆《國史大綱》嘅虛構「四千年中國」影響，一直用嘅都係大中華史觀，將黃河流域叫做中原正統，對周邊鄰國嘅歷史只有非常簡略嘅概述，甚至略去咗唔提。例如百越部落、南越國嘅歷史、吐蕃帝國同唐帝國長期兩強並立嘅歷史都好少有記述，而一直強調漢帝國同唐帝國嘅所謂盛世，講到當時一定係萬方歸順所向無敵。

如果由「大中華史觀」轉為「香港史觀」，觀點可以係完全唔同。

北方嘅華夏族、蒙古族同女真族(滿族)所建立嘅帝國都曾經統治過嶺南地區(包括香港)係史實。但係，點樣睇呢啲歷史就係史觀嘅分別。大中華史觀認為百越已經「融合」入咗華夏族，而遠古嘅百越文化已經俾華夏文化「吸收」，所以百越已經基本「漢化」晒。到咗現代已經無百越族同百越文化，而只有「中華民族」同「中華文化」，而粵語亦都只不過係其中一種「方言」。相似嘅理論亦針對其他俾中華人民共和國或者中華民國統治嘅少數民族。蒙古同女真入侵華夏族帝國被視為「外族入侵」，而對百越人同香港人嚟講都係「外族入侵」。呢啲都係喺香港歷史教科書中，香港人耳熟能詳嘅記述。

香港史觀就係以香港做本位去睇香港嘅歷史，並且同香港擁有獨立文化息息相關。

香港古代嘅先民係百越族嘅分支南越人。嶺南地理位置遠離中原，五嶺嘅阻隔令嶺南一直係中原人難以去到嘅地方。嶺南嘅瘴氣濕熱同北方唔同，更加令啲中原移民拒絕移居過嚟。喺古代，移居嶺南嘅移民，一是俾中原朝廷貶官，一是走投無路嘅人。呢啲人到咗嶺南之後，都改用粵文化，而同時為嶺南帶嚟新嘅外來文化。同時，由於嶺南擁有優良嘅海港(香港、澳門及廣州等)，所以亦係對東南亞各國進行海洋貿易嘅重鎮，亦令南洋嘅文化進入嶺南地區。粵人對呢啲外來文化揀適合自己所用嘅，或者將原有嘅外來文化加以改良，再加入本身嘅嶺南文化入面，令到嶺南文化更加豐富。因為咁，嶺南文化實際上係善於吸收外來文化以豐富自己嘅海洋文化，同北方嘅華夏農耕文化崇尚正統完全唔同。

1842年香港開埠，西方文化進入香港。香港人對西方文化擇優而取，將原有嘅嶺南文化中好多嘅華夏文化替換做西方文化，令香港嘅文化同嶺南嘅文化都唔同。如果香港人係一個獨立民族，

咁對香港嚟講，華夏族、蒙古族同女真族對嶺南地區同香港嘅統治同移民係「外族侵略」同「殖民」，同蒙古族同女真族侵略華夏族嘅中原帝國本質上並無唔同。

香港史觀唔採取迴避嘅態度，但應該反思同中原相關嘅歷史事件嘅意義。

無論係深水埗漢帝國古墓同宋皇臺等喺香港境內嘅古蹟，呢啲都係外族侵略統治嘅史實古蹟。李鄭屋古墓、宋帝國皇族逃亡遺蹟同英國殖民時期喺香港所興建嘅維多利亞式建築物本質上無分別，都係外國人曾經喺某個時空統治香港嘅證明，而並唔係香港依家都應該由某外國統治嘅支持證據。

同香港史觀相反，大中華史觀對唔少歷史事件採取迴避態度。

大中華史觀嘅教科書唔會記載宋帝國為咗徵收鹽稅而壟斷製鹽業，所以喺九龍設立官方製鹽設施，導致原本以製鹽為生嘅大嶼山香港本土居民武裝起義反抗宋帝國，但最後被宋帝國官軍全數屠殺嘅史實。喺呢段史實入面，宋帝國實際係一個外來政權去欺壓香港本土居民，奪去本土居民嘅生計並且進行屠殺，令「大家都係中華民族」嘅觀念動搖，所以唔會收錄喺教科書或者歷史館入面。相反，宋帝國嘅皇帝同軍隊因為俾蒙古帝國追擊而路經同駐屯香港境內就寫咗好大篇章，其中最著名嘅就係「宋王臺」嘅故事。但係，一隊曾經屠殺過香港先民嘅軍隊，同普通嘅香港先民又有咩關係呢？呢知就好似日俄戰爭入面，日本同俄羅斯喺清帝國領土滿州開戰一樣，對當地居民又有咩關係呢？宋帝國同蒙古帝國都係外族嘅統治者，邊個蠃邊個輸，對香港先民又點呢？

大中華史觀嘅教科書亦唔會記載喺鴉片戰爭前後，香港居民實際上係支援英國商人喺伶仃洋用躉船進行鴉片貿易嘅史實。呢啲支援包括向英商供應淡水同補給物資。英商俾林則徐圍困喺廣州斷水斷糧後，帶住家眷逃走到去香港島，更獲得香港島民善待。呢啲史實唔會被記述喺大中華史觀嘅教科書嘅原因，都係同「英國係侵略者」嘅觀點相違背。對香港島民嚟講，大清帝國同大英帝國都都外族侵略者，但大英帝國更講文明講道理，同英國人相處仲好。由於香港文化實際上係海洋文化，所以對外來文化係擇優而取嘅態度，並唔會有「西方文化唔係正統」而採取排拒態度。咁所以，香港開埠之後，同英國人嘅相處雖唔係平等，但整體嚟講並無太大嘅文化衝突問題。

大中華史觀並唔能夠解釋香港本土居民反抗華夏政權，甚至幫助外國嘅歷史事件，所以索性直接唔提。香港史觀就係企喺香港本土嘅角度，去理解歷史事件。單純寫出邊年邊月邊日發生咗咩事嘅只可以叫做「年表」，能夠唔迴避咁解釋事件點解發生，先係歷史研究者所需要做嘅事，咁先算係「歷史」。喺理解當時發生事件嘅原因之後，有關嘅歷史事件有咩意義，就係未必有標準答案嘅「意見」範圍。

香港史觀同大中華史觀邊樣較為合理，決取於邊樣能夠唔迴避史實，邊樣能夠更合理地解釋歷史事件。