辯方代表 #郭憬憲大律師 盤問PW3偵緝警員7280 丘達豪(2)

辯：擷取資料嗰個儀器其實係咪手提版嘅電腦嚟㗎？

PW3：唔係

辯：咁係乜嘢裝置呢？

PW3：係一個叫做touch嘅硬件嚟

辯：呢個touch 2嗰個硬件呢，就好似一個可攜帶嘅裝置咁，其實係可以隨身攜帶去案發現場做嘢嘅，啱唔啱？

PW3：啱

辯：所以如果真係要你喺現場擷取一個小米手機嘅影像檔，你係咪可以帶個touch2約莫半個鐘頭就做得曬㗎啦，啱唔啱？

PW3：啱

辯：呢一半最低嗰到，我地見到有個標題malware scanner，malware就寫住個no字嘅，見到嗎？

PW3：見到

辯：就咁字面意思，佢係咪答緊有冇執行到惡意軟件嘅掃描呢？咁我見佢寫咗no即係冇執行到，我理解正唔正確？

PW3：唔正確

辯：咁正確嘅解讀係咩？

PW3：冇發現

辯：似乎字面嘅了解我同你係啱啱相反咗，你點解話呢個嘅意思係冇發現惡意軟件？

PW3：因為如果冇執行到呢個malware scan呢個功能嘅話，呢一半顯示嘅extraction summary係唔會見到有malware scanner呢個功能出現嘅

辯：你琴日就話有檢查過個小米手機硬件上有冇問題，係咪？

PW3：係

辯：你嘅證人口供冇紀錄到你有做過呢個硬件個檢查，對唔對？

PW3：對

辯：你講個硬件檢查係咩意思啊？

PW3：即係基本嘅手機檢查，例如佢手機表面有冇損壞、充電位有冇損壞、可否正常開機、表面嘅電池發現有冇膨脹、開機後佢個顯示屏係咪可以正常操作、會唔會自動重啟或者係關機，大致上係咁多

辯：我相信你不會檢查呢部手機嘅硬體可唔可以上到網，因為如果上到網係會影響到資料完整性嘅，同唔同意？

PW3：係啊

辯：即係我講嘅啱啦？

PW3：正確

辯：你亦都答過主控官呢話你檢查過嗰個android嘅操作系統，你話係冇問題嘅，記唔記得？

PW3：記得

辯：我諗你冇檢查過呢個android系統就住個別程式嘅權限設定，權限設定即係permission。

PW3：正確

辯：即係你冇檢查過嘅？

PW3：冇檢查過

辯：你亦都冇攞另一部原廠嘅android手機去比較呢個小米手機嘅設定，你冇做到呢個原廠嘅android比較嘅。

PW3：冇做嘅

辯：就住呢度手機telegram嘅運作方面，喺呢個telegram嘅程式權限設定，你有冇檢查過㗎？

PW3：冇嘅

辯：所以，嗰個telegram運作係咪正常，其實你都唔能夠講得埋嘅，你都唔能夠講得準嘅，只係好初步睇過姐。

PW3：同意

辯：所以，如果我話呢部小米手機嘅telegram有可能上唔到網、連唔到線呢，你係唔知嘅，係咪？

PW3：我冇將佢上過網，所以我唔知道

辯：同樣道理，呢個telegram喺收到任何訊息底下，係不會有任何步驟通知機主嘅。例如喺正常手機狀態，雖然telegram係收到訊息，但係呢個手機係不會作出任何提示嘅，你都唔知道㗎喇喎，啱唔啱？

PW3：我嘅檢驗係喺冇上網嘅情況下進行嘅，佢冇上網收唔到通知，所以你所講嘅telegram收到嘅通知係唔會通知機主嘅，除非部手機上返網啦，就有可能收到通知啦

辯：所以簡單講啦，你係唔知道你部手機嘅telegram收訊息會唔會有通知嘅，你係唔知嘅。

PW3：如果佢上到網就會收到囉

辯：但係你冇檢查過啲權限設定，可能會撳錯制，可能收唔到telegram嘅通知㗎喎，你不能排除呢個可能性。

PW3：如果我需要做呢個上網或者權限測試嘅話，我可以答到你

辯：就因為你冇做呢個測試，所以你答我唔到啦，對嗎？

PW3：對啊，我比唔到呢方面嘅意見

-小米手機(P18)影像檔報告(Extraction summary)呈堂為D1-

-展示相片P9(102)-

辯：呢一張相呢，冇爭議就係嗰部手機交比你之前喺警員看管底下嘅一刻影出嚟嘅相嚟，係你接手手機前嘅狀態嚟嘅。

PW3：明白

辯：有三個狀態想你確認嘅，第一呢張相係凌晨0328影嗰陣部機係flight mode嚟嘅

PW3：張相顯示係啊

辯：底下交叉呢張相，第二想你確認影像嗰陣張相load唔到出嚟嘅。

PW3：係啊

辯：第三想你確認呢，最低嗰度就有5.4K，左手邊有隻眼嘅公仔嘅，即係有5.4K嘅人睇咗呢個訊息嘅。

PW3：我見到，但係我冇認知

-展示相片P9(103)-

辯：係咪確認喺凌晨0335呢嘅手機係上咗Wi-Fi，係咪呢張相係現實呢個狀態嘅？

PW3：呢張相顯示係嘅

辯：第二樣想確認呢，103張相中間嗰張相HSBC嘅大廈係清楚顯示到出嚟嘅，係咪？

PW3：見到係啊

辯：睇嗰個頭先5.4K個個位邊咗5.6K，見唔見到？

PW3：我見到係啊，5.6K

辯：如果我有個講法，喺103號相係因為上咗Wi-Fi，有可能令到一張HSBC嘅相喺呢個手機不存在就變咗存在咗，我咁講有可能成立嘅，係咪？

PW3：我要做個測試先至會確認到

辯：未去到要確認我講嘅啱唔啱，但係我頭先嘅講法係有可能成立嘅，啱唔啱？

PW3：有可能

辯：頭先張相5.4K會變咗5.6K亦都有可能因為上左Wi-Fi，而改動咗個訊息內容嘅，因為上咗Wi-Fi。

PW3：想問嗯令到嘅訊息內容改變咗係點樣改變咗

辯：即係個數字有5.4K變咗5.6K。

PW3：我唔知呢個係咪訊息內容，可能係訊息嘅資訊姐，所以我都答唔到你呢個問題

辯：你係會考慮一個資料交比你係咪完整嘅，你係有需要評估呢個方面嘅，係咪？

PW3：關於咩資料

辯：例如我頭先講5.4K同埋5.6K，我當係訊息資料嘅一部份啦，呢個訊息資料都會影響你評估訊息嘅完整性，integrity of the data。

PW3：同意

辯：所以呢兩張相顯示5.4K同5.6K嘅改動呢，你係會擔心究竟呢個訊息係咪確保到資料完整性嘅，你係會擔心嘅。

PW3：同意嘅

-盤問完畢-