【認清史實——自古以來？】

『「自古以來」鄭月娥，李家超，鄧炳強就係共產黨員』，咁樣嘅講法就係佢哋嘅講法，我哋有活用到。

入正題，其實「某地自古以來屬某國的領土」呢種講法真係神奇、頂級、超卓。相信大部份人都無聽過意大利共和國(Italian Republic)會用「那不勒斯自古以來係羅馬帝國嘅領土」做理由去證明今日佔領統治那不勒斯叫合法，亦都無聽過伊朗伊斯蘭共和國(Islamic Republic of Iran)會用「德黑蘭自古以來係波斯國嘅領土」做理由去證明今日佔領統治德黑蘭叫合法。

————————————————————————

香港《基本法》個序言係咁寫：

「香港自古以來就是中國(China)的領土，一八四○年鴉片戰爭以後被英國佔領。一九八四年十二月十九日，中英兩國政府(Chinese and British Governments)簽署了關於香港問題的聯合聲明，確認中華人民共和國政府於一九九七年七月一日恢復對香港行使主權，從而實現了長期以來中國人民(Chinese people)收回香港的共同願望。」 

————————————————————————

當中「自古以來」(since ancient times)，「中國」同「中國人民」三組字更加係語意曖味，而所謂嘅「恢復」同「收回」更不知所謂。

1. 「自古以來」

國際法當中，係無「自古以來」(since ancient times)呢個概念，但可能係由國際法入面嘅「亙古先佔」(possession since time immemorial)而嚟：「沒有提出任何證據以證明，除佔有者之外何曾有不同的情況，亦沒任何在世的人曾聽聞有不同的說法，而該佔有屬不間斷及無爭議」，但「亙古先佔」只有極少數嘅案例係承認，而原屬權(original title)係極易俾現代嘅西方殖民條約喺法理上被推翻或者取代。

香港係咪由漢帝國定其他朝代「亙古先佔」定「原屬權」未必係好重要，重要嘅係大英帝國同清帝國所簽嘅條約同之後一系列關乎主權嘅事同如果有「亙古先佔」同「原屬權」喺國際層面上係咪足夠被推翻。

2. 「中國人民收回香港的共同願望」、「中國人民」

「中國人民收回香港的共同願望」更加係不知所謂。喺1842年嘅清帝國臣民喺割讓發生之前佢哋根本就唔會有收回香港呢個願望，而到1943年，中華民國喺《開羅宣言》嘅討論入面都放棄咗香港嘅主權申索。1997年之前，香港未俾中華人民共和國佔據，所以「中國人民」呢個字係無可能包括香港人。而「中國人民」呢個字理論上只可能係講緊「中國人民共和國人民」。

但係喺呢個意義下嘅「中國人民」又包唔包埋東突厥人、圖博人、南蒙古人及滿族人，呢啲俾中華人民共和國侵佔又想分離嘅民族會講讚成中華人民共和國侵呑其他地方咩？又如果，「中國人民」係唔包括以上民族，咁只可以解釋做中華人民共和國嘅漢族。

但又咁講，中華人民共和國又無舉行過任何公投去確定係咪有呢個願望，有又係咪「共同」呢，中華人民共和國的漢族又唔係上帝，佢哋嘅共同願望又要幫人實現？佢哋嘅共同願望又關香港事？咁又有無人問過俾中華人民共和國侵佔係咪香港人嘅共同願望呀？1997年之前中華人民共和國從來都無對香港行使過主權，咁又點「恢復行使主權」？中華人民共和國嘅漢族(即所謂嘅「中國人民」)都從來無擁有過香港，又點「收回」香港呀？

如果「自古以來領土」呢個法理已經咁虛，咁《基本法》入面嘅「不可分離」規定又應該點理解，下個post就會講其實《基本法》教咗我哋點同「中國」自動分離。