【認清史實——同「中國」自動分離？】

如果「自古以來領土」呢個講法站唔住腳，咁《基本法》入面嘅「不可分離」又應該點理解呢？假如中華人民共和國政府係所謂「中國」嘅代表，咁喺中華人民共和國同以前蘇聯滅亡解體嗰陣，邊一方可以代表「中國」就會成為一個問題。

《基本法》第一條寫「香港特別行政區是中華人民共和國不可分離的部分(inalienable part)」，而並非寫「香港特別行政區是中國不可分離的部分」，即係話，只要中華人民共和國唔存在，香港係可以分離嘅，甚至係因為無咗必須併合嘅主體而因法律(by operation of law)自動地分離。

如果中華人民共和國唔係完全滅亡，而只係失去對大部份原有領士嘅控制，仍然喺聯合國安全理事會佔據中國(China)嘅席位，咁就必須要首先將嗰個代表趕走先可以令香港以獨立主權國家嘅身份加入聯合國。

如果中華人民共和國完全滅亡，而原有嘅領土分裂成唔同嘅國家，咁喺原有領土上有新嘅國家好有機會繼承咗中國(China)個位，而其他國家就用獨立主權國嘅身份加入成為新嘅普通成員。

—————————————————————

如果按照華夏史觀嘅人講，簽咗嘅條約係因為武力或者武力脅迫下簽，就叫做「不平等條約」，咁就無效，咁中華人民共和國逼其他國家簽嗰啲又點計？

1944年，中華人民共和國第一野戰軍第一兵團喺王震率領之下佔領咗「東突厥斯坦共和國」，當中係有伊犁、塔城同阿勒泰三區嘅維吾爾人、哈薩克人、回族人同柯爾克孜人。

1950年，中華人民共和國要求吐蕃承認俾中華人民共和國統治同埋負責國防、貿易同外交事務，咁就「和平解放」佢哋，如果唔係就打到佢哋仆街。雖然最後藏軍投降，簽咗不平等條約，但俾人兼併都無停止反抗，組成「四水六崗衛藏志願軍」同侵略軍打游擊戰，直到達賴喇嘛宣佈停止武裝抵抗為止。

按照中華人民共和國嘅講法，大英帝國同清楚簽嘅租借/割讓香港條約係因為武力因素而「不平等」，咁中華人民共和國同吐蕃簽嘅《十七條協議》都應該無效，用武力侵略東突厥斯坦的土地更加屬於非法侵佔。

—————————————————————

又講下國際法，喺1928年簽《凱洛格—白裡安公約》之前，喺戰爭期，用武力佔領敵國領土喺國際法入面會被視為透過征服(Conquest)而獲得主權，如果兩國用和平條約(Peace Treaty)終止戰爭，咁喺國際法入面會叫做割讓(Cession)去拎到主權。

而「和平條約」係令到交戰雙方用某啲條款做代價去終止戰爭，而根據「時空性原則」喺1842同1860年割讓嘅香港島同九龍半島係符合當時嘅國際法。喺國際法上只有合唔合法、無平唔平等，如果係唔平等，咁西藏同東突厥斯坦都應該獨立。

講完香港島同九龍，就要講吓新界。中華民國從來都無喺新界行使過統治權，亦都無有效咁宣稱過擁有過新界主權，更加無對香港行駛過任何排除其他國家嘅主權行為(act of sovereignty)或者管治。

喺1898年，清帝國同大英帝國簽咗《展拓香港界址專條》借出新界同附近離島99年俾大英帝國。1899年11月16日，就根據《中法互訂廣州灣租界條約》清帝國租咗廣州灣俾法國，同樣都係99年。

1921年，清帝國皇帝頒佈《清室退位詔書》，而份詔書關於領土所寫嘅係「仍合滿、漢、蒙、回、藏五族完全領土為一大中華民國」。咁所以中華民國喺當時繼承嘅係清帝國嘅領土(territory)，係唔包括已經割讓咗俾大英帝國嘅香港島同九龍半島，但就繼承咗清帝國喺九龍城寨嘅領土。當時嘅新界已經唔再係清帝國嘅領土，而係英國領土，所以英文叫做New Territories。中華民國並無因為《清室退位詔書》而繼承新界做領土。雖然《清室退位詔書》有講過領土嘅繼承，但就無提清帝國同外國條約嘅權利同義務(例如租約)嘅繼承(Succession to treaty rights and obligations)問題。

即使中華民國有繼承清帝國同外國條約嘅權利同義務（我哋唔同意），但同時都放棄咗成個香港包括新界嘅主權申索，透過比較大英帝國向清帝國租借新界同法國向清帝國租借廣州灣但用完全唔同嘅方式嚟處理，就可以睇得出中華民國已經放棄咗新界嘅主權。

到1943年，「開羅會議」(Cairo Conference）後，中華民國同大英帝國都唔同意改變戰前嘅領土，即係香港嘅主權同領土都屬於英國，而不屬於中華民國。之後，邱吉爾拒絕將香港交俾中華民國，亦講到「必須踏過我的屍體才能把香港從大英帝國中取走」(Hong Kong would be removed from the British Empire "over my dead body")

喺中華人民共和國成為國家之前，英國已經喺清帝國手中符合國際法咁拎到香港嘅主權。另一方面，中華人民共和國亦都從來無繼承過清帝國嘅任何權益。所以《中英聯合聲明》中所講嘅「對香港恢復行使主權」嘅「恢復」根本就係廢話，完全係一個幻想。

打咗咁多篇，聯合國都未出場，所以下一篇就講聯合國對我哋做咗啲咩。