第98集 － 檢控篇
Loewenstein刑事追溯期 ：好多都冇追溯期，亦冇話過一段時間後就唔會追索，20年前嘅案都可以喺今日告。
正式檢控 ：就係當警察同你講某年某月某日要去法庭，同當你收到正式嘅控罪書就知道，到時認唔認，打唔打，全在乎自己決定；但都要搵定律師。
被控之罪 ：被拘捕時嘅罪名，未必同最後檢控嘅罪名一樣。律政司可以改控你其他罪名，所以千祈唔好相信警察話「你講咗，我哋告少啲」。因為警察嘅工作係「搜證」，氹你講越多嘢越好；而這些證據會交俾律政司嚟檢控，佢哋會睇吓告你邊條罪好。
上庭須知 ：
若案情嚴重會轉去區域法院或高等法院，否則第一次去裁判法院。
喺裁判法院，係可以搵當值律師服務，雖然當值律師服務有入息上限，但第一堂嘅時候係唔需要睇入息，一定唔會收錢而且一定派律師同你過堂先，過左第一堂之後決定唔用係可以嘅。
但係，千祈唔好自己一個走去過第一堂，好多人唔熟悉當中程序運作同鋪排，若一開頭做壞咗，唔用律師，之後係非常難去撥亂反正，
如果之後都係再去裁判法院，當值律師亦可繼續提供服務，大約500幾蚊。當值律師亦容許你指定搵某一個律師，有分大律師及事務律師。
建議搵大律師 ，佢哋喺問話程序等等經驗上都比較豐富。
當案件將轉介去區院或高院，裁判法院嘅法官會提醒你可以搵法援，將案件交由一個大律師同一個事務律師代表你。
法律資源 ：
若被捕後，需要法律支援，民陣、星火、民權監察都有資源，可提供即時協助，好多律師都會願意去初步了解你提供嘅資料去畀免費建議。
但法律支援同上庭係可以好唔同，有時法律支援既律師係唔會上庭砌，因為佢熟悉被捕法律，要上庭佢都會建議畀第二個，而且最緊要搵一個熟識你被控嘅罪行嘅律師。另外，事務律師同大律師之間嘅溝通都好重要。
另外，如果有律師曾經為你提供法律支援，之後同你講，若你被檢控就去法律援助署搵返佢；事實上，你係冇責任要搵返同一個人。大家亦都要記住，若有律師要你，去法援嘅時候點某一間律師行，而實際上嗰間律師行係冇佢名（佢本身係另一間行），咁背後可能有好多問題，因為啲咩原因要掛名去某一間行，而唔係光明正大咁做？
財政支援 ：反送中受傷被捕者支援基金，專門用黎協助畀有需要人。例如上訴得唔到法援，例如收入太高，基金會將案情評核下，可以批核一部份或全部費用。
辯解 ：法庭係講證據嘅地方，你係無做過就係無做過嘅，幾時講都係一樣。所以最有力係令到佢嘅證據唔可信，唔係一定要靠你同佢講，用其他方法證明一樣得，例如物證。
越早認罪有冇so？ ：你唔需要同警察認咗罪先得到刑期扣減，因為認罪係同法庭認。去到法庭先認對你既保障唔會少，你同警察認對你既保障先係最少。
闖入立法會 ：可能干犯嘅罪行：非法集結、強行進入立法會，非法進入立法會。刑期好睇實際行為係啲乜。東北事件就一有暴力可預期係監禁，如有撞玻璃12，18個月有可能。暴動就2-3年。21歲以下刑期考慮又會唔同，衝左立法會有一定風險，但證據有幾多而法庭又會受理幾多，係未知之數。
暴動 ：請參考之前寫嘅文 ，但都略略提；暴動定義是首先參加非法集結。
簽保守行為 ：
意思係承認案情以換取不起訴或無案底，主要分2種；
1. 警察決定唔起訴你，而容許簽保守行為；
2. 警察起訴你，但控方同意被告簽保守行為。
續1.，適用於案情比較簡單輕微。但係，如果係被捕人士同警察去傾就會好蝕底，因為唔知警察考慮嘅係乜嘢，亦唔知點去確保簽保守行為達成；而多數情況警方見你無律師，最基本同唯一一個希望達到嘅目的，就係要你喺警誡之下認罪。
續2.，如果係被檢控之後嘅簽保守行為，就係你嘅代表律師了解咗你嘅案情後，覺得值得一試，就會同律政司傾，就唔係同警察傾；點去傾係有一定技巧去避重就輕，去等律政司考慮各方面再作決定。
← 個人聯絡 (@Loewentstein)
———————
醫療支援 @sharing_ec 或 杏林覺醒：46100186
被捕支援 @Abccbbc ；WhatsApp：98190979 （星火同盟）