第95集 － 被捕篇 之 嫌犯
Loewenstein警方職責 ：當證據搜集到某一個程度，最基本係落一個口供睇你會唔會認罪。
如果警察話會幫你求情，或幫你傾到無案底嚟勸你認罪，又或者話請律師好貴又浪費時間所以快快脆落口供就走得，喱啲全部係錯、錯、錯！
佢哋絕對唔會以你權益為依歸，目的就係要控告你。警察唔會為任何人求情，或無權決定一個人留唔留案底。
所以你除咗最基本講你個名、ID同住邊，合作去影相、打指模，係唔需要同佢合作講其他嘢，除咗講「我冇嘢講」、「我要見律師」。
被捕前 ：將自己中英文名、身分證號碼告知朋友 或 親人，若被突擊搜屋或被捕，有時自己通知唔切就要靠佢哋；自己亦有責任背起律師嘅電話號碼，因為你將要被羈留48小時。
為何被捕 ：你唔會知道佢哋係點搵到你，所以唔太建議一開始就同警察起晒鋼咁出聲否認或作嘢，因為佢哋好可能已經派人跟咗你好幾日、向你朋友套咗好多話，或許在其他地方掌握咗啲有利嘅證據，先再搵上門。最重要係講少錯少。
正式拘捕 ：警方必須向你作出【警誡】先算叫做正式拘捕，有耳熟能詳嘅對白，同時將你帶到一間警署：
「我懷疑你犯了XXXX事，而家要將你拘捕。唔係是必要你講嘅，除非你自己想講喇，但係你所講嘅嘢，可能用筆記低及用黎做證嘅」。
到警署後 ：程序上警察會先帶你去見警署嘅「值日官」，喺本簿度記低你嘅被捕紀錄，畀你confirm返個時間。如果阿sir「唔記得咗」叫你坐係一邊等，就一定要提醒。
值日官 ：係一位同你被捕無關嘅警員，在被捕過程中若有任何投訴（例如：遲遲唔俾畀律師、有人凶你)，都可以要求佢喺簿度記錄（包括涉事PC編號、時地人事），日後要上庭時就可以作為證據向法官反映。
電話 ：
可以要求手機電及SIM 卡可以分開唔同證物袋，或者用張紙包住，以防封口後仲可以搞部電話。
如果被警方威逼利誘開咗手機，當中證據仍然係可以呈予法庭，因為香港唔同美國，就算係非法手段得到嘅證據係仍然可以呈堂。
不過，法庭會有酌情權去審視整個搜證過程，去決定證據是否可以呈堂，但去到喱一刻其實已經太遲了。
《被捕經過》 ：
總督察以下嘅警員都有本記事冊，藏於軍裝警員帽內以記錄當日做過嘅公務；若拘捕咗人，就要盡快記低拘捕過程與被捕人士的對話，譬如警員咩時間拘捕、警誡被捕人士、佢有咩回應或承認罪行之類。
當中最常見出現的「特別情況」呢，就係警員拘捕被捕人士之後，被捕人士話 「阿 sir 俾次機會呀」，「對唔住，我知錯啦」之類嘅說話。喱個記錄之後就會被法庭接納為認罪，好多人都因為咁而打唔甩，或至少表證成立。
警察可能會要求你簽署一份補錄嘅《被捕經過》，內容有機會天馬行空，要拒絕簽署；無計可施嘅阿sir就會尋求上級幫手簽名，而你亦有權攞返份副本，日後要上庭時就可以作為證據向法官反映。
但佢哋可能要過兩日先寫返，因為被捕人士可能已保釋咗，佢唯有「好好人」咁幫被捕人士表達埋唔要副本。
所以被捕期間，任何錄影會見之前，被捕人士或律師可以要求警察俾咗呢個警誡記錄先，否則被捕人士可以拒絕進行錄影會面，咁就可以避免警察事後「寫作」會出現啲靈異對話用嚟入你啦。如果警察當時俾唔到個記錄，事後又提交任何「認罪」記錄上法庭，本身就犯咗技術錯誤，法庭會懷疑是事後補錄，警員要解畫點解要事後咁耐先補錄證供，佢寫到幾罪證確鑿都好，法庭都未必會理，或者懷疑證供真確性，咁基本上就可以打低一半「警察是誠實可靠的證人」的機會。
臭格 ：正式名叫「羈留室」，但叫得臭格，就實係臭架喇。所以要有心理準備，鼻敏感記得叫阿sir畀多啲紙巾。
你嘅權利 ：無論有咩人想同你傾偈或問你嘢，喺律師嚟之前，你只係識講
1. 我冇嘢講（ 非常重要 ）；
2. 我要搵律師（不限次數，聯絡上後告知 中英文名、ID、所在警署）；
3. 我通知屋企人（不限次數）；
4. 律師嚟到前我唔會簽任何名或錄口供；
5. 我要紙筆寫低今日發生嘅嘢；
6. 我肚餓要食嘢；
7. 我口渴要飲水；
8. 我唔舒服要睇醫生/驗傷；
9. 我要向值日官投訴（看住佢係簿上寫下記錄，包括涉事PC編號、時地人事）。
投訴 ：若你覺得自己嘅權利被剝削，譬如係搵律師上可能拖得就拖，想多啲時間凶你，你可以向值日官投訴並要求喺簿上紀錄，日後在法官面前就會成為一個有力嘅理據；如果你擔心阿sir唔記得寫低投訴，你不妨自己要求拿紙筆，紀錄低自己嘅被捕過程同投訴內容，以免阿sir唔記得。
我冇嘢講 ：
係指唔好喺律師嚟之前同人講任何嘢，以免講多錯多，令到最後無法補救。
就算佢畀影片、照片，甚至係其他被捕者會面錄影片段，都係要「我冇嘢講」。
即使到場可能係新進大律師或trainee，同律師講嘅嘢就係受legal professional privilege保障，即係你可以向律師和盤托出，而佢一定唔可以同外人講。
認人手續 ：
若案件有受害者，或需要辨認個人；首先認人手續你唔一定要參與，同警戒會面（落口供）或做案件重組係無分別，係可以拒絕。
到底係唔係真係參與認人手續，都要同律師商量去安排時間。至於被捕後拘留一段時間，警方反對保釋，而原因係要進行認人程序，法庭大多數唔會接納。總之唔需要急，你係唯一保障到自己，就係等律師到場。
律師職責 ：佢到警署並唔代表你即刻走得，佢嗰一刻得一個目的，就係嚟保釋，畀你返屋企。佢可以單獨同你開會，提醒返你嘅權力、幫你傳信息出去、陪你落警誡口供。但如果警察係都要鎖你48小時，律師都不會一直陪住你，佢幫你搞完所有嘢（警察ID、被捕理由、核對被沒收到嘅嘢、見證你簽署...）後就會離開，剩下的時間就要靠你自己捱落去。
幾時攞得電話 ：警方有權繼續拘留身上的物品，包括手機。所以最好一開始要求把手機、sim卡、電池分開袋，以免手機被扣留間，有任何資訊被警察看到。不成功的話，請交由律師為你爭取。
預約被捕 ：可能之前拉過一次，或者喺當時嘅場合抄低左你ID，知道你個名，亦知道你住邊。當警方完成調查後，一係已經準備起訴你，一係只係拉你開始準備起訴嘅程序。不過多數都會係上門捉。
← 個人聯絡 (@Loewentstein)
———————
醫療支援 @sharing_ec 或 杏林覺醒：46100186
被捕支援 @Abccbbc ；WhatsApp：98190979 （星火同盟）