第37集－選舉主任權力
Loewenstein
為2019年區議會選舉，選管會出咗一份新指引，喺7月10日前會截止諮詢，公眾諮詢大會將於星期二，即係6月25日下午7時至9時，喺 香港鰂魚涌基利路1號鰂魚涌社區會堂 舉行。
好，一步一步嚟，先講會令網友覺得有爭議嘅部分 — 第三章。
關鍵係，今次加入咗同2016年立法會選舉嗰陣一樣「加料聲明」。
我先唔講「加料」，我先講「聲明」。
首先，根據香港法例第547章《區議會條例》第34(1)(b)條，指出要獲提名嘅候選人必須遵從以下規定：
(1) 除非符合以下條件，否則任何人不屬獲有效提名參加選舉的候選人 ——
(b)提名表格載有或附有一項示明 該人會擁護《基本法》和保證效忠香港特別行政區的聲明。
再根據香港法例第541F章《選舉管理委員會(選舉程序)(區議會)規例》第104條，當中：
(1) 任何人在與 選舉有關的文件 中作出他 明知 在要項上屬 虛假的陳述 ，或任何人 罔顧後果 地在該等文件中作出在要項上不正確的陳述，或任何人 明知 而在該等文件中遺漏任何要項，均屬犯罪。
(3) 任何人犯本條所訂的罪行，可處第2級罰款及監禁6個月。
將啲重要字眼整粗咗方便你哋睇，簡單講同選舉有關嘅文件，包括嗰份「聲明」，如果明知而作出虛假陳述，或罔顧後果，都需要負上法律責任。
依家講「加料」，目的取自原文：
協助選舉主任行使法例賦予的權力履行其職責，確保提名程序能依法完成；候選人亦可藉簽署確認書表明他/她已理解上述要求和責任。候選人須注意，擁護《基本法》是指擁護《基本法》各項條文，包括第一條、第十二條及第一百五十九(四)條的規定。
《基本法》第 1 條訂明:“香港特別行政區是中華人民共和國不可分離的部分。
《基本法》第 12 條訂明:“香港特別行政區是中華人民共和國的一個享有高度自治權的地方行政區域，直轄於中央人民政府。
《基本法》第159(4)條訂明:“本法的任何修改，均不得同中華人民共和國對香港既定的基本方針政策相抵觸。
本身諗住遲吓講選舉主任，何以咁多年嚟無人認識，喺2016年後成為泛民喊打嘅過街老鼠？
因為有好大懷疑由以往嘅掌心當等等明目張膽嘅行為，轉變成為喺選舉入門之時就將你抹殺，選管會淪為政治工具。
點解會有咁嘅想法？
本身張「聲明」只係「擁護《基本法》和保證效忠香港特別行政區」，依家「加料」，變咗「擁護《基本法》是指擁護《基本法》各項條文，包括第一條、第十二條及第一百五十九(四)條的規定」。
咁真係好奇怪，基本法係憲制性文件，條條都一樣咁重要，點解一定要喱幾條？哦，係有當時社會背景，記得2016年有港獨之風嗎？
以現時港獨之風不成氣候，第1條同第12條嘛，擁護？OK，冇咩相干。咁第159(4)呢？其實就係唔想人去改基本法，總之大陸認為你嘅修改係有違「基本方針政策」，你就算跟足程序都冇用。喱個說法，其實可以換個樣，以林鄭等人語調嚟講 ——
「哦，要修改基本法呢，我哋有一個行而有效嘅機制去處理嘅」
但大家都知個機制唔work個喎！
「大家可以依從喱個行之有效嘅機制去提出對基本法嘅修改嘅。」
即係，既然改基本法本身係一個唔可能嘅事，第159(4)條都係冇用。喱份「加料聲明」，喺2016年或者係不能接受，但喺2019年嘅接受程度可能大返好多。
咁惡魔在細節，在於邊度？
或者2016年有人都問過，既然選管會無權參與，咁當時決定喺聲明「加料」係邊個？
雖然根據香港法例第547章《區議會條例》第34(1)(b)條，無要你一定要喺張聲明上面簽署，但係 ——
喺喱份指引下要你「真誠地」簽聲明附有嘅一份確認書，你敢唔敢唔簽？你唔簽，即係你唔確認有關聲明，即係選舉主任可以依法DQ你。
選管會笠晒頭盔，話喱個係選舉主任嘅決定，佢喺你參選嘅時候已經大晒可以DQ你，仲可以攞正牌、光明正大起你底，根據你以往嘅言論就DQ你，哪怕你青葱歲月之時輕狂驕縱。
Sorry，坐緊監都叫可以有更新機會，你？Bye。
不過，請各位關注一單將會有「書面裁決」嘅案（編號：HCAL 804/2018），係周庭嘅DQ上訴案。（新聞一、新聞二）
BTW，「為了確保所有候選人於簽署提名表格內的有關聲明時，已清楚明白《基本法》的相關條文以及作出有關聲明的法例要求和相關責任...」，喂可能真係有人唔識，不如成本基本法擺喺參選表格appendix度仲好喇，係咪？
← 個人聯絡 (@Loewentstein)
———————
醫療支援 @sharing_ec 或 杏林覺醒：46100186
被捕支援 @Abccbbc ；WhatsApp：98190979 （星火同盟）