【文化史觀——洗腦「偽」術】

「中華民族」、「炎黃子孫」同「龍的傳人」係因為政治需要而被創造出嚟嘅政治術語，目的係合理化兼併同阻止獨立。

一般嘅字詞好似「杯」、「咖啡」、「魚」、「草」等等係人類根據日常生活經驗而創造出嚟，並且係約定俗成咁被普羅大眾使用。因為呢啲字詞係具體描述某啲事物，所以極難用嚟蒙混詭辯。如果一個人指住一隻鹿，叫佢做馬，錯誤係顯然易見。創造出嚟嘅政治術語唔係描述具體事物，而係描述抽象嘅意念，所以政客好容易就利用政治術語去蒙混大眾，達到佢哋唔正當嘅政治目的。

「龍的傳人」係其中一個最廣為人知嘅政治語詞，源於台灣歌手侯德健喺1978年所寫嘅歌曲《龍的傳人》。

歌詞入面，侯德健以華夏族嘅「龍」圖騰借喻所謂嘅「中國」，並且用「黃河」、「長江」同「古老的東方有一群人」去借喻所謂中國人係古代生活喺黃河同長江流域嘅人。經侵略台灣嘅中華民國官方宣傳機器高調推廣，《龍的傳人》成為咗家喻戶曉嘅洗腦歌曲，甚至成為咗「中華民族」嘅同義詞。

《龍的傳人》歌詞充滿華夏種族主義嘅味道，但就缺乏邏輯，例如「黑眼睛黑頭髮黃皮膚，永永遠遠是龍的傳人」一句令到唔少人到今天都用「係咪黑眼睛黑頭髮黃皮膚」去質疑其他人係咪所謂嘅「中國人」。

事實上，呢啲係完全唔合邏輯 ，例如日本人就係黑眼睛黑頭髮黃皮膚，但並唔係所謂嘅「中國人」。再講，台灣人、百越民族、西藏人、東突厥斯坦回族人、南蒙古同東北嘅滿人都唔係居住喺黃河同長江流域嘅人，照理唔屬於歌詞中所定義嘅「中國人」。咁呢啲「非中國人」嘅民族又點解必定要一齊困住喺一個國家呢？

「炎黃子孫」可能係華夏族最早創製嘅政治術語，但係邊個同幾時首先使用就好難考證。「炎黃子孫」呢個詞語入面，「炎」同「黃」兩個字分別指遠古神話傳疑時代炎帝同黃帝所統率嘅部落，而「炎黃子孫」就係指由呢兩個部落所繁衍嘅後代。

同「龍的傳人」術語比較，「炎黃子孫」除咗原居住地域同種族主義外，更包括咗正統傳承、認祖歸宗嘅血族主義 ─ 炎帝同黃帝部落嘅血脈(bloodline)。

「炎黃子孫」係洗腦政治術語，目的係配合將所謂「中華民族」或者「中國人」嘅承傳歷史推前到難以考證嘅神話傳疑時代，令「中華民族有四千年或五千源遠流長歷史」嘅政治宣傳合理化，並且構築一個「歷史越悠久，民族越偉大」嘅錯覺，令被統治嘅人主動咁選擇認同自己係所謂嘅「炎黃子孫」。

事實上，炎帝同黃帝嘅部落只係神話傳疑時代嘅產物，而有關嘅描述係夾雜住神話同口傳嘅歷史，準確度成疑。炎帝同黃帝係真有其人定只係部落首領嘅尊稱都係眾說紛云，無從考證。炎黃二帝連骸骨都無搵到，而黃河同長江流域又多次受外族侵攻，用現代科學去追溯炎黃部落嘅去氧核醣核酸(Deoxyribonucleic Acid，簡稱 “DNA”)，再比對鑑定今日嗰啲人最初係咪源自炎黃部落係幾乎係唔可能。咁所以，所謂「炎黃子孫」只係主觀選擇自己係咪源自炎黃部落，認就係，唔認就唔係，完全無客觀嘅基準。換句話講，個人係唔係「炎黃子孫」只係身份認同嘅事，而官方教育機器一直宣傳呢個政治術語，只係洗腦咁要求學生主觀認同呢個身份，而唔係客觀咁審視呢個身份係咪合理。

相對「炎黃子孫」同「龍的傳人」嘅種族意味，近代嘅漢族種族主義者創造出「中華民族」呢一個政治詞語，意圖合理化漢族佔領其他民族嘅土地，以瓦解嗰啲民族嘅獨立、反抗同復國意志。

雖然「中華」一詞喺上古嘅華夏族典籍中已經用緊，但有多元民族涵義嘅「中華民族」就係近代嘅政治發明。1902年，梁啓超喺《中國學術思想變遷之大勢》入面用「中華民族」一詞，呢個詞語喺當時淨係指漢族：「今之中華民族，即普遍俗稱所謂漢族者」。華夏族革命組織興中會嘅誓詞係「驅逐韃虜，恢復中華，創立合眾政府」。其中「韃虜」、「胡虜」或者「韃子」係漢族對蒙古族、滿族呢啲北方入侵種族帶貶義同敵視嘅稱呼。相對嚟講，「中華」就係指漢族政權。同樣喺清帝國末年，湖北革命團體共進會同發動「武昌起義」成功所成立嘅湖北軍政府所用「鐵血十八星旗」嘅九個黑色角代表《禹貢》入面記載嘅冀、兗、青、徐、揚、荊、豫、梁、雍九州。黑九角內外兩圈各有九粒共十八粒圓星，代表關內漢族嘅十八行省；星呈金黃色，表示同清帝國滿族對立嘅漢族炎黃子孫。