控方代表 #馬藻玉大律師 繼續盤問被告 (2)
控：我地頭先食飯前就講緊太平洋貿易中心個單位，公司幾時租呢個單位㗎？
被：好似係2019年頭
控：你嗰個觀塘嘅餐廳就係2016年開業㗎嘛？
被：係
控：咁就2018至19就開多間，喺銅鑼灣？
被：係
控：咁呢個太平洋貿易中心呢個單位就係2019年租嘅？
被：印象中我唔係好記得，大概2019年頭2018年尾
控：你話公司租呢個單位有三個用途，第一個用途就係用嚟做貨倉嘅？
被：係
控：咁你記唔記得點解會去到2018、2019年頭需要搵個地方做貨倉？
被：嗰陣時因為啱啱擴展咗銅鑼灣，開始發現啲嘢唔係好夠位擺，同埋洗衫都幾貴，咁就決定租個單位有呢個用途
控：組呢個太平洋中心係因為擴展到銅鑼灣之後先覺得有個需要啦？
被：係
控：咁點解唔喺銅鑼灣或者港島度租個單位做貨倉啊、休息啊、洗衫啊，咁呢？
被：租金問題
控：而家仲有冇繼續租用呢個單位？
被：而家仲有
控：講一講你嘅三大目的，第一個目的就用嚟做貨倉，你食飯之前就講有節日啲裝飾啦，咁除咗裝飾物之外仲擺咗啲咩？
被：亦都有啲碗碗碟碟、雜貨，包括紙巾、紙張
控：咁係咪啲員工將呢啲垃垃雜雜嘅嘢，裝飾啦、碗碗碟碟啦、紙巾啦、紙張啦，拎去太平洋貿易中心嗰度儲存㗎？
被：同意
控：需要使用嘅時候都係餐廳嘅同事去呢度攞出嚟去餐廳到用㗎啦？
被：同意
官：Miss Ma我希望唔好太離題
控：好
控：咁你每隔一兩個月你就上去呢個貨倉到提貨，提咩貨？
被：Lumlumsumsum嘅嘢，因為當同事唔方便去嗰陣就我去囉
控：第二個目的，你話洗衫嘅，洗衫係咪制服？
被：制服，同埋其他嘅衣服
控：其他嘅衣服？
被：制服，即係廚師衫、廚師服、同埋同事當日嘅便服
控：便服？
被：因為會有同事上去休息呀嘛
控：或者咁講，你地餐廳同事嘅制服、廚師服，大部分都係你地公司負責幫佢哋洗？
被：大部分
控：係咪一個專責嘅同事去洗呢？
被：都唔係，輪住
控：今朝早俾你睇嗰度太平洋中心嘅相裡面，有冇邊度見到掛住你地公司嘅衫？或者睇多次啦。
-展示P27相冊(3)相片14-28-
被：喺呢疊相影唔到
控：影唔到，好。
控：呢個單位你都會同意離你嗰個觀塘嘅餐廳有成2至3公里咁遠嘅？
被：實質數字唔係好清楚，行路嘅話十五分鐘，揸車嘅話就五至十分鐘。我唔係太肯定確實嘅距離
控：我用Google map參考啦，個資料就話人行就兩公里，車行就三點二公里。你都會同意啦，你地放工之後都要行過去休息。
被：同意
控：你喺2019年都有呢個太平洋中心，咁點解你唔將喺銅鑼灣個廿四部電視機擺喺呢個單位，而要擺喺銅鑼灣餐廳到，阻礙你營運呢？
被：因為觀塘呢個單位有升降機。呢個單位喺17樓，呢個大廈架𨋢最高可以去到16樓，而當日時間好趕急，我地冇咁多時間分輪
控：咁你呢個太平洋中心呢個單位個密碼鎖個密碼，你公司除咗你之外仲有咩人知道？
被：收銀員、餐廳經理、餐廳caption、水吧經理、副經理、水吧caption、主廚、二廚，大部分長工都知道
控：頭先提到有部車ULXXX，你話係公司車嚟。
被：同意
控：你自己私人有冇車㗎？
被：私人我冇車㗎
控：如果你需要用車嘅話，你都會用呢個ULXXX？
被：如果有公事嘅話係
控：你就話呢，你淨係會用呢部車簽收文件用。
被：大致同意
控：咁你有幾常用呢部車簽收文件啊？
被：我諗大致上一個月一兩次
控：呢部車我地都有一堆相片嘅，想你睇下
-展示P27相片1-7-
控：我想問一問你，第五張照片就影住呢架車嘅擋風玻璃呀嘛，係咪？
被：係
控：我見到擋風玻璃嗰度好明顯有個牌寫住9xxx 5xxx，就展示電話號碼呢個牌，見到呀可？
被：見到
控：呢個就係自己個私人電話號碼啦？
被：正確
控：點解喺呢架ULXXX個車頭擋風玻璃呢個位擺你嘅手提電話喺到呀？
被：因為作為餐廳負責人，而呢架車都係用餐廳登記嘅，而呢個係用我自己電話登記嘅，方便如果有咩事嘅話可以聯絡到我本人
控：你嘅意思係咪，呢個牌係長期擺喺架車裡面㗎？咁即使任何一個伙計揸呢部車出去都係顯示呢個牌嘅？
被：正確
控：你嘅伙計揸架車發生意外，就可以有人打電話俾你，就唔需要搵當日個司機啦？
被：正確
控：喺車上面搵到一啲物品，都影左相，啲物品屬唔屬於你嘅？
被：唔屬於我
控：我都未問。
被：你把口問
控：我未逐樣逐樣問喎。
被：大部分唔屬於我
-展示P？相片8-11(?)-
-相片顯示車內物品，包括鞋、鴨嘴帽、口罩、背囊、背囊內的生理鹽水，被告指所有物品都並非屬於自己，亦不知道物主是誰-
控：呢啲車上嘅物品係2019年11月29號即係拘捕你嗰日見到喺車上面嘅，你嗰日係咪被拘捕之前就揸過呢部車嚟？
被：係
控：咁你嗰日上車揸呢部車嘅時候，係咪已經發現到我地頭先講咁多樣唔屬於你嘅嘢？
被：冇留意到
控：冇留意到呀？咁你上過司機位都冇睇見司機位側邊有呢啲口罩咩？
被：冇留意
控：冇見到嗰個後座嗰個黑色背囊呀，嗰啲唔屬於你嘅物品，冇留意到咩？
被：冇留意
控：喺呢個11月29號對上嗰次，你係幾時用過呢部車？
被：我估計應該係10月尾
控：你10月尾嘅時候都冇留意到車上面係咪有我頭先指出嚟口罩呢啲物品啦，係咪呀？
被：係
控：照你嘅講法，部車就你所有餐廳嘅員工都可以使用，用嚟做公務。
被：我頭先係話大約五至六個人
控：係五至六個人用得嘅。
被：係
官：嗰五至六個人包括你自己呀嘛？
被：係
控：有冇吩咐過其他嗰四至五個人唔可以喺車上面擺自己嘅私人物品呢？
被：冇
控：即係你容許餐廳嘅四五個人可以隨便喺你部公司車裡面擺佢地自己嘅私人物品？
被：正確
控：有冇諗過如果你餐廳嗰四五個人其中一個人擺咗啲違禁品係裡面，而你嘅私人電話又擺咗喺上面，會令你惹上不必要嘅官非呢？
被：冇諗過
控：睇下你有冇印象，你話你2019年11月10號嗰日送返啲電視機去元朗，記唔記得嗰日你著咩衫呀？
被：冇留意
控：你自己本人有冇mash potatoes all day嘅T shirt，你有冇㗎？
被：冇印象
控：咁你話送電視機嗰日call咗部貨車，二百幾蚊嘅，點樣俾錢㗎？記唔記得？
被：現金
控：你試過一次同呢個譚先生叫佢俾口供，記唔記得你喺邊個地方邀請佢同你俾口供㗎？
被：唔記得
-展示P15閉路電視截圖-
控：呢個截圖第一張就係太平洋貿易中心嘅度拍嘅，見唔見到中間有一個著住白色T shirt呢名男子，你認唔認得影住呢個人？
被：唔認得
控：係咪你嚟㗎？
被：唔係
控：俾多少少資料啦，第二張相都係呢個人嘅背面嚟嘅。認唔認得佢係咪你嚟？
被：唔係，唔認得
控：第三張照片啦，就影住呢個人登上呢架ULXXXX嘅，認唔認得呢個人呀？
被：唔認得，不過我有少少嘢想補充。我睇唔到呢架車係ULXXX
控：你公司有冇人嘅身材好似呢個人咁㗎？
被：冇乜印象
控：另一張相吓，睇二十五同埋二十六啦，影到一個戴著深色帽、白色T Shirt呢個男子，見唔見到？
被：見到
控：呢個係咪你嚟㗎？
被：唔係
控：我向你指出案情，你只需要回答同意唔同意。我向你指出2019年11月10號，你喺三點零五分到你係離開太平洋貿易中心。
被：不同意
控：離開之後呢，你就係登上ULXXX呢架車，同唔同意？
被：不同意
控：之後你將呢架車駛去生產力促進局出面，就停咗喺生產力促進局處路面啦，同唔同意？
被：不同意
控：之後你攞車，就行去達之路嘅公共交通交匯處，之後就去又一城啦。
被：不同意
控：入咗又一城之後，你喺又一城不同嘅樓層，包括G層、L1層、UG層，遊走嘅。
被：不同意
控：期間你亦都有進入過G層一個男廁嘅，同唔同意？
被：不同意
控：之後你就戴上一個口罩，就衝入去L119千両外面嘅人群中襲擊警務人員A、B、C、D，同唔同意？
被：不同意
控：個過程就係首先襲擊警務人員B，跟住試圖從C手上將佢控制嘅一名女子拉走，同唔同意？
被：不同意
控：之後你就襲擊其他警務人員啦，D、A。
被：不同意
控：跟住在場其他人士就加入襲擊警員，同埋將嗰個女子搶走，同唔同意呀？
被：不同意
控：你襲擊警察，一路糾纏期間，你頂帽跌咗落嚟，同唔同意？
被：唔清楚
控：你當時穿住嗰件白色T shirt個短袖係遮蓋咗你右臂上面嘅紋身，但係喺下面係露出咗少少紋身嘅。
被：唔清楚
控：之後你就離開啦，你就離開又一城返返去你泊車ULXXX嘅地方上車離開啦，同唔同意？
被：不同意
控：你喺襲擊完警察之後，喺呢個截圖側第三十七張開始(P15CCTV截圖15)，你見唔見到有一個紅色圈圈住一個人？
被：冇，我見唔到
控：望一望，想你指出個案情，三十七張呢個照片圈住嗰個人物白色衫嗰個人物，控方個講法呢個係你嚟嘅，你就除咗口罩嘅，你回答同意唔同意就得㗎啦。
被：我不同意呢個係我
控：之後你就返去ULXXXX呢架車就離開啦。
被：不同意
-盤問完畢-