📝 گەڕانەوە
ڕۆژێ لێرە بڕۆین
دوور لە باوەشێ بیرەوەرییەکان
هەناسەی دەلاقەکان
بست، بستی ئەم شارە بپێوین
کۆڵانەکانی ترس و
هەنگاوەکانی مەرگ و
حەسرەتەکانی دوور، بی جێ بهێڵین.
لەم ڕێگایە
پێویستی نییە دەستم بگری
من، هێمای ڕازاوەی ئاشتیم
تۆ، تەنانەت بە دواما ڕێ کەوە
ئەم بارمتەی زستانە و
تاراوگەی خەونستانە
کە دار و دیوار باوەش بە مەرگا دەکەن و
چرپەی تەنیایی ئاهەنگی ژیانە
بەجێ بهێڵین ...
٭٭٭
من؛ لێوی دەروازەکانی جیهانت بۆ دەکەمەوە
سنوورەکان هەڵدەوەشینم و
کوێرای گومانت لا‌دەبەم
تۆ؛ تەنانەت بە دواما ڕێ کەوە
لەم ڕێگایە مەترسە
هەموو قەڵاکانی درۆ
لە بەر پێت خاپوور دەبن،
ئەفسانەکان دەسڕێنەوە
ڕاستییەکان کڕنۆشت بۆ دەبەن
بەو شەرتەی عەشقم لە دڵتدا بێت و
باوەشت پڕ لە خۆشەویستیم
لەم ڕێگایە مەترسە
سێبەری هەردووکمان یەک پەیکەرە
لە گۆڕەپانی مان و نەماندا ...
٭٭٭
تۆ؛ لە شەڕی تایفەکان و
هێرشی وڵاتی دراوسێ و
هێروشیما و هەڵەبجە نامری
لە تەقینەوەی بۆمب و
ئاگر و لافاو نامری
مەرگی تۆ ئەو کاتەیە
لە دڵی مندا جێگات نەبێت و
چاوم بە دواتا نەفڕێ ...
٭٭٭
وەرە؛
من دەستی تۆ دەگرم
چرکەکان هاوپەیمانی منن لەم کاتەدا و
ڕێگای گەڕانەوە باش دەزانم ...
وەرە؛
من دەستی تۆ دەگرم
تا قامکی سارد و سڕی دوودڵی
ببێتە هەتاوی متمانە و
ڕێگای گەڕانەوە ڕوونتر بکاتەوە.