Ҳоким ёрдамчилари — халқ орасида

Ҳоким ёрдамчилари — халқ орасида

Buxoro.uz


“Мирвоши” маҳалла фуқаролар йиғини биносига кириб борганимизда чошгоҳ пайти эди. Йиғин ходимларидан ҳоким ёрдамчисининг қаерда эканлигини сўрадик.

— Ҳозиргина Баҳрин қишлоғига иш билан кетган эдилар. Ҳали замон келиб қоладилар, – дейишди улар.

Ҳаял ўтмай ҳоким ёрдамчиси Мадамин Каримов йиғин биносига кириб келди. Тўладан келган, юзлари офтобда бироз қорайган, қарашлари ўткир бу йигит биз билан самимий кўришди.

— Юз эшитгандан кўра бир кўрган афзал, деганлар. Қилинган ишлар хусусида кейин гаплашамиз. Ҳозир мен билан юринглар, маҳалладан ва мендан зарур кўмак олиб, ишли бўлган ва оиласига даромад келтираётган хотин-қизлар ва ёшларнинг бугунги фаолияти билан танишсак. Қаршимасмисизлар?, – деди у.

Биз унга розилик билдирдик. Бизга йиғиннинг хотин-қизлар фаоли лавозимида ишлаб келаётган Нигора Қиёмова ҳам ҳамроҳ бўлди.

— Мана шу тикувчилик фабрикаси. У йиғиндаги эски дала шийпони ўрнида барпо этилган. “Вобкент агропроминвест” МЧЖ ҳузурида шу йил март ойидан ўз фаолиятини бошлаган цехда 60 нафар хотин-қизлар астойдил ишламоқдалар, – дея гап бошлади корхонага кираркан ҳоким ёрдамчиси.

— Ишлаб чиқарилаётган маҳсулотлар ҳақида сўз юритсангиз. Уларнинг харидорлиги сизларни қониқтирадими? – дея сўрадик цех бошлиғи Моҳигул Шеровадан.

— Цехимизда ҳозир экосумкалар ишлаб чиқарилмоқда. Анчагина маҳсулотларимизни Польша давлатига экспорт қилдик. Шунингдек, цехимизда ўқувчилар учун мактаб формалари, бошқа буюртмалар асосида кийимларни тикаяпмиз. Яқин орада шу цех ёнидан яна 100 ишчи меҳнат қила оладиган фабрикани қуриш кўзда тутилган. Цехимиз ишчилари аввал “Аёллар дафтари”да бўлган хотин-қизлар бўлиб, бугунги кунга келиб муқим иш ўрнига эга бўлишди. Бу ерда ишчиларга бепул тушлик берилади. Ойлик маошларимизни ўз вақтида олиб турибмиз. Бизга ана шундай иш жойини яратишга катта кўмак берган ҳоким ёрдамчимиз ва маҳалла фаолларига раҳматлар айтамиз. Илоҳим, эзгу ниятлари ушалаверсин!”, – дейди жамоа етакчиси.

Тажрибали тикувчи Зарина Шукруллаева шундоққина йиғин яқинидаги кўчада жойлашган янги уйида фаолиятини давом эттираётган экан. У 1992 йилда туғилган. Аввалига бир ўзи ишлаган тадбирли аёл йиғинга, ҳоким ёрдамчисига кредитга машинкалар олиб беришларини сўраб мурожаат этди анча илгарироқ.

 Уларнинг саъй-ҳаракатлари билан атиги 2 кунда тадбиркорга 7 та тикув машинкаси олиб берилди. Тикувчи ўз ёнига иш излаб юрган жувон ва қизларни чорлади. Айни кунда 10 нафардан кўпроқ шогирд тайёрлади. Ҳозир касб сир-асрорларини ўрганаётган Дилноза Акрамова, Гулмира Ғафурова ва Умида Рустамовалар мустақил ишлай олиш лаёқатига эга бўлишди.

Яна бир шогирди Наргиза Ашрапова алоҳида фаолият юритмоқда. У устозидан жуда миннадор эканлигини изҳор этди. Зарина Шукруллаеванинг ниятлари катта. У нафақат тикувчилик цехини кенгайтирмоқчи, балки уйидан тикилган тайёр маҳсулотлар учун савдо дўкони очишни режалаштирган.

Шогирдлар сафини кенгайтираётган тикувчи ўзига яратиб берилган шарт-шароитлар учун миннатдорлик изҳор этди:

— Айни пайтда қишлоқ аҳли ва ишсиз юрган ёшларга Юртбошимиз томонларидан кўрсатилаётган ғамхўрликдан бошим осмонда. Ҳоким ёрдамчимиз Мадамин Каримовга ҳам катта раҳмат! Ана шу ғамхўрликка жавобан астойдил ишлаб, элюртга фойдам тегишини хоҳлайман.

Шу ўринда айтиш жоизки, йил бошида маҳаллада 237 нафар ишсизлар борлигини қайд этилган бўлса, шундан 132 нафарини хотин-қизлар ташкил этади. Йиғинда кўрилган зарур чора-тадбирлар туфайли 103 нафар аёллар ва ишлик бўлишди. Шундан 25 нафарни аёллар, 15 нафари қизлар ташкил этаётганлиги қайд этиш даркор.

— Янги Ўзбекистон мамлакати қурилишида иштирок этиш имконияти берилгани ва ушбу билдирилган ишонч менга улкан масъулият ва мотивация берди. Президентимиз таъкидлаганларидек, ягона йўлимиз тадбиркорлар сонини кўпайтириш, одамларни ишбилармон қилиш. Ниятим, қисқа фурсатларда маҳалладаги барча фуқароларни ўз ҳудудимда иш ўрни, даромад манбаи билан таъминлаш, ёшларни ўқитиш ишларини жонлаштиришдир, – дейди Мадамин Каримов.

Шуҳрат Шаропов,
Вобкент туман ҳокимлиги ахборот хизмати раҳбари

Report Page