ҲОМИЛА ТУШИШИ ҲАҚИДАГИ КЎП СЎРАЛАДИГАН САВОЛЛАРГА ЖАВОБЛАР

Барча ҳомила тушишларидан кейин ҳам тиббий аборт қилидириш керакми?

Агар тўла ҳомила тушиши содир бўлмаса, тиббий тозалаш (аборт) қилиниши керак. Чунки бачадон ичида қолиб кетган тўқима парчалари қон келишига ёки инфекция ҳосил бўлишига сабаб бўлиши мумкин.

Тиббий абортдан кейин неча кунгача қонли ажралма келади?

Ҳомила тушишидан кейин қилинган тиббий аборт оқибатида қон келиш миқдори вақт ўтган сайин камайиб 2-7 кунгача давом этиши мумкин. Кўпинча бу қон келиши қотиб қолмаган қон шаклида ва миқдори ҳам ҳайз вақтида келадиган миқдордан кўп бўлмайди. Агар қон келиши муддати 10 кундан ошса назорат қилиб туриш лозим бўлади. Баъзида эса тиббий абортдан кейин умуман қон келмаслиги ҳам мумкин. Бу ҳам нормал ҳисобланади. Агар қон келиши билан бирга бадбўй ҳид ҳам келса бу яхши аломат бўлмай инфекция бўлиши мумкинлигига ишорат қилади. Бундай ҳолатда албатта даволовчи шифокорингз билан маслаҳатлашинг.

Тиббий абортдан кейин неча кундан кейин ҳомиладорлик тести натижаси салбий кўрсата бошлайди?

Ҳомила тушиши ва тиббий абортдан кейин ҳомиладорлик тестларида 15-20 кунгача янглиш ўлароқ ҳомиладорлик бор деб кўрсатиши мумкин. Шунинг учун 20 кундан олдин ҳомиладорлик тести ўтказишнинг маъноси йўқ.

Ҳомила тушишидан кейин илк ҳайз қачон келади?

Бир ҳомила тушишидан кейин қўлланилган тиббий абортдан 4-6 ҳафта ўтгандан кейин илк ҳайз келишини кутиш мумкин. Агар ҳомиладорликдан олдин ҳайз келиш муддати кечикиши кузатилган бўлса, бундай ҳолатда абортдан кейин илк ҳайз келиш палласи яна ҳам кечикиши мумкин.

Қон гуруҳлари мос келмаслиги ҳолатларида қандай қўшимча даволаш чоралари олиш керак?

Олти ҳафтадан кичик бўлган ҳомиладорликларда қўшимча даво чоралари керак бўлмайди. Ундан катта муддатли ҳомиладорликларда эса онани қон гуруҳи мос келмаслиги (резус-фактор) таъсирининг олдини олиш учун “анти-Д иммуноглобулин” қилиниши керак. Ҳомиладорлик 13 ҳафтадан катта бўлган даврларда маълум миқдорда, 13 ҳафтадан кам бўлган муддатда камроқ миқдорда қилиниши кифоя қилади.  

Ҳомила тушишидан кейин яна ҳомиладор бўлиш учун қанча муддат ўтиши керак?

Тиббий жиҳатдан кичик муддатли ҳомила тушишидан кейин илк ҳайз келиши ўтибоқ ҳомиладор бўлиш имкони мавжуд ва агар ҳомиладорлик юзага келса бунда бирор муаммо бўлмайди. Катта муддатли ҳомила тушишлари ёки абортлардан кейин бир ярим-икки ой ўтгандан кейин ҳомиладор бўлишга ҳаракат қилиш мумкин.

Тиббий абортдан кейин қанча муддат ўтиб жинсий алоқада бўлиш мумкин?

Тиббий абортдан кейин 10-15 кун ўтгандан кейин жинсий алоқа қилиш мумкин. Бироқ қон келиши ҳали ҳам давом этаётгган бўлса инфекция хавфи бўлишини эътиборга олиб, қон келиши давом этиб турган муддатда жинсий алоқадан сақланиш тавсия этилади.

Имплантацион қон кетиши нима?

Сперматазоид ва тухум ҳужайра бирлашиб юзага келган бластоциста босқичидаги эмбрион бачадон ичида умумлашган шаклга келиши (яъни ҳомиладорликнинг илк ҳафтасида) ва бачадон деворига ёпишиши асносида кузатиладиган енгил қонли ажралма келиши (бир неча томчи миқдорида) имлантацион қон кетиши бўлиб буткул нормал ҳолат ҳисобланади.

Баъзиларда бу қон келиши кутилаётган ҳайз келиш кунига тўғри келиб қолади ва ҳайз қони деб гумон қилинади ва бу ҳолатда ҳомиладорлик юзага келганини пайқамай ҳам қолиш мумкин. Бундан вазиятларда УТТ текширувида ҳомила ўлчами охирги ҳайз муддатидан ҳисоблангандан катта кўрсатиши мумкин.

Ҳомиладор аёлда ҳайз келиши мумкинми?

Ҳомиладорлик муддатида ҳайз келмайди. Баъзи беморлар ҳомиладорликдаги қон келишини янглиш ўлароқ ҳайз қони деб ўйлайдилар. Ҳолбуки бу қонли ажаралма келиши ҳомила тушиш хавфи, эрта туғруқ ҳавфи ёки плацентага оид нуқсонлар (паталогия) сабабли бўлиши мумкин. Бундай ҳолатлар она учун ҳам, ҳомила учун ҳам хавфли бўлиши мумкин. Шунинг учун ҳомиладорлик муддатида оз ёки кўп ҳар қандай қон келиши ҳолатида даволовчи гинеколог шифокорингизга мурожаат қилинг!

Ҳомиладорликда қонли ажралма келиши ҳолатларида нималар тавсия этиш мумкин?

Албатта энг аввло ҳар қандай қон келишида мутлақо даволовчи гинеколог шифокорга мурожаат қилиш керак.

Агар қон келиши асносида бирор қуюқ парча ҳам тушса уни целофан пакетга солиб шифокорингизга олиб боринг. Бу тўқима парчасининг микроскоп остида текшириш ҳомила тушиш сабабларини аниқлашга ёрдам беради.

Ҳомила жонсиз бўлганда ҳам қон ва пешобда ўтказилган ҳомиладорлик тестлари ижобий кўрсатади. Ҳатто ҳомила жонсиз бўлганда ҳомиладорлик аломатлари давом этиши ва илк даврларда қон келиш ҳам кузатилмаслиги мумкин.

Фақат беш ярим ҳафтадан кейин қилинган трансвагинал (қин орқали) УТТ текшируви ҳомиланинг жонли экани ҳақида маълумот бериши мумкин. Шу сабабли ҳомиладорликнинг илк паллаларида ўтказиладиган УТТ назоратини эътибордан четда қолдирманг.

Қон келиши одатда ҳомила бачадон ичида ўлиб қолгандан бир неча ҳафта ўтиб кузатилади. Бир марта ҳомила тушиши кузатилган аёлларда бу ҳолатни қайта алоҳида текширишга ҳожат йўқ. Бироқ икки ва ундан кўп ҳомила тушиши кузатилган аёлларда алоҳида айрим таҳлиллар ўтказилиши келгуси ҳомиладорлик ҳақида зарур маълумотлар беради.

Ҳомила тушиши рўй берган беморларда руҳий стресслар ҳам кузатилади. Аммо бунинг учун кўп қайғуриш шарт эмас. Чунки илгари ҳам айтганимздек, кўпинча ҳомила тушиши нотўғри ривожланаётган ёки нуқсонли эмбрион ҳолатларида кузатилади. Ногирон бола туғилишидан кўра тақдирнинг уни ҳомиладорликнинг илк давридаёқ йўқотилишига изн беришида бир ҳикмат бор дея яхшиликка йўйиш ва ортиқча безовта бўлмаслик керак.

Ҳомила тушишидан кейин янги ҳомиладорликка қандай тайёрланиш керак?

Бир марта ҳомила тушиши кузатилган аёлларда маълум бир қон таҳлиллари орқали вазиятни аниқлаштиришга ҳаракат қилинади. Асосийси кейинги ҳомиладорликда албатта тартибли шаклда шифокор назоратида бўлиш ва тавсия этилган дори ёки муолажаларни қўллаш керак бўлади.

Ҳомиладор бўлишдан олдин тана вазни кўрсаткичини меъёрга келтириш, зарарли одатлар (тамаки, ичкиклик) бўлса уларни мутлақо ташлаш, агар сурункали касалликлар бўлса (қандли диабет, астма, юрак касалликлари) уларни назоратга олиб, даволовчи шифокор билан маслаҳатлашгандан кейингина янги ҳомиладорлик ҳақида ҳаракат қилишингиз ниҳоятда аҳамиятлидир.

Гинеколог Нилуфар КАБИЛОВА тайёрлади

Каналга уланинг:👇

https://t.me/joinchat/AAAAAFBvdBiwu4MpzsQ1zQ