ҲАМКОРЛИКДА ҲИКМАТ КЎП...
“BMB-Agroklaster”нинг фермерлар билан шерикчилиги ўз самарасини бермоқда.
Эл орасида “Узумини егин-у боғини суриштирма” деган гап бор. Бу шунчаки, кўчма маъно ташувчи ибора. Лекин, айни олтин кузнинг пишиқчилик паллаларида болу шарбатга, меваю сабзавотга тўла бозор расталарини айлана туриб, бободеҳқонлар етиштирган бир-биридан сарҳил маҳсулотларни кўриб, беихтиёр “Бу ҳосил қайси далада битган экан-а?” деб қолишингиз ҳеч гапмас-да...
Бахмаллик миришкор Эрназар ота етиштираётган мева-сабзавотлар – уларни сифати ва мазасини таътиб кўрганда, кўнглингиздан ана шундай ўйлар кечмоғи тайин. Айни кунларда етиштирилаётган кечки картошкалар ҳам – “қилни қирқ ёрадиган” деҳқоннинг меҳнати ва заҳматига қоришган маҳсулидир. Ҳосил ҳам мўлгина: 25-30 центнердан.
Ишнинг кўзини билган миришкор бугун қўл меҳнатининг ўзи билангина самарали натижага эришмоқ мушкуллигини яхши билади. Шу боис, “Деҳқон бобо” фермер хўжалиги “BMB-Agroklaster” билан яқиндан ҳамкорлик қилиб, далага уруғ қадашдан то уни қопларга жойлашгача бўлган жараёнда, айниқса, экинни парваришлаш, уни дорилаш, умуман агротехник тадбирларида ҳамжиҳатликда ишлаб келмоқда.
– Ҳамкорликда ҳикмат кўп-да, қаранг, бу йилги ҳосилимиз ҳам сифатли ҳам мўл бўлди, – дейди "Дехқон бобо" фермер хўжалиги раҳбари Эрназар Сапаров. – Дастлаб, ғалладан бўшаган майдонга картошканинг “Picasso” уруғини қадагандик. Сўнгра барча агротехник тадбирларини ўз вақтида ва меъёрида олиб бордик. Деҳқончиликда мана шунга катта эътибор қаратиш керак. Чунки экин дегани боладек гап. Унга вақтида эътибор бермасангиз, кутилган натижага эришмайсиз.
Ҳа, чинакам омилкорлик шунақа бўлади. Истараси иссиқ, сўзга чечан, ҳар қандай суҳбатдошни ҳам бир лутфи билан ўзига ром қилиб оладиган кекса боғбон эсини таниганидан буён далаю адирлар мафтуни. Бугун олтмишни оралаб, етмишни қоралаб қолганига қарамай ҳамон тетик, тиниб-тинчимайди. Ичига қирқ йигитнинг шижоатини қамаб олгандай. Нима дейсиз, Яратган ҳам куч-қувватни инсоннинг феълига, нияту мақсадларига қараб бераркан-да...
Маълумот ўрнида айтиш мумкинки, эндиликда “BMB-Agroklaster”нинг фермерлар билан яқин шерикчилиги ўз самарасини бермоқда. Корхона Жиззах вилоятининг Ғаллаорол ва Бахмал туманларида 200 га яқин фермер хўжаликлари билан фючерс шартномаси асосида “Picasso” ва “Fontane” навли кечки картошка маҳсулотини етиштириб келмоқда. Айни паллада ҳосилни йиғиб олиш ишлари қизғин кечмоқда.