ҲАМКОРЛИК РИШТАСИ-КЕЛАЖАК МЕВАСИ

Техника ва технологиялар ривожланиб бориши билан ишлаб чиқариш корхоналарини модернизация қилиш замон талабига айланган. Комбинатимиз ҳам ушбу жараёнда фаол қатнашиши тараққиётнинг янги даврига, янги босқичга муваффақиятли равишда ўтаётганлигидан дарак беради. Яқинда комбинатимиз Оҳангарон туманидаги саноат ҳудудида жойлашган “LI DA METAL TECHNOLOGY” масъулияти чекланган хорижий қўшма корхонаси билан ҳамкорликни йўлга қўйишга эришди. 

Бу корхона пўлат эритиш ва прокат маҳсулотлари ишлаб чиқаришга мослашган. Ушбу хорижий қўшма корхона ўтган 2020 йил сентябрь ойида ўз фаолиятини бошлаган. Корхонанинг мавжуд ишлаб чиқариш қуввати йилига 138 минг тоннани ташкил этади. Алоҳида агрегат ва қисмлари модернизация қилинса, унинг қувватини 240 минг тоннагача кўтариш мумкин.  

Корхонада пўлат эритиш ва прокат цехлари, ёрдамчи таркибий бўлинмалардан – темир парчаларини қайта ишлаш эстакадаси, юқори кучланишга эга бўлган нимстанция, кислород-компрессор цехи, ишлаб чиқариш жараёни учун сув тайёрлаш участкаси ва лаборатория мавжуд.   

Пўлат эритиш цехи 30 тонна сиғимга эга бўлган “ДСП-30” печи, “СК-30” печь-ковши, 120×120 мм. икки кесимли, асосий радиуси 6 метр бўлган узлуксиз пўлат қуйиш машинасидан иборат. Прокат цехида эса қиздирув печи, А400-А500 чидамлилиги даражасига эга бўлган “П12-П25” навли арматура прокати ишлаб чиқаришга мўлжалланган прокат стани, маҳсулотларни совутиш ускуналари ҳамда прокат маҳсулотларини кесувчи махсус қайчи, тайёр маҳсулотлар омбори мавжуд. 

Комбинат бошқарувининг жорий йилдаги № 667 буйруғи билан мутахассисларимиз бу корхонадаги ишлаб чиқариш ва ташкилий жараёнлардаги муаммоларни бартараф этиш билан шуғулланмоқдалар. Мутахассисларимиз тез орада “Ўзметкомбинат” АЖ ихтиёрига ўтадиган бу корхонанинг ишчи-ходимларини замонавий илғор технологиялар асосида мукаммал ишлайдиган соҳа ходимлари қилиб қайта тайёрлайди ҳамда комбинатимиз уни хомашё билан таъминлашни ўз зиммасига олади.