Қабристонда таом пишириб ейиш жоизми?

Cавол: Қабристонда таом пишириб ейиш мункинми?

Бизда маҳалла йиғилиб эрта баҳор ҳашар қилиб, жонлиқ сўйиб, таом пишириб ейилади. Шу жоизми?

Жавоб: Қабристонга борган киши ўша жойда ётганлар ҳолидан ва ўзи ҳам бир кун келиб улар қаторига қўшилишидан ибратланиши лозим. Уларнинг ҳақларига дуойи хайрлар қилиши, истиғфор айтиши мақсадга мувофиқдир. Қабристон еб-ичадиган, ўйин-кулги қиладиган жойэмас. Ҳатто у ерда баланд овозда гапиришдан ҳам қайтарилган. Аммо фавқулодда қабристонда бирор нарса ейиш ёки ичиш зарурати туғилса, бу жоиздир. Аммо одамлар тўпланиб, жамоа бўлиб, зиёфат уюштиришлар мумкин эмас. Бурайда розийаллоҳу анҳудан ривоят қилинган ҳадисда Пайғамбаримиз алайҳиссалом: “Албатта, мен сизларни қабрларни зиёрат қилишдан қайтарган эдим. Энди зиёрат қилаверинглар. Зеро, у сизларга охиратни эслатади!” Яна бир ривоятда: “Ботил гап гапирманглар!”, деганлар (Имом Муслим ва Имом Термизий

ривояти).

Муҳаммад Ходимий Ҳанафий “Бариқатул Маҳмудия” китобида айтади:

“Қабрлар олдида еб–ичиш макруҳ ҳисобланади. Шунингдек, кулиш ҳам макруҳ. Чунки бу каби жойлар ибратланиш, охиратни эслаш ўрнидир. (Қабристонда) ейиш ва кулиш эса охиратни эслашга зид келади”. Валлоҳу аълам.