ҚОРАКЎЛЛИК АЁЛЛАР ҲАМ ЭЪТИРОФГА МУНОСИБ
O’zLiDePнинг “Ишбилармон аёл” кўрик –танлови иштирокчилари орасида йилдан йилга ғолибликни қўлга киритиб, ушбу танловнинг маҳаллалар,туман (шаҳар)босқичларида ғолиблик ва пешқадамликка эришиб келаётган қоракўллик моҳир тадбиркор, ҳунарманд ва фермер хотин –қизлар кўпчиликни ташкил этади. “Ишбилармон аёл-2024” кўрик-танловининг жорий йилги туман босқичида ҳам айнан шу жиҳат кўзга яққол ташланди.
Маданият бўлими биносида “Бир бўлсак- ягона халқмиз,бирлашсак Ватанмиз!” шиори остида ўтказилган ўзига хос беллашув аввалида O’zLiDeP туман Кенгаши раисининг биринчи ўринбосари –аппарат раҳбари Марҳабо Саидова сўз олиб, соҳа ривожининг, хусусан аёллар тадбиркорлигининг туманни ижтимоий-иқтисодий ривожлантириш, аҳоли бандлигини таъминлаш ва турмуш фаровонлигини ошириш борасидаги аҳамияти юзасидан ўз фикр-мулоҳазаларини баён этди. Иштирокчиларни танлов шартлари билан бирма –бир таништириб чиқди.
Шундан сўнг ҳакамлар ҳайъати аъзоларидан иборат ишчи гуруҳи қоракўллик аёллар томонидан тайёрлаб келинган, тадбиркорликнинг турли йўналишларини ўз ичига қамраб олган буюм ва махсулотлар кўргазмаси билан яқиндан танишдилар. Уларнинг диққат –эътиборини энг аввало туманнинг “Вахм” МФЙ да яшовчи Зулхумор Рўзиеванинг кўрик-танлов учун тайёрлаб келган пишириқлари жалб этди. Устоз-шогирд анъанасининг содиқ давомчиси бўлган З.Рўзиеванинг ўз маҳалладошларидан 10 нафар аёлни доимий иш билан таъминлагани ҳам ҳайъат аъзолари эътиборидан четда қолгани йўқ.
Ҳудуддаги ногиронлиги бор аёллардан бири Жигачи МФЙ да яшовчи Азиза Абдузоирова бўлиб, мана 5 йилдирки, у ўз севган касби –тикувчилик билан машғул. 4 нафар тиришқоқ шогирди билан бирга хотин-қизларнинг бежирим либосларини тикиш билан чекланиб қолмай, уларни турли безаклар билан янада кўркам қилиш устида иш олиб бормоқда.
Турли тақинчоқлар, зираклар, сирғалар ясаб, аёлларнинг сумкачаларини тайёрлаб келаётган “Эски қалъа” МФЙ даги хонадонларнинг бирида истиқомат қилувчи, эндигина 18 баҳорни қаршилаган, ёш бўлишига қарамай ҳунармандчиликнинг ушбу йўналиши “ҳадисини олган” Зиёда Ахмедованинг ўз кундалик меҳнати билан оиласи даромадига даромад қўшиб келаётгани кўпчилик тенгдошларига ибрат ва намуна бўлишга арзигулик.
Тижорат банкидан олинган кредит маблағлари эвазига 20 та тикув машинасини сотиб олиб, шунча нафар қизни барқарор иш ўрни билан таъминлаб келаётган якка тартибдаги тадбиркор аёл- “Қозон” МФЙ лик Дилноза Жўраева ҳамда Зайнаб Ахмедова, Арна МФЙда тўқувчилик билан шуғулланиб келаётган Гулнора Олимова, бир неча йилдан бери қизлар қулоқчини тайёрлаб, “Мирзакала” МФЙ даги 15 нафар хотин-қизлар бандлигини таъминлашга эришган Зулфизар Тўраева ва бошқа бир қатор кўрик-танлов иштирокчилари меҳнатига ҳакамлар ҳайъати аъзолари томонидан тегишли Низом талабларидан келиб чиққан ҳолда холисона баҳо берилиб, моҳир тадбиркор, ҳунарманд аёллар ташкилотчиларнинг тегишли даражадаги диплом ва эсдалик совғалари билан тақдирландилар.
