“Ўзбекнефтгаз”: Фарғоналик тадбиркорнинг маҳсулоти Муборак газни қайта ишлаш заводида синовдан ўтказилмоқда

Ўзбекистон Республикаси Президентининг 2019 йил 24 августдаги “Давлат ва хўжалик бошқаруви ҳамда маҳаллий ижроия ҳокимияти органларининг ишлаб чиқаришни маҳаллийлаштириш ва саноат тармоқларида кооперация алоқаларини жадаллаштиришнинг янги тизимини жорий этиш бўйича масъулиятини янада ошириш тўғрисида”ги қарори ижросини таъминлаш мақсадида импорт қилинаётган маҳсулотлар ҳажмини қисқартириш ҳисобига валюта маблағларини тежаш режалаштирилган. 

Ушбу ишларни амалга ошириш учун “Ўзбекнефтгаз” АЖ Бошқарув раиси томонидан импорт ўрнини босувчи маҳсулотлар ишлаб чиқарувчи маҳаллий корхоналар билан мустаҳкам алоқалар ўрнатиш бўйича ҳужжат имзоланди.

Шунга асосан, жорий йилнинг апрель-май ойларида Муборак газни қайта ишлаш заводида табиий газни олтингугурт бирикмаларидан тозалаш қурилмаларида “SHTURVAL” МЧЖ (Фарғона вилояти) томонидан ишлаб чиқарилаётган активлашган кўмир маҳсулоти синовдан ўтказилади.

Синов ишлари ижобий натижани кўрсатса, фарғоналик тадбиркор томонидан таклиф этилаётган активлашган кўмир кимёвий реагентини ишлаб чиқариш жараёнида тадбиқ этилади. 

Бунинг натижасида йиллик 100-120 тонна миқдоридаги активлашган кўмирни четдан олиб келиш қисқаради. Шунингдек, валютани тежаб қолишга ва маҳаллий кимёвий реагент маҳсулотлар ишлаб чиқарувчи корхоналарни қўллаб-қувватлашга эришилади.

Маълумот учун: Активлашган кўмирнинг асосий вазифаси газни қайта ишлаш жараёнида Метилдиэтаноламин кимёвий реагентини таркибидаги механик бирикмаларни тозлашдан иборатдир.

“Ўзбекнефтгаз” АЖ Матбуот хизмати