Ўзбекистонга хориждан олиб кирилган дарахт кўчатларида зараркунандалар аниқланди
Италиядан республикамизга Тошкент шаҳар “Арк булоқ” ташқи иқтисодий фаолият божхона пости орқали олиб кирилган 150 дона манзарали дарахт кўчатлари ўсимликлар карантини давлат инспекторлари томонидан бирламчи
карантин кўригидан ўтказилди. Кўрик жараёнида кўчатларда карантин объекти
мавжудлиги бўйича шубҳа туғилди ва ушбу кўчатлардан олинган намуналар белгиланган тартибда экспертиза учун “Ўздавкарантин” инспекциясининг марказий карантин лабораториясига юборилди. Лаборатория экспертлари ўрганишлари натижасида ушбу манзарали кўчатларда карантин объекти - ситрус оққаноти (Dialeurodes citri ash) зараркунандалари аниқланди ва ушбу зараркунандалар фумигация (зарарсизлантириш) йўли билан йўқ қилинди.
Бундан ташқари, Покистон давлатидан Лаҳор-Тошкент HY-462 авиарейси орқали фуқаро С.Ф. томонидан келтирилган 25 кг манго мевалари “Тошкент Аэро” ўсимликлар карантини чегара маскани инспекторлари томонидан текширилганда ушбу меваларнинг карантин рухсатномаси ва фитосанитария сертификати йўқлиги аниқланди. Ушбу маҳсулотлар белгиланган тартибда кесиш йўли билан йўқ қилинди.
Эслатиб ўтамиз, республикамизнинг амалдаги қонунчилигига мувофиқ, мамлакатимизга олиб кирилаётган карантин остидаги маҳсулотлар, шу жумладан, мева-сабзавотлар ва бошқа кўринишдаги ўсимликлар зарарли организмлардан ҳоли бўлиши ҳамда карантин рухсатномаси ва фитосанитария
сертификатларига эга бўлиши шарт.