Ўзбекистон шоличилигидаги тадқиқотлар Вьетнам экспертлари томонидан ўрганилди

Қишлоқ хўжалиги вазирлиги ҳамда Қишлоқ ҳўжалиги ваозиқ-овқат таъминоти илмий ишлаб чиқариш маркази раҳбарияти Хоразм вилоятида Вьетнам қишлоқ хўжалиги  ва қишлоқларни ривожлантириш вазирлиги  мутахассислари билан учрашди.

Учрашувда Шоличилик илмий-тадқиқот институтининг Хоразм филиалидаги шоли экини ҳолати ва Жанубий Кореянинг KOPIA маркази билан ҳамкорликда бажарилаётган ишлар, жумладан, шоли кўчатини механизация ёрдамида экиш усули бўйича олиб борилган дала тажрибалари  ҳақида маълумот берилди.

 Тадбирда мамлакатимизда олиб борилаётган илмий-тадқиқот ишларига хориж
тажрибаси кенг қўлланилаётгани айтиб ўтилди. Бундан ташқари Ўзбекистонда
Вьетнам шоличилик тажрибасини қўллаш, унинг шоли навлари, уруғчилиги ва
етиштириш агротехнологиялари тўғрисида фикрлар алмашилди.

 Шуни алоҳида таъкидлаш керакки, Шоличилик илмий-тадқиқот институтининг Хоразм филиали бугунги  кунда Жанубий Кореянинг “National institute of Crop science” илмий-тадқиқот институти, Қишлоқ хўжалигини ривожлантириш халқаро агентлигининг Ўзбекистондаги “KOPIA” маркази  ҳамда “TYM” (Tong Yang Moolsang) компанияси билан ҳамкорликда бир неча лойиҳаларни амалга оширмоқда.

Учрашув якунида келгусида Ўзбекистонда шўрланган ерларга мос бўлган шоли селекцияси, шу тупроқларда шолини етиштириш агротехникаси, бирламчи уруғчилик тизимини ривожлантиришга қаратилган Шоличилик илмий-тадқиқот институти ҳамда Вьетнамнинг “Меконг” шоличилик илмий-тадқиқот институти ўртасида ҳамкорликка оид шартнома имзоланишига келишиб олинди.