Ўзбекистон Республикасининг «Аудиторлик фаолияти тўғрисида»ги Қонуни қабул қилинди
MoliyaPressОлий Мажлис Қонунчилик палатаси томонидан 2020 йил 10 ноябрда қабул қилинган, Олий Мажлис Сенати томонидан 2021 йил 5 февралда маъқулланган Ўзбекистон Республикасининг «Аудиторлик фаолияти тўғрисида»ги Қонуни 2021 йил 25 февраль куни Ўзбекистон Республикаси Президенти томонидан имзоланди.
Мазкур Қонун, замонавий талабларга жавоб берадиган аудиторлик хизматини ташкил этишга, аудиторлик касбининг нуфузини ва улар ишининг сифатини оширишга қаратилган бўлиб пировард натижада жамият манфаатларини қондиришга ва инвесторлар ҳимоясини кучайтиришга йўналтирилган.
Қонунда халқаро принциплар ва илғор хорижий тажрибалардан келиб чиқиб аудиторлик фаолиятини тартибга солишнинг самарали ташкилий-ҳуқуқий механизмини яратиш назарда тутилган. Энг муҳими ушбу ҳужжат аудиторлик фаолиятини тартибга солувчи ягона меъёрий ҳужжат кўринишида тўғридан-тўғри амал қиладиган Қонун сифатида қабул қилинди.
Қонун қуйидаги йўналишлардаги муҳим масалаларни амалга оширишни назарда тутади, жумладан:
- аудиторлик фаолиятини фақат Аудитнинг халқаро стандартлари асосида амалга ошириш;
- аудиторлик фаолиятини лицензияланадиган фаолият турлари таркибидан чиқариш;
- мажбурий аудиторлик текширувидан ўтиши зарур бўлган ташкилотлар рўйхатини шакллантириш;
- аудиторлар малакасини оширишнинг самарали тизимини ташкил қилиш;
- аудиторлар республика жамоат бирлашмаларининг халқаро аудит стандартларини қўллаш соҳасидаги фаоллигини ошириш;
- манфаатлар тўқнашувининг олдини олишга йўналтирилган аудиторлар профессионал фаолиятининг аҳлоқ қоидаларини жорий этиш.
Юқоридагилар билан бир қаторда, махсус ваколатли давлат органи сифатида Молия вазирлиги аудиторларнинг республика жамоат бирлашмалари билан биргаликда, молия-хўжалик фаолиятига аралашмаган ҳолда, аудиторлик ташкилотлари иши сифатини ташқи назоратдан ўтказиш.
Шунингдек, аудиторлик ташкилотлари устав капиталининг миқдорига бўлган талаб бекор қилинди, бироқ аудиторлик ташкилотидаги аудиторларнинг энг кам сони камида тўрт нафар бўлиши белгиланди, ҳамда битта хўжалик юритувчи субъектда аудиторлик текширувини кетма-кет етти йилгача ўтказишга рухсат берилди ва бошқалар.
Молия вазирлиги
Ахборот хизмати