“ЎЗКОМНАЗОРАТ” нақдсиз шаклдаги тўловлар ҳажмининг ошгани туфайли ахборот соҳасида фирибгарларнинг фаоллашиши мумкинлиги ҳақида огоҳлантиради

Республика махсус комиссияси қарорига кўра коронавирус тарқалишини олдини олиш максадида пенсия ва ижтимоий нафақаларни тўлаш тўлиқ пластик картага тушириб бериш йўли билан амалга оширилиши маълум қилинди. Биринчи босқичда май ойидан бошлаб Тошкент ва Нукус шаҳарлари ҳамда вилоятлар марказларида пенсияни пластик картага тўлиқ тушириб бериш бошланади. Кейинги ойларда ушбу тартиб босқичма-босқич бошқа ҳудудларга ҳам татбиқ этилади. Пенсия жамғармаси маълумоти бўйича ҳозирги кунда пенсия ва нафақа олаётган фуқаролар тахминан 3,7 миллион нафарни ташкил қилади.

Карталарнинг банклар томонидан очилиши ва пенсия олувчи фуқароларга санитария қоида ва меъёрларига риоя қилинган ҳолда етказиб берилишини алоҳида қайд этиш лозим.

Аҳолининг ушбу қатлами пластик карталардан фойдаланиш ҳақида етарлича ахборотга эга бўлмаганлиги туфайли маблағлари банк карталарида сақланиши бошланганидан кейин тармоқларда жиноятчиларнинг фирибгарлик схемаларига алданиб қолиши мумкин.

Хорижий давлатларда фирибгарларнинг банк номидан қўнғироқ қилиб, кам таъминланган оилалар учун хайрия акцияси ўтказилаётгани ҳақидаги ёлғон ахборот билан фуқаролар ва уларнинг оила аъзолари ҳақидаги маълумотларни ўзлаштиришга уриниши, карта рақами ва унинг амал қилиш муддати ҳақида сўраши, SMS-хабарнома орқали келган сирли кодни билиб олиб кейинчалик уларнинг электрон ҳисоб рақамидаги пулларни ўғирлаш ҳолатлари учраши мумкинлиги айтилмоқда.

Аввал ижтимоий тармоқларда “Ўзбекистонда ҳар бир фуқарога ҳафтасига 300 минг сўмдан берилиши” ҳақидаги хабарлар “фейк” хабарларга қарши курашиш мақсадида ташкил қилинган Antifake расмий канали томонидан ёлғон ва ҳақиқатга тўғри келмаслиги маълум қилинганди.

Аҳолининг электрон маблағларни бошқаришни у қадар яхши ўзлаштирмаган қатлами яъни пенсионерлар ва ногиронларда банк пластик карталарининг сонининг кўпайиши оқибатида жиноятчиларнинг турли йўллар билан фирибгарлик қилиб банк пластик карталарининг рақамларини билиб олиши, ўзини ижтимоий хизматлар номидан сўров юбориб, карантин вақтида картага махсус ижтимоий ёрдам пули тушириб беришни ваъда қилиб одамларнинг пулларини ўзлаштириши мумкин.

“Ўзкомназорат” давлат инспекцияси фуқаролардан фирибгарларнинг бу каби “фейк” SMS хабарномаларига алданмасликни, шахсий маълумотларни ва муҳим ахборотларни ижтимоий тармоқларда тарқатмаслик, бегона одамларга бермасликни, кекса ёшдаги яқинларни ҳам бу каби хавфли ҳаракатлар ҳақида огоҳлантиришни, короновирус пандемиясига қарши ҳукумат томонидан амалга оширилаётган чора-тадбирлар ҳақидаги хабар ҳамда янгиликларни расмий ёки ишончли манбалардан олишни сўрайди.
____

“O‘ZKOMNAZORAT” naqdsiz shakldagi to‘lovlar hajmining oshgani tufayli axborot sohasida firibgarlarning faollashishi mumkinligi haqida ogohlantiradi

Respublika maxsus komissiyasi qaroriga ko‘ra koronavirus tarqalishini oldini olish maksadida pensiya va ijtimoiy nafaqalarni to‘lash to‘liq plastik kartaga tushirib berish yo‘li bilan amalga oshirilishi maʼlum qilindi. Birinchi bosqichda may oyidan boshlab Toshkent va Nukus shaharlari hamda viloyatlar markazlarida pensiyani plastik kartaga to‘liq tushirib berish boshlanadi. Keyingi oylarda ushbu tartib bosqichma-bosqich boshqa hududlarga ham tatbiq etiladi. Pensiya jamg‘armasi maʼlumoti bo‘yicha hozirgi kunda pensiya va nafaqa olayotgan fuqarolar taxminan 3,7 million nafarni tashkil qiladi.

Kartalarning banklar tomonidan ochilishi va pensiya oluvchi fuqarolarga sanitariya qoida va meʼyorlariga rioya qilingan holda yetkazib berilishini alohida qayd etish lozim.

Aholining ushbu qatlami plastik kartalardan foydalanish haqida yetarlicha axborotga ega bo‘lmaganligi tufayli mablag‘lari bank kartalarida saqlanishi boshlanganidan keyin tarmoqlarda jinoyatchilarning firibgarlik sxemalariga aldanib qolishi mumkin.

Xorijiy davlatlarda firibgarlarning bank nomidan qo‘ng‘iroq qilib, kam taʼminlangan oilalar uchun xayriya aksiyasi o‘tkazilayotgani haqidagi yolg‘on axborot bilan fuqarolar va ularning oila aʼzolari haqidagi maʼlumotlarni o‘zlashtirishga urinishi, karta raqami va uning amal qilish muddati haqida so‘rashi, SMS-xabarnoma orqali kelgan sirli kodni bilib olib keyinchalik ularning elektron hisob raqamidagi pullarni o‘g‘irlash holatlari uchrashi mumkinligi aytilmoqda.

Avval ijtimoiy tarmoqlarda “O‘zbekistonda har bir fuqaroga haftasiga 300 ming so‘mdan berilishi” haqidagi xabarlar “feyk” xabarlarga qarshi kurashish maqsadida tashkil qilingan Antifake rasmiy kanali tomonidan yolg‘on va haqiqatga to‘g‘ri kelmasligi maʼlum qilingandi.

Aholining elektron mablag‘larni boshqarishni u qadar yaxshi o‘zlashtirmagan qatlami yaʼni pensionerlar va nogironlarda bank plastik kartalarining sonining ko‘payishi oqibatida jinoyatchilarning turli yo‘llar bilan firibgarlik qilib bank plastik kartalarining raqamlarini bilib olishi, o‘zini ijtimoiy xizmatlar nomidan so‘rov yuborib, karantin vaqtida kartaga maxsus ijtimoiy yordam puli tushirib berishni vaʼda qilib odamlarning pullarini o‘zlashtirishi mumkin.

“O‘zkomnazorat” davlat inspeksiyasi fuqarolardan firibgarlarning bu kabi “feyk” SMS xabarnomalariga aldanmaslikni, shaxsiy maʼlumotlarni va muhim axborotlarni ijtimoiy tarmoqlarda tarqatmaslik, begona odamlarga bermaslikni, keksa yoshdagi yaqinlarni ham bu kabi xavfli harakatlar haqida ogohlantirishni, koronovirus pandemiyasiga qarshi hukumat tomonidan amalga oshirilayotgan chora-tadbirlar haqidagi xabar hamda yangiliklarni rasmiy yoki ishonchli manbalardan olishni so‘raydi.