ЎЗКОМНАЗОРАТ: Фирибгарлар Telegram’да таниқли брендлар номидан очилган “fake” каналлар воситасида одамларни алдамоқда

Ўзбекистонда кўпчилик Telegram мессенжери орқали мулоқот қилади ва у ердаги каналлардан ахборот олади, Интернет дўконлардан турли буюмлар буюртма қилади, тўловларни амалга ошириш ҳам ушбу мессенжер воситасида амалга ошириб келинмоқда.

Коронавирус пандемияси сабаб “ўзни яккалаш”, уйда ўтириш, карантин тартибига риоя қилиш талаб қилинаётган бир шароитда Телеграмда турли гуруҳлар очиб, у ерда одамларни алдаб, электрон маблағлари, телефон рақамлари ҳақида маълумотларни тўплаётган фирибгарлар кўпайган.

Жиноятчилар гуруҳ ташкил қилиб фойдаланувчилардан у ерга 50 одамни қўшганга 500 минг, 100 тага 800 минг, 200 одамга 3 миллион, 300 одамга 4 миллион, 400 одамга 5 миллион, 500 одамга 6 миллион, 600 одамга 7 миллион, 700 одамга эса 8 миллион сўм ваъда қилмоқда. Одамларни қизиқтириш мақсадида гуруҳга фойдаланувчи қўшган “ўз одамлари билан суҳбат скриншотлари”ни ташлаб бу бот орқали текширилгани ва одам қўшганларга ваъда қилинган пул ўтказиб берилгани ҳақида фотосурат ёки овозли ёзувлар ҳам юклаб бормоқда. Гуруҳга ташланган ушбу аудио ва фотоматериаллар қалбакилаштирилган. Бу каби гуруҳларни тузаётган “хакерлар” кўпинча тижорат банклари, оммавий кўрсатув ёхуд электрон пул ўтказмалари билан шуғулланувчи компаниялар логотиплари ортига яширинган ҳолда одамларни алдамоқда. Масалан, “Марказий студия”, “Ипак йўли банк”, “Click”, “Беғубор” каби гуруҳлар шулар жумласидан.

Аслида улар юборган скриншотлар фирибгарлар томонидан қалбакилаштирилган, овозли ёзувлар ҳам “фейк”. Карантин даврида содда йўл билан осон пул топаман деб ушбу ёлғон ҳаракатларга алданиб қолманг.

“Ўзкомназорат” давлат инспекцияси фуқаролардан бу каби “fake” ёлғон хабарларга ишонмасликни, карта рақамини, телефон рақамини, ўзгаларнинг контактларини мазкур гуруҳларга юбормасликни сўрайди. Шубҳали рақамлар, гуруҳлар, каналлар ҳақида маълумотга эга бўлсангиз, алданиб қолган бўлсанги ҳуқуқ-тартибот идораларига мурожаат қилинг. Коронавирус пандемияси, касалликка қарши кураш борасида Ўзбекистонда амалга оширилаётган чора-тадбирлар ҳақида расмий манбалар ва ишончли оммавий ахборот воситалари орқали танишиб боринг.
____

O‘ZKOMNAZORAT: Firibgarlar Telegram’da taniqli brendlar nomidan ochilgan “fake” kanallar vositasida odamlarni aldamoqda

O‘zbekistonda ko‘pchilik Telegram messenjeri orqali muloqot qiladi va u yerdagi kanallardan axborot oladi, Internet do‘konlardan turli buyumlar buyurtma qiladi, to‘lovlarni amalga oshirish ham ushbu messenjer vositasida amalga oshirib kelinmoqda.

Koronavirus pandemiyasi sabab “o‘zni yakkalash”, uyda o‘tirish, karantin tartibiga rioya qilish talab qilinayotgan bir sharoitda Telegram’da turli guruhlar ochib, u yerda odamlarni aldab, elektron mablag‘lari, telefon raqamlari haqida ma’lumotlarni to‘playotgan firibgarlar ko‘paygan.

Jinoyatchilar guruh tashkil qilib foydalanuvchilardan u yerga 50 odamni qo‘shganga 500 ming, 100 taga 800 ming, 200 odamga 3 million, 300 odamga 4 million, 400 odamga 5 million, 500 odamga 6 million, 600 odamga 7 million, 700 odamga esa 8 million so‘m va’da qilmoqda. Odamlarni qiziqtirish maqsadida guruhga foydalanuvchi qo‘shgan “o‘z odamlari bilan suhbat skrinshotlari”ni tashlab bu bot orqali tekshirilgani va odam qo‘shganlarga va’da qilingan pul o‘tkazib berilgani haqida fotosurat yoki ovozli yozuvlar ham yuklab bormoqda. Guruhga tashlangan ushbu audio va fotomateriallar qalbakilashtirilgan.  Bu kabi guruhlarni tuzayotgan “xakerlar” ko‘pincha tijorat banklari, ommaviy ko‘rsatuv yoxud elektron pul o‘tkazmalari bilan shug‘ullanuvchi kompaniyalar logotiplari ortiga yashiringan holda odamlarni aldamoqda. Masalan, “Markaziy studiya”, “Ipak yo‘li bank”, “Click”, “Beg‘ubor” kabi guruhlar shular jumlasidan.

Aslida ular yuborgan skrinshotlar firibgarlar tomonidan qalbakilashtirilgan, ovozli yozuvlar ham “fake”. Karantin davrida sodda yo‘l bilan oson pul topaman deb ushbu yolg‘on harakatlarga aldanib qolmang.

“O‘zkomnazorat” davlat inspeksiyasi fuqarolardan bu kabi “fake” yolg‘on xabarlarga ishonmaslikni, karta raqamini, telefon raqamini, o‘zgalarning kontaktlarini mazkur guruhlarga yubormaslikni so‘raydi. Shubhali raqamlar, guruhlar, kanallar haqida ma’lumotga ega bo‘lsangiz, aldanib qolgan bo‘lsangi huquq-tartibot idoralariga murojaat qiling. Koronavirus pandemiyasi, kasallikka qarshi kurash borasida O‘zbekistonda amalga oshirilayotgan chora-tadbirlar haqida rasmiy manbalar va ishonchli ommaviy axborot vositalari orqali tanishib boring.