Ўзбекистон ва Покистон экстремизмга қарши биргаликда курашади
Ўзбекистон ва Покистон қатор соҳалар, хусусан, экстремизмга қарши кураш ва савдони кенгайтириш бўйича келишувларга эришди. Бу ҳақда икки мамлакат ҳукуматлари маълум қилди, деб ёзмоқда http://central.asia-news.com/ сайти.
Иккала мамлакат ҳам экстремизмга қарши курашади, деган Покистон президенти Мамнун Ҳусайн 2016 йил 23 декабрда Ўзбекистон Бош вазири ўринбосари Улуғбек Розукулов раҳбарлигидаги делегацияни Исломободда қабул қилар экан.
Ўзбекистон Бош вазири ўринбосари Улуғбек Розукулов ва Покистон Бош вазири Наваз Шариф
Шу билан бирга, хавфсизлик соҳасида эришилган келишувларнинг тафсилоти ошкор қилинмаган. Бундан ташқари, икки давлат ҳам савдо алоқаларини кенгайтиришдан манфаатдордир. 23 декабрда Розукуловнинг Ҳусайн билан бўлиб ўтган музокараларида Покистон давлат раҳбари, мамлакатининг Ўзбекистон билан энергетика, инсон ресурслари ва иқтисодиётнинг бошқа соҳаларида ҳамкорлик қилишдан манфаатдор эканини билдирган эди.
Мазкур учрашувдан бир кун аввал, Покистон савдо вазири Хуррам Дастгир Хон Ўзбекистон билан савдо алоқалари «улкан салоҳият»га эга эканини айтган эди.
Унинг сўзларига кўра, «Покистон ва Ўзбекистон қишлоқ хўжалиги, фармацевтика, тўқимачилик саноати ва спорт буюмлари ишлаб чиқариш соҳаларига сармоя киритиш имкониятларини кўриб чиқишлари лозим».
2015-2016 йилларда ушбу давлатлар ўртасидаги ўзаро савдо ҳажми 3,9 млн АҚШ долларини ташкил этган, бу 2014-15 йиллардаги кўрсаткичдан 900 минг долларга кўп бўлган.
«Бу эса, минтақадаги йирик давлатлар учун арзимаган рақамлардир. Мисол учун, 2015 йилда Ўзбекистон ва Афғонистон ўртасидаги савдо айланмаси 445,5 млн долларга етган. Шу боисдан ҳам, ҳукуматлар мавжуд муаммоларни ҳал этиш ва тадбиркорларга ёрдам беришни уринмоқда», – дейди тошкентлик эксперт Умид Асатуллаев.
Шу билан бирга, Ўзбекистоннинг муҳандислик ва кимё саноати маҳсулотларини экспорт қилиш билан шуғулланувчи «Uzsanoatexport» корпорацияси Покистоннинг «KASB» гуруҳи билан Ўзбекистон-Покистон савдо уйини ташкил этиш бўйича келишувни имзолаган, деб хабар қилади The Express Tribune нашри.
Бу ташкилот Ўзбекистонда ишлаб чиқарилган пахта териш машиналари ва комбайнлар каби қишлоқ хўжалиги техникаларини Покистонга экспорт қилишни қулайлаштиради.