Usa

Биылғы жылдың қаңтар айының 26- нан мамырдың 22- не дейін АҚШ- тың Калифорния штатында,яғни Сан- Франциско қаласының маңындағы Олбани елді мекенінде тұруға мүмкіндік туған еді.

Калифорния штаты осы елдің бай және табиғаты өмір сүруге қолайлы аймақтарының бірі екен.Жыл бойына температура +14,+16 градус,жазда +20,+25 градусқа дейін барады.Өсімдіктер жыл бойына жасыл желек жамылып ,гүлдеп тұрады.Жылдың қай мезгілі болып жатқаны түсініксіз.

Ауа райының жылы болуы себепті көшеде үйсіз- күйсіз жүрген ( бомждарды) адамдарды көп кездестіруге болады.Оларды көргенде еріксіз көңілің құлазиды.

АҚШ дүние жүзіндегі алпауыт мемлекет екендігінде сөз жоқ.Өнеркәсібі де,ауылшаруашылығы да жақсы дамыған.Еңбек ақылары,зейнеткерлердің зейнет ақысы біздің елмен салыстырғанда жоғары.Товардың құны олар үшін қымбат болмауы мүмкін,ал біздер үшін теңгеге шаққанда өте қымбат.Мысалы: бір бөлке нан 3 доллар,теңгеге айналдырып көріңіз,сонда өз еліміздегі нан бағасымен салыстырып,тәубеге келесіз.

Көп ұлтты мемлекет,әрі беріден соң қай ұлттың өкілі екенін айыра да алмай қаласың.Бір сөзбен айтқанда американдықтар.Әсіресе қытайлар көп.Адамдардың мәдениеті жоғары дәрежеде екені көрініп тұрады.Кейбіреулері танысын ,танымасын,күліп амандасып өтеді. " Рахмет" деген сөз көп айтылады.Бір мысалы: қоғамдық көлік автобустан түсіп бара жатып,жүргізушіге " рахметін" айтып түседі.Жыл бойына жылы температура болғандықтан жеміс- жидектің, көкөністің түрлері,қарбыз ,қауын,т.б.дүкен сөрелерінде толып тұрады.Қай елдің болмасын жетістіктерімен қатар кем тұстары да болады ғой.Адамдар өте қарапайым киінеді.Мектеп оқушыларында арнайы біздің елдегідей мектеп формасы деген жоқ.Мектепке сөмкені толтырып оқу құралдарын апармайды.Бұның өзі бір бөлек әңгіме.

Тынық мұхитының жағалауы,жасыл желек,мұхиттан самал жел соғып тұрады,сондықтан да болар ,ауасы таза.

Дегенмен мен үшін өз туған жеріңе жететін жер жоқ.Қазіргі таңда мұхиттың арғы бетіне қоныс аударып,өмір кешіп жатқан қазақтар да баршылық екен.

Менің ұққаным : қай жерде де жаман адам болуы мүмкін,ал жаман ұлт жоқ.Жер шарының қай жерінде болмасын,адамдар ұлтына,дініне,нәсіліне қарамай бақытты,бейбіт заманда өмір сүрсе екен деген тілегім бар.