Трамп Пентагон раҳбари билан маслаҳатлашмай қўйгани маълум қилинди
Kun.uz
АҚШ президенти Дональд Трамп Пентагон раҳбари Жеймс Мэттиснинг фикрига камроқ қулоқ солмоқда. Бу ҳақда Оқ уйдаги юқори лавозимли мансабдорга иқтибос келтирган ҳолда NBC News маълум қилди.
Таъкидланишича, Трамп ва мудофаа вазири анчадан бери юзма-юз учрашув ўтказишмай қўйишган. АҚШ президенти аввал юқори баҳо берган Мэттиснинг маслаҳатларига қулоқ тутмай қўйган. Трампнинг фикрича, Мэттис унга нисбатан ўзини устун қўяди ва унинг ташқи сиёсий ташаббуслари амалга ошишини атайлаб тормозлайди.
Таъкидланишича, Трамп охирги вақт ўзига ҳамда АҚШ давлат котиби Майк Помпео ва миллий хавфсизлик бўйича маслаҳатчиси Жон Болтонга кўпроқ ишонмоқда.
Жумладан, Мэттис Трампнинг Эрон ядровий келишувидан чиқиш қарорини ўз ҳамкасбларининг биридан билган. Шунингдек, Мэттис АҚШ ва Жанубий Кореянинг биргаликдаги машғулотларини тўхтатиш қароридан ҳам кейин хабар топган.
Шу билан бирга NBC манбаларининг айтишича, Трамп Мэттисга нисбатан ёмонроқ муносабат билдираётганининг ҳеч қандай ташқи аломатлари сезилмайди. Мэттис Трампнинг яқин атрофига бошқа кирмай қўйган, бироқ унга қарши очиқчасига қаршилик қилиб, унинг ғазабига учрашни истамайди.