Трамп Шимолий Кореяга қарши санкцияларнинг амал қилишини муддатини узайтирди

Kun.uz

АҚШ Шимолий Кореяга қарши киритилган санкцияларнинг амал қилиш муддатини бир йилга узайтирди. Бу ҳақда Оқ уй баёнотида айтилган. Ҳужжат АҚШ президенти Дональд Трамп томонидан имзоланган.

Ҳужжатда айтилишича, Шимолий Кореяга нисбатан фавқулодда вазият тартиби сақланиб қолади. Шу сабабли аввал қабул қилинган санкциялар ўз кучида қолади.

Гап 2008 йилда киритилган ва кейинчалик кенгайтирилган санкциялар ҳақида кетмоқда.

Оқ уй хабарида айтилишича, “Корея яриморолида қурол яратишда қўлланиши мумкин бўлган моддалар мавжудлиги ва тарқалиши хавфи, Шимолий Кореянинг сиёсий йўналиши, у томонидан ядровий дастурнинг қўллаб-қувватланиши ва бошқа иғвогар ҳаракатлари АҚШ хавфсизлиги ва иқтисодиётига хавф солади”. 

Амалдаги санкциялар муддати 26 июнда тугаши керак эди.

Трамп Шимолий Корея етакчиси Ким Чен Ин билан учрашувдан кейин Пхеньянга қарши киритилган санкциялар Шимолий Корея тўлиқ ядровий қуролсизланмагунча кучда қолишини маълум қилганди.