TEXT
ТЕМУР ТИҒИ ЕТМАГАН ЖОЙНИ ИЛМ БИЛАН ОЛДИ МУАЛЛИМ
Олис қишлоқлик ёшгина ўқитувчи қизнинг номини буюк саркардага қиёслаш балки, ножоиздир. Аммо, бу муаллиманинг эришаёган ютуғидан, ёш бўлсада бир нечта китоблари чиққанидан, қирқдан зиёд илмий рисолалари чоп қилинганидан, қисқа муддат ичида хорижий давлатлар ва халқаро ташкилотлар томонидан ўтказилган семинар ва танловларда ғолибликни қўлга киритганидан, унинг ишлари халқаро миқёсда тан олиниб илмий китоблари Россия, Туркия, Америка давлатларида босилиб чиқарилаётганидан ва ниҳоят МДҲ давлатларида “Йилнинг энг ёш олими”, деб эълон қилинганидан Амир Темурнинг ҳам, Бобурнинг ҳам, Беруний ва Хоразмийларнинг ҳам руҳлари шод бўлаётган бўлса ажаб эмас.
АЖДОДЛАРНИНГ МУНОСИБ ВОРИСИ
Ҳа, Ўзбекистоннинг энг чекка жойи: бир ёғи Туркманистон, бир ёғи Қорақалпоғистон билан чегарадош Гурлан тумани Гулистон қишлоғидаги 33-умумий ўрта таълим мактабининг немис ва инглиз тили ўқитувчиси Огулнур Атаева ўзининг илми, заковати билан дунёни забт эта олди, десак адашмаймиз.
Яқинда Огулнур Атаева Қозоғиcтон Республикасининг Нурсултон шаҳрида МДҲ давлатлари ўртасида ўтказилган "Йилнинг энг яхши ёш олими - 2021" Халқаро танловида 14 та мамлакат ичида Чет тиллар йўналишида биринчи ўринга лойиқ кўрилиб, олтин медаль билан тақдирланди. Шунингдек, Миср давлатида 2-4 июнь кунлари бўлиб ўтадиган адабий анжуманга йўлланмани қўлга киритди.
Бу унинг биринчи ютуғи эмас. Шу пайтга қадар ёш олима устоз фаннинг қиёсий тилшунослик йўналишида илмий изланишлар олиб бориб Халқаро “Уздик Ақин” медаль соҳибаси, Республика ва халқаро миқёсда ўтказилган турли илмий конференция, танлов ва мусобақаларда мунтазам иштирок этиб, совринли ўринларга сазовор бўлган.
Ўқитувчиларга муносабат ўзгарган, эътибор кучайган кейинги тўрт йил унинг фаолиятини ҳам ижобий томонга кескин ўзгартириб юборди. Дастлаб, 2017 йил 6-14 май кунлари Самарқанд шаҳрида бўлиб ўтган «Deutschtage Samarkand-2017» халқаро семинарида иштирок этиб, фаол иштироки ва теран илмий мушоҳадаси учун Германиянинг ONDAF имтихонида Б1 тоифасидаги сертификат ва «Ttilnahmbestätigung» сертификатини қўлга киритишга муяссар бўлди. 2018 йил Украинада ўтказилган «ХХХIII Международной научно-практической интернет- конференции» тадбирида фаол қатнашиб сертификат билан такдирланди. Шунингдек, 2018 йил Германия мамлакатининг ДААД дастури бўйича ГРАНТ асосида Август ойида бир ойлик бепул таълим олиш имкониятини кўлга киритди ва 2018 йилнинг ДААД Стипендиянти бўлди.
2019 йил 17 январида Германиянинг Сиеген Университетининг Ўзбекистондаги вакили қилиб тайинланди.
Бундай рўйҳатни яна давом қилдириш мумкин. Қисқа қилиб айтсак, Огулнур Атаева кейинги йилларда кўплаб хориж давлатлари томонидан ташкил қилинган йигирмага яқин семинар ва тадбирларда қатнашиб ғолибликни қўлга кирита олган.
ИЛМ БИЛАН ҲАМНАФАС УСТОЗ
Огулнур Атаева илмий раҳбари педагогика фанлари доктори, К.Аброрхонова билан биргаликда “Чет тилини ўқитишда педагогик методларни қўлланиши” мавзусида тадқиқот ишларини юритмоқда. Ушбу тадқиқот ишларининг ҳулосалари республика ва ҳалқаро илмий журналларда ва конференцияларда муҳокама қилиниб, ҳозирги кунга келиб 30 дан ортиқ илмий мақола ва тезисларни Ӽалқаро тўпламларда чоп эттиришга эришган.
Илмий ишлари Германиянинг Берлин шахрида бўлиб ўтган « Der XVI Internationalen wissenschaftlichen und praktischen Konferenz» илмий конференцияcи китобида, Американинг «MATERIALS OF THE INTERNATIONAL SCIENTIFICAND PRACTICAL CONFERENCE » номли тўпламида, Полшанинг «XVI MIḚDZYNARODOWEJ NAUKOWI-PRAKTYCZNEJ KONFERENCJI » номли илмий тўпламида ва Белгиянинг София шаӽрида «ХVI международна научна практична конференция » номли илмий тўпламларда чоп этилган.
2020 йил немис тилидаги “Deutsch für ALLE“ номли немис тилини мустақил ўрганувчилар учун қўлланма ва „ ILM-MA’RIFAT-YORQIN KELAJAK MA’SHALI“ номли илмий-услубий педагоглар учун қўлланма китоблари Ӯзбекистон Республикаси Фанлар Aкадемияси “ ФАН” нашриёти томонидан 300 нусхада нашр қилинди.
Шунингдек, Россия, Америка, Туркия давлатларида унинг илмий китоблари чоп қилиниш арафасида.
БУЮК УСТОЗ СИЙМОСИ
-Ўқитувчи деганда, портфель кўтарган эркакни эмас, кўзойнак тақиб жиддий юрувчи аёлни эмас, балки онамни тасаввур қиламан,-дейди Огулнур Атаева.- Бир ярим ёшимда отамдан ажралдим. Бева қолиб уч нафар фарзандни ўқитувчилик қилиб оқ ювиб, оқ тараб вояга етказган муштипар онамни. Дунёнинг неки синовлари, неки қийинчиликлари бўлса барини бошидан ўтказиб, сабр бардош билан енгиб ўтган ўқитувчи онам менинг тасаввуримда буюк устоз сифатида муҳрланиб қолган. Ҳа, ҳаётимиз осон кечмади. Кўчада қолиб, тўрт томонга қараб турган кунларни ҳам онам билан бошдан кечирдик. Шунга қарамай бу қийинчиликларни матонат билан енгиб, тинимсиз меҳнат қилиб “Халқ таълими аълочиси” кўкрак нишони билан мукофотланган онамнинг бу медалини ўша пайтда ўзимнинг кўксимга тақиб олиб ечмай юрганим ҳамон эсимда.
“ЎҚИТУВЧИЛИК ҲАЁТИМ МАЗМУНИДИР”
-Ҳаётимнинг асосий мазмуни эса севимли ўқувчиларимдир,-дея суҳбатни давом қилдирди О.Атаева. -Дарсга умуман қизиқмайдиган, бири шўх, бири ўйинқароқ болаларга нимадир ўргатиб, уларни тўғри йўлга солаётганимдан, меҳнатларим самарасиз кетмаётганидан ўзим ҳам завқланаман. Ўқитувчилик бу мен учун мукофот эмас: ҳам мажбурият, ҳам масъулиятли касбдир. Касбга бундай ёндашиш хислати менга онамдан ўтган.
Дарҳақиқат, ёш олима устознинг меҳнатлари бесамар кетмаяпти. 2020 йил Немис тили фан олимпиадасида 9-11-синф ўқувчилари Қорабаева Турсуной, Ӯттузова Роза фахрли 1-ўринни эгаллади. Хоразм вилояти Халқ таьлим бошқармаси томонидан ўтказилган „Wettbewerb in Deutsch„ танловида эса ўқувчиси Қадамбаева Сабрина фахрли 1-ўринни эгаллади.
ДУНЁГА ТАРАЛГАН ИЛМ НУРЛАРИ
Бир вақтлар дунёдаги биринчи Маъмун Академияси очилиб буюк алломаларни етиштириб, бутун дунёга илм-маърифат зиёсини тарқатган ушбу заминда яна маърифат нурлари таралмоқда.
Бу нурлар нафақат Хоразм, балки янги маърифат Эрасига қадам қўяётган Янги Ўзбекистоннинг ҳар бир чеккасидан: водийдан тортиб Қорақалпоғистонгача, Навоийдан тортиб Сурхондарёгача чекка-чекка қишлоқларда оддий устозлар, исми жисмига монанд Огулнурлар сиймосида таралмоқда.
Янги Ўзбекистон номини жаҳонга танитиб, дунёга илм нурларини тарқатаётган бундай ёш, олима устозлар билан қанчалик фахрлансак оз...
Мирзабек ЖАПАҚОВ,
ҳуқуқшунос журналист. Хоразм.
