#Технология

IDC: Жаҳоннинг пешқадам смартфонсозлари -- ТОП-5

Маркетинг тадқиқотлари бўйича жаҳоннинг етакчи IDC компанияси 2017 йилнинг 2-чораги учун дунёнинг энг пешқадам смартфонсоз компанияларини маълум қилди. Жорий чоракда жаҳон миқёсида смартфон савдоси кўлами 1.3 фоизга камайган ва 341 миллион донани ташкил қилган.

Кутилганидек, бу чоракда ҳам Samsung халқаро бозорга 79.8 миллион дона смартфон етказиб берган ва сайёрамизнинг 1-рақамли смартфон ишлаб чиқарувчиси номига эга чиққан. Унинг мазкур чоракда етказиб берилган смартфонларнинг умумий миқдоридаги улуши 23.3 фоизни ташкил қилган. Бу рақам ушбу даврда 41 миллион дона смартфон етказиб берган Apple натижасидан деярли 2 баробар кўп дегани. Амриқолик "олма"нинг бу чоракдаги улуши 12 фоиз. Кучли "учлик"ни Huawei якунлаб берган. Хитойлик етакчи қайд этган натида Apple'никига жуда яқин -- 38.5 миллион дона смартфон ва жами смартфонлар миқдоридаги компания улуши 11.3 фоиз.

Huawei Хитой ҳамда Европа смартфон бозоридаги мустаҳкам ўрни боис, бу гал ҳам пешқадамликни сақлай олган. Хитойлик IT-гигантнинг натижаси аввалги йилнинг шу даврига нисбатан 2 фоизга юқорилаган. Huawei'нинг ўрта нархли ва қимматбаҳо смартфонлари бугунда жадал оммалашмоқда. Айниқса, тақдим қилинган сўнгги P10, Mate 9 моделлари, Honor туркумидаги "ақлли" телефонлари бозорда яхши сотилмоқда.

OPPO эса 8.1% улуш билан тағин 4-ўринни қўлга киритган. Унинг "қариндош" бренди (улар ягона корпорацияга қарашли) Vivo бу гал 5-ўринни "ҳамюрти" Xiaomi'га бўшатиб берган. Сяоми бу чоракда жаҳон миқёсида ишлаб чиқарилган смартфонларнинг 6.2 фоизини етказиб берган.

Xiaomi Осиё, хусусан Ҳиндистон смартфон бозорида тез оммалашмоқда. Унинг смартфон ишлаб чиқариш салоҳияти сўнгги бир йилда 58.9% га ошган. Мисол учун, компания 2016 йилнинг 2-чорагида 13.3 миллион дона смартфон етказиб берган бўлса, бу чоракда унинг ишлаб чиқарган телефонлари сони 21.2 миллион донани ташкил қилмоқда. Айниқса, бренднинг Осиё ва Европа бўйлаб дўконлари сонини кўпайтириш билан боғлиқ режалари унинг рейтингдаги ўрнини келажакда мустаҳкамлаши кутилмоқда.

2017 йилнинг 2-чораги учун етакчи смартфон ишлаб чиқарувчилар:

1. Samsung - 22.3%

2. Apple - 12%

3. Huawei - 11.3%

4. OPPO - 8.1%

5. Xiaomi - 6.2%

6. Бошқалар - 39.0%

Гарчи, умумий миқёсда смартфон савдоси тушган бўлса ҳам, юқоридаги компанияларнинг смартфон савдосида кўтарилишлар кузатилган.