Ҳар ойнинг биринчи якшанбаси “Мурувват куни” деб белгиланибди: демак бугун "Мурувват куни!"
https://t.me/Sirdaryo
28 октябрь куни пойтахтимиздаги Шайх Зайниддин жоме масжидида Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита ташаббуси билан жисмоний имконияти чекланган фуқаролар билан очиқ мулоқот ташкил этилиб, ҳар ойнинг биринчи якшанбаси “Мурувват куни” сифатида белгиланган эди.
Жорий йилнинг ноябридан эътиборан ҳар ойнинг биринчи якшанбаси Дин ишлари бўйича қўмита тизимида “Мурувват куни” деб белгиланди ва унинг доирасидаги дастлабки учрашув 4 ноябрь куни Тошкент шаҳрида ўтказилди.
Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, “Вақф” хайрия жамоат фонди ҳамкорлигида ташкил этилган тадбирда 250 нафар имконияти чекланган инсонлар иштирок этди.
Шу куни Дин ишлари бўйича қўмита томонидан Саудия Арабистонидан махсус келтирилган брайл ёзувидаги Қуръони Каримнинг ноёб нусхаси кўзи ожизларга туҳфа этилди.
Тадбир давомида “Вақф” хайрия жамоат фонди томонидан ҳам қимматли совғалар тақдим этилиши йиғилганларга хуш кайфият бағишлади.
Имконияти чекланган юртдошларимиз томонидан намоз, поклик ва бошқа диний адабиётларни брайл ёзувида нашр қилиш ва аудио-дисклар чиқариш, маърифий суҳбатлар сонини янада кўпайтириш, шунингдек, диний-маърифий тадбирларни ўтказиш учун бино ажратиш, диний телекўрсатувларга сурдо таржимонларни бириктириш, жума маърузаларини сурдо таржимонлар ёрдамида онлайн тартибда бериб бориш, имконияти чекланган инсонлар учун махсус сайт ташкил қилиш бўйича қатор таклифлар билдирилди.
– Ўзбекистонда 23 минг нафар кар-сақов бўлса-да, уларга 50 нафаргина сурдо таржимон бор, – дейди иштирокчилардан бири. – Ҳеч бўлмаса, 300 нафар ана шундай таржимон керак. Бугунги кунда масжидларда ҳам сурдо таржимонларга катта эҳтиёж бор.
Тадбирда шу каби муаммолар ва уларнинг ечими йўлида қатор таклифлар билдирилди. Кейинги мурувват кунига қадар амалга ошириладиган режалар белгилаб олинди.
Навбатдаги “Мурувват куни” 2 декабрда бўлиб ўтади.
Дин ишлари бўйича қўмита
Матбуот хизмати
ЎзА